মীওইবনা পৃথিবীদা লোম্বা নাইদনা হিংগনি হায়বা নুংঙাইবা পাউ অসি বাইবলদা ইদুনা লৈ। (থাগৎ ঈশৈ ৩৭:২৯) বাইবল অসি অপিকপা লাইরিক ৬৬ না পুনশীল্লগা শেম্বনি। ঈশ্বরনা হায়বা ইনবা মীওই ৪০ রোম শীজিন্নদুনা লাইরিকশিংসি ইহনখি। অহানবগী লাইরিক মঙা অসিদি ঙসিদগী চহি ৩,৫০০ রোমগী মমাঙদা মৌশিনা ইখিবনি। অরোয়বগী লাইরিক অসিনা ঙসিদগী চহি ১,৯০০ রোমগী মমাঙদা পাখোনচৎপা যোহান্না ইখিবনি। বাইবল ইবশিংনা ইরম্লিবসি কনাগী ৱাখল্লোননো? ঈশ্বরনা বাইবল ইবশিংদা ইহন্নীংলিবশিংদু মহাক্কী অশেংবা শক্তিগী মতেংনা খঙহল্লম্মী। (২ সমূয়েল ২৩:২) মখোয়না ইরম্লিবদু ঈশ্বরগী ৱাখল্লোননি, মখোয় মশাগী ৱাখল্লোন নত্তে। মরম অসিনা বাইবলগী অইবদি যেহোবানি।—২ তীমোথি ৩:১৬; ২ পিতর ১:২০, ২১ পাবিয়ু।

বাইবলগী অইবা কনানো? হায়রিবা ভিদিও অসি য়েংবিয়ু

বাইবলনা তুংদা থোক্কদবা থৌদোকশিং চপ চানা মাঙজৌননা হায়দোকলম্মী। মীওইবা অমত্তনা মদু হায়বা ঙমদে। মরম অদুনা বাইবল অসি ঈশ্বরদগীনি হায়বা ঐখোয়না খঙই। (যোশূৱা ২৩:১৪) ইঙম-ঙম্বা ঈশ্বর মহাক খক্তনা মীওইবগী তুংগী মরমদা চপচানা উবা ঙম্মী।—যিশাইয়া ৪২:৯; ৪৬:১০ পাবিয়ু।

ঈশ্বরদগী লাকপা লাইরিক হায়বসিদি তোপ-তোপ্পা ওইগদবনি হায়না ঐখোয়না খল্লি, বাইবলসি মদুমক ওই। বাইবলসি লাক্ষ কয়া কয়া, তোঙান-তোঙানবা লোন কয়াদা ফংহনখ্রে। বাইবল অসি অরিবা লাইরিক ওইরবসু মসিদা ইরম্লিবশিংসি বিজ্ঞানগী মীৎয়েংদগী অচুম্বা ওই। অদুগা বাইবল ইবা মখোয় ৪০ গী মরক্তসু য়েৎনবা ৱাফম অমত্তা লৈখিদে। * অদুগীসু মথক্তা, বাইবলদা নুংশিবগী মরমদা হায়রিবা ৱাফম কয়াসি ঈশ্বর নত্তনা কনামত্তনা হায়বা ঙম্লোই। মসিনা ঙসিসু মীওই কয়াগী পুন্সি অফবা মায়কৈদা পুরকপা ঙম্বগী শক্তি লৈ। হায়রিবা মরম কয়াসিনা মীওই লাক্ষ কয়াবু বাইবল অসি ঈশ্বরগী ৱাহৈনি হায়বা থাজবা ঙমহল্লি।—১ থেসালোনিকীয়া ২:১৩ পাবিয়ু।

বাইবলদা ইরিবসি অচুম্বনি হায়বা ঐখোয়না করম্না খঙগনি? হায়রিবা ভিদিও অসি য়েংবিয়ু

বাইবলনা মরুওইনা হায়রিবদি ঈশ্বরনা মীওইবা জাতিগীদমক অফবা পান্দম অমা থম্বিরি হায়বগী নুংঙাইবা পাউ অসিনি। মীওইবনা হৌরকপা ঙল্লিঙৈ মতমদা পারাদাইসতা লৈবগী খুদোংচাবদু করম্না মাঙখিবগে হায়বদু বাইবলনা তাকই। অদুগুম্বা পারাদাইস অদু করম্না অমুক হনজিলহনগনি হায়বদুসু মসিনা তাকলি।—ফোংদোকপিবা ২১:৪, ৫ পাবিয়ু।

ঈশ্বরগী ৱাহৈ অসিদা ৱায়েল য়াথং, নিয়ম অমসুং পাউতাক কয়াসু য়াওই। অদুগীসু মথক্তা, বাইবলদা ঈশ্বরনা মীওইবশিংবু করম্না লোয়নবিখি হায়বগী মতাং কয়াসু য়াওরি। মসিদগী ঐখোয়না মহাকসি করম্বা মখলগী ঈশ্বরনো হায়বা খঙবা ঙম্মী। অসুম্না ঐখোয়না ঈশ্বর খঙনবা হোৎনবদা বাইবলনা মতেং পাংগনি। ঈশ্বরগা করম্না মরুপ ওইবা য়াগনি হায়বসু মসিনা তাকই।—থাগৎ ঈশৈ ১৯:৭, ১১; যাকোব ২:২৩; ৪:৮ পাবিয়ু।

বাইবলবু ময়েক শেংনা খঙহনবদা লাইরিক মচা অসিনা অদোমগী মতেং পাংগনি। যীশুনা তাকপীবা মতমদা বাইবলগী ৱাহৈশিং মথং মথং পুথোক্তুনা ‘শাস্ত্রশিংগী ৱাহন্থোক’ খঙহল্লম্মী। মহাক্না তম্বীরম্বগী মওং অদুমক লাইরিক মচা অসিদা শীজিন্নরি।—লূক ২৪:২৭, ৪৫ পাবিয়ু।

ঈশ্বরদগী লাকপা নুংঙাইবা পাউ অসিদগী হেনবা অতোপ্পা অমত্তা লৈতে। অদুবু মীওই খরনদি মসি থওইদে, অদুগা খরনা অমুক পাউ অসি তাবদা শাউনীংবসু য়াওই। অদুবু পুক্নীং হন্থবীগনু। অদোম্না ঈশ্বরগী মরমদা খঙবদুনা লোম্বা নাইদনা হিংবগী আশা ফংগনি।—যোহান ১৭:৩ পাবিয়ু।