Иегован шонымыжо почеш ача ден ава йоча верч мутым кучышаш улыт (Колоссян-влаклан 3:20). Тыланда икшывыдам Иеговам йӧраташ да шотан айдеме лияш туныкташ кӱлеш (2 Тимофейлан 1:5; 3:15). Йочадан шижмашыжым да шӱмыштыжӧ мо улмым тыланда умылаш тыршыман. Иегован Мутшо эн ончыч тендан шӱмыштыда лиеш гын, тунам йочадамат Библийлан шке пример дене сайрак туныктен кертыда (Псалом 39:9).

МОМ БИБЛИЙ ОЙЛА. «Тек кажне айдеме колышташ писе, ойлаш вашкыдыме... лиеш» (Иаковын 1:19). Йочада тендан дене чон почын мутланыже манын, мом ыштыман? Эн ончыч тудым колышташ эре ямде лияш кӱлеш. Йочалан шке шонымаш ден шижмашыже нерген ойлаш куштылго лийже манын, ешыштыда тыныс лийшаш (Иаковын 3:18). Тыгак йоча-влак палышаш улыт: нуным шылталаш да туныкташ вашкаш огыт тӱҥал. Йоча дене эре чытыше лийза да, тудым йӧратеда манын, чӱчкыдынрак ойлыза (Матфейын 3:17; 1 Коринфян-влаклан 8:1).

ПАЙДАЛЕ КАҤАШ-ВЛАК

• Йочан мутланаш кумылжо уло гын, тудым колыштса

• Йоча дене проблеме лекме годым веле огыл, а эре мутланыза

МОМ БИБЛИЙ ОЙЛА. «Сайрак умылаш тыршыше сеҥымашке шуэш» (Притчи 16:20). Йоча мом ойлынеже, вик умылаш южгунам куштылго огыл. Ӱдыр-рвезе-влак чӱчкыдын шоныде каласен кертыт. «Кӧ вашмутым колыштде пуа, тудо шотдымын ышта» (Притчи 18:13). Шыдешкаш да ӧпкелаш ида вашке (Притчи 19:11).

ПАЙДАЛЕ КАҤАШ-ВЛАК

• Йочан ойлымыжо тыланда ок келше гынат, тудым ида чаре да сыраш ида вашке

• Йоча годсо жапдам шарналтыза, мо тендам тунам тургыжландарен да могай шонымаш ден шижмашда лийыныт

МОМ БИБЛИЙ ОЙЛА. «Эргым, ачатын туныктымыжым колышт, аватын каҥаш-влакшымат ит кораҥде» (Притчи 1:8). Йоча-влакым ончен кушташ Иегова ачаланат, аваланат ӱшанен пуэн. Тендам пагалаш да мут колыштшо лияш йочадам туныктыза (Ефесян-влаклан 6:1—3). Коклаштыда «ик шонымаш» уке гын, йоча-шамыч тидым вигак шижыт (1 Коринфян-влаклан 1:10). Пелаш дене иктаж-мо шотышто ода келше гын, тидын нерген йоча ончылно огыл, а шинчаваш мутланен налза. Уке гын, йочалан тендам пагалаш неле лиеш.

ПАЙДАЛЕ КАҤАШ-ВЛАК

• Йочам кузе кушташ тӱҥалыда, мутланен келшыза

• Йочам куштымо шотышто пелашет дене ончалтышда ойыртемалтеш гын, тудын шонымыжым умылаш тырше

МОМ БИБЛИЙ ОЙЛА. «Самырык рвезым чын корно дене каяш туныкто» (Притчи 22:6). Йочам шот дене кушташлан тыршымаш кӱлеш. Чылажымат ончылгоч шоналтыман да шарныман: тӧрлатымаш деч посна йочам сайын кушташ огеш лий (Псалом 126:4; Притчи 29:17). Но тӧрлатымаш — тиде наказатлымаш веле огыл. Йочалан тыгак умылаш полшыман, молан южо правилым шукташ кӱлеш (Притчи 28:7). Эше йочам Юмын Мутшым йӧраташ туныкташ да тушто возымо принцип-влакым тудлан умылаш полшаш кӱлеш (Псалом 1:2). Тыге йочан совестьше чын почеш туныктымо лиеш (Еврей-влаклан 5:14).

ПАЙДАЛЕ КАҤАШ-ВЛАК

• Иегова чынак улшо да илыше Юмо да тудлан тӱрыснек ӱшанаш лиеш манын, йочалан умылаш полшыза

• Йочам тӱрлӧ лӱдыкшым ужын мошташ туныктыза. Мутлан, интернетыште да социальный сетьлаште улшо вапшыш кузе логалаш огыл да уда еҥ-шамыч деч шкем кузе аралаш, нунылан умылтарыза