লাইরিক মচা অসিদা নৈনখ্রিবশিংসিগী মতুং ইন্না, নহাক অমসুং নহাক্কী ইমুং মনুংনা ইল্লগা চৎপা মতমদা কান্নগদবা নিতি নিয়ম ময়াম অমা বাইবলদা য়াওরী হায়বসি খঙবা ঙম্মী। যেহোবানা নহাকপু নুংঙাইনা লৈহনবা পাম্মী। মহাকপু নীংজবনা নহাক্কী পুন্সিদা খৱাইদগী মরুওইবনি হায়না লৌজরগদি “পোৎ পূম্নমক অসি নখোয়দা হাপচিনবিগনি” হায়না মহাক্না ৱাশকপী। (মাত্থি ৬:৩৩) যেহোবানা তশেংনমক নহাক্কা মরুপ ওইবা পাম্মী। তাঞ্জা খুদিংমক্তা ঈশ্বরগা নহাক্কা লৈনরিবা মরুপ ওইবগী মরীদু হেন্না চেৎশিন্নবা হোৎনবিয়ু। মসি মীওই অমনা ফংবা য়াবা খৱাইদগী চাওবা খুদোংচাবা অদুনি।—মাত্থি ২২:৩৭, ৩৮

বাইবলনা করি হায়রি: “ঐনা নখোয়গী নপা ওইগনি, অদুগা নখোয়না ঐগী ইচা নিপাশিং অমসুং ইচা নুপীশিং ওইগনি . . . যেহোবানা হায়।” (২ কোরিন্থীয়া ৬:১৮) ঈশ্বরনা নহাকপু মহাক্কী চান্নরবা মরুপ ওইবা পাম্মী। মদুগীদমক তৌবা য়াবা অমদি ঈশ্বরদা হায়জবা হায়বসিনি। যেহোবানা নহাকপু মঙোন্দা, “তত্তনা হায়জৌ” হায়না খঙহল্লি। (১ থেসালোনিকীয়া ৫:১৭) মহাক্না নহাক্কী থম্মোয়দা ফাওরিবশিং অমসুং পুক্নিংদা লৈরিবা নুংঙাইতবশিং তাবীনবা খৌরাংনা ঙাইদুনা লৈ। (ফিলিপ্পীয়া ৪:৬) ইমুংগী মীওইশিংগা পুন্না ঈশ্বরদা হায়জবা মতমদা, নহাক্না ঈশ্বরসি তশেংনা লৈ হায়না লৌজৈ হায়বদু মখোয়না উগনি।

নহাক্না ঈশ্বরদা হায়জবা খক্তা নত্তনা মহাক্না হায়বশিংসু তাবা দরকার ওই। মহাক্না হায়বশিং তানবগীদমক বাইবল অমসুং বাইবলদা য়ুম্ফম ওইবা চেফোংশিং পাগদবনি। (থাগৎ ঈশৈ ১:১, ২) মদুদগী খঙলকপা ৱাফমশিং অদুদা মুন্না ৱাখল তৌবিয়ু। (থাগৎ ঈশৈ ৭৭:১১, ১২) ঈশ্বরনা হায়বা তাজনবগীদমক খৃষ্টান মীটিংশিং চাং নাইনা য়াওবসু দরকার ওই।—থাগৎ ঈশৈ ১২২:১-৪

যেহোবাগা নহাক্কা লৈনরিবা মরীদু হেন্না চেৎশীলহন্নবা অতোপ্পা মরুওইবা মরম অমদি অতোপ্পশিংদা মহাক্কী মরমদা হায়বা হায়বসিনি। নহাক্না অদুম্না তৌবা হেল্লিমখৈ মহাক্কী মফমদা হেন্না নকশিনজবসু ফাওগনি।—মাত্থি ২৮:১৯, ২০

নহাক্না তৌবা য়াবদি:

• বাইবল পানবা অমসুং ঈশ্বরদা হায়জনবগীদমক মতম কাইথোকপীয়ু

• ইমুং-মনুং অমত্তা ওইনা, পোত্থাবা অমসুং হরাও-কুম্মৈদগী ঈশ্বর নীংবগা মরী লৈনবা থবকশিংনা হেন্না মরুওইনা লৌবীয়ু

বাইবলনা করি হায়রি: “ঈশ্বরদা নকশিল্লু, অদুগা মহাক্না নখোয়দা নকশিনবিগনি।” (যাকোব ৪:৮) ইমুং মনুং পুন্না ঈশ্বর নীংবগী থৌরম চাং নাইনা পাঙথোক্নবা অকক্নবা মতম অমা লেপ্পীয়ু। (মৈহৌরোন ১৮:১৯) মদুদগী হেন্না তৌবসু দরকার তারি। নহাক্কী নুংতিগী হিংলিবা পুন্সিদা ঈশ্বরসু শরুক অমা ওইহনগদবনি। ঈশ্বরগা নহাক্কী ইমুংগা লৈনরিবা মরীদু চেৎশীলহন্নবগীদমক, “নহাক্না নহাক্কী য়ূমদা ফম্বা মতমদা, নহাক্না লম্বীদা চৎপা মতমদা, নহাক্না হিপ্পা মতমদা অমসুং হৌগৎপা মতমদা” মখোয়দা মহাক্কী মরমদা ৱারী শাবিগদবনি। (অনীশুবা ৱায়েন ৬:৬, ৭) যোশূৱানা হায়খি “ঐ অমসুং ঐগী ইমুংনদি যেহোবাবু থৌগল তৌজগনি।” মহাককুম্না ওইবা ঙম্নবা হোৎনবিয়ু।—যোশূৱা ২৪:১৫

নহাক্না তৌবা য়াবদি:

• ইমুংদা লৈরিবা মীওই অমমমগী দরকার ওইবদু খঙবীরগা তাকপী তম্বীবগী থৌরম অমা লেপতনা পাঙথোকপীয়ু