Ko te rongo pai e ora te tangata ki te whenua ake tonu atu, kua tuhia ki te Paipera. (Ngā Waiata 37:29) He mea hanga te Paipera i ngā pukapuka iti ake e 66. I whakamahi te Atua hei kaituhi tata ki te 40 tāngata whakapono. Ko ngā pukapuka tīmata e rima, nā Mohi i tuhituhi ētahi tau 3,500 ki muri. Ko te pukapuka whakamutunga, nā Hoani apōtoro i tuhituhi 1,900 tau ki muri. Nō wai rā ngā whakaaro i tuhi ai ngā kaituhi o te Paipera? I whakawhitiwhiti whakaaro te Atua ki ngā kaituhi o te Paipera mā tōna wairua tapu. (2 Hamuera 23:2) I tuhituhi rātou i ngā whakaaro o te Atua, ehara ko ō rātou ake. Nō reira ko Ihowa te Kaitito o te Paipera.​—Pānuitia 2 Tīmoti 3:16; 2 Pita 1:20, 21.

E mōhio ana tātou nō te Atua te Paipera, nō te mea e kōrero tika tonu nei mō āpōpō. Kāhore tēnā e taea e te tangata. (Hohua 23:14) Ko te Atua Kaha Rawa anake e āhei ana te kite he aha kei āpōpō.​—Pānuitia Ihāia 42:9; 46:10.

Ka manako tonu tātou he mea mīharo tētahi pukapuka nō te Atua, otiia ko ia tēnā. Ka hia nei ngā tānga o te Paipera kua horahia ki ngā reo maha. Ahakoa nō neherā, kei te hāngai tonu te Paipera ki te pūtaiao pono. Otirā, kāhore āna kaituhi 40 i whakahē tētahi i tētahi. * Waihoki, kei te Paipera ake te tino tohu o te aroha o te Atua, ā, kei roto anō te kaha kia huri i te ora o te tangata ki te pai. Nā ēnei  mea i whakatūturu ki te tokomaha, ko te Paipera te Kupu a te Atua.​—Pānuitia 1 Teharonika 2:13.

E tino kōrero ana te Paipera i te rongo pai mō te whakaaro aroha o te Atua ki te tangata. E whakamārama ana ngā Karaipiture he pēhea i ngaro ai te honore kia noho ki te whenua pararaiha i ngā rā tīmata o te tangata, otirā, he pēhea rawa e whakahokia mai anō.​—Pānuitia Whakakitenga 21:4, 5.

Kei roto anō i te Kupu a te Atua te ture, te mātāpono, me te tohutohu. Tāpiri ki ēnei, he kohinga kōrero te Paipera o te hītori o ngā mahi a te Atua ki te tangata​—he hītori e whakakitea mai ana i te āhua o te Atua. Nā reira, ka āwhina te Paipera i a koe kia mōhio ki te Atua. E whakamārama ana me pēhea koe ka whakatata ai ki te Atua.​—Pānuitia Ngā Waiata 19:7, 11; Hēmi 2:23; 4:8.

Hei āwhina tēnei pukapuka iti i a koe, kia mātau ki te Paipera mā te tikanga i whakamahi a Ihu. I kōrerotia e ia tētahi karaipiture i muri i tētahi atu, me te whakamārama kia “mātau ai ki ngā karaipiture.”​—Pānuitia Ruka 24:27, 45.

Torutoru noa iho ngā mea mīharo e rite ki te rongo pai o te Atua. Heoi, kāhore ētahi tāngata e aro atu, ka riri kē ētahi atu. Kaua e āwangawanga. Ko te tūmanako o te hari i te ora tonu, kei runga anō i tō hiahia kia mātau ki te Atua.​—Pānuitia Hoani 17:3.