Юмо дене кылдалтше йодышлан вашмутым муаш манын, еҥ-влак тӱрлӧ релийгийын кумалме верышкышт коштыт. Но шукыж годым ни вашмутым, ни лыпландарымашым огыт му, сандене тушко коштмым шукышт чарнат. А Иегован Таныкше-влакын христианысе вашлиймашышкышт молан коштман? Мо дене нуно ойыртемалтыт?

Поро да сай калык коклаште лийына. Икымше курымысо христиан-влак погынымашыш чумырымо лийыныт. Пырля погынен, ӱшаныше-влак Юмылан кумалыныт, Священный Возымашым шымленыт да икте-весым кумылаҥденыт (Еврей-влаклан 10:24, 25). Нунын коклаште лишыл кыл кучымаш лийын. Христианысе иза-ака-влак икте-весылан лишыл йолташ семын лийыныт (2 Фессалоникысе-влаклан 1:3; 3 Иоаннын 14). Ме нунын примерышт почеш ыштена. Тиде мыланна кугу куаным конда.

Библийысе принцип-влакым кучылташ тунемына. Библийын каласымыж почеш, ожно, Юмо нерген шинчымашым налаш манын, пӧръеҥ, ӱдырамаш да йоча-влак пырля погыненыт. Меат тыге ыштена. Опытан туныктышо-влак мыланна умылаш полшат, кузе библийысе принцип-влакым илышыш пурташ лиеш (Второзаконие 31:12; Неемия 8:8). Кӧн кумылжо уло, тудо погынымаш дене пырля мурен сеҥа да йодышлан вашмутым пуэн кертеш. А тидыже Юмым чапландараш да мокташ сай йӧн (Псалом 34:18).

Ӱшанымашнам пеҥгыдемдена. Апостол Павел ик погынымашлан тыге возен: «Мый тендам моткоч ужнем... тыландат, мыланемат икте-весынан ӱшанымашланна кӧра кумылаҥаш манын шонем» (Римлян-влаклан 1:11, 12). Погынымашым она кодо гын, иза-ака-влак дене лишыл кылым кучена гын, ӱшаннам пеҥгыдемдена, да Юмын законжо почеш илаш кумылна вияҥеш.

Лийшаш вашлиймашыш толаш да чыла шке шинча дене ужаш тендам пагален ӱжына. Тендам тушто уло кумылын вашлийыт. Пурымылан оксам тӱлаш огеш кӱл, вашлиймашыштат оксам огыт пого.

• Иегован Таныкше-влак могай пример почеш шке вашлиймашыштым эртарат?

• Христианысе вашлиймашыш коштмаш могай пайдам конда?