ঈশ্বর * যেহোবানা ইহান হানবা লুহোংবদু হৌদোকপিখিবনি। বাইবলনা হায়রি মদুদি ঈশ্বরনা ইহান হানবা নুপী অদু শেম্বীদুনা “মহাকপু নিপা অদুগী মফমদা পুবিরক্লম্মী।” মদুদা আদমনা অশুক্কী মতিক হরাওজরদুনা অসুম্না ফোঙদোকখি “মসি ঐগী শরূশিংগী শরূনি, ঐগী হকচাংগী হকচাংনি।” (মৈহৌরোন ২:২২, ২৩) যেহোবানা ঙসিসু য়ুম্বান পুন্সিদা খোঙদারবা মতৈ-মনাওশিংবু নুংঙাইনা লৈহনবা পাম্মী।

অদোম্না লুহোংলবা মতুংদা, অফবা, নুংঙাইবা ঙাক্তা ওইগনি হায়না খনবা য়াই। অদুবু, তশেংনদি য়ুম পাল্লবা মতৈ-মনাও অনিনা ফনা নুংশিননা লৈরবসু মখোয়গী পুন্সিদা খুদোংচাদবা খরদি অদুমক থেংনগনি। (১ কোরিন্থীয়া ৭:২৮) লাইরিক মচা অসিদা বাইবলগী নিয়মশিং য়াওরি। মসি ইল্লগা চৎচবা মতমদা, অদোমগী য়ুম্বান পুন্সি অমসুং ইমুং-মনুং নুংঙাইনা লৈবা য়াগনি।—থাগৎ ঈশৈ ১৯:৮-১১

বাইবলনা করি হায়রি: মপুরোইবনা ইমুং অমগী মকোক্নি।—এফিসা ৫:২৩

অদোম মপুরোইবা অমা ওইরগদি, অদোমগী নুপীবু য়াম্না নুংশিহৈনা লোয়নবদু যেহোবানা পাম্মী। (১ পিতর ৩:৭) নহাক্কী নুপীসি নহাক্কী পুন্সি খোঙলোয় ওইনবা ঈশ্বরনা শেম্বীখিবনি। মরম অসিনা নহাক্না মহাকপু ইকায় খুম্নবা অমসুং নুংশিনা লোয়নবিবা হায়বসি ঈশ্বরনা পাম্মী। (মৈহৌরোন ২:১৮) নহাক্কী নুপীবু নহাক্না থম্মোয় শেংনা নুংশিগদবনি অমসুং মহাক্কী অপাম্বদুনা নহাক্কী অপাম্বদগী হেন্না মরুওইনা লৌবীগদবনি।—এফিসা ৫:২৫-২৯

নহাক লোইয়নবী অমা ওইরবদি, নহাক্কী নপুরোইববু ইকায় খুম্নবা অমসুং মহাক্কী মথৌদাং মপুং ফানা পাঙথোকপদা নহাক্না মতেং পাংবদু যেহোবানা পাম্মী। (১ কোরিন্থীয়া ১১:৩; এফিসা ৫:৩৩) নহাক্কী নপুরোইবনা লৌরকপা ৱারেপশিংদা শৌগৎপা অমসুং মদুবু মপুং ফাহনবদা থৱায় য়াওনা মতেং পাংবিগদবনি। (কোলোসীয়া ৩:১৮) অদুম্না তৌরবদি, নহাক নপুরোইবা অমসুং ঈশ্বর যেহোবাগী মীৎয়েংদা ফজবী হায়বদু ওইগনি।—১ পিতর ৩:১-৬

নহাক্না তৌবা য়াবদি:

• নহাক্কী নুপীদা নত্রগা নপুরোইবদা হেন্না ফবা মপুরোইবা অমা নত্রগা হেন্না ফবী নুপী অমা ওইনবা করি তৌবা য়াই হায়না হংবিয়ু। হায়রকপশিং অদু মুন্না তাজরগা, চুমথোক্নবা হোৎনবিয়ু

• খাঙবা কনবা ওইগদবনি। মরমদি, অমনা অমবু করম্না নুংঙাইহনগদগে হায়বসি খঙবদা মতম চঙগনি

বাইবলনা করি হায়রি: য়ুম্বাল্লবা নুপা নুপী অনীনা, অমনা অমগী অপাম পামদগী মরমদা খনবীগদবনি। (ফিলিপ্পীয়া ২:৩, ৪) ঈশ্বর যেহোবানা মহাক্কী মনাইশিংবু “মী পুম্নমক্কী মফমদা পুক্নিং তপ্পা. . .ওইগদবনি” হায়না খঙহল্লি। মদু নীংশিংজরগা নহাক্কী নপুরোইবা নত্রগা নুপীবু মমল লৈনা লৌজগদবনি। (২ তীমোথি ২:২৪) “থাঙশাংনা থিনবগুম্না ৱা ঙাঙবা মী লৈ, অদুবু অশিংবশিংগী লৈতোন্না ফহনবিবা পুরকই।” মরম অদুনা মুন্না খনথরগা ফজবা ৱাহৈ ৱাতা শীজিন্নরগা ঙাঙগদবনি। (পাউরৌ ১২:১৮) থৌজাল হৈনা অমসুং নুংশিনা ঙাঙনবগীদমক যেহোবাগী শক্তিনা নহাকপু শোয়দনা মতেং পাংগনি।—গালাতীয়া ৫:২২, ২৩; কোলোসীয়া ৪:৬

নহাক্না তৌবা য়াবদি:

• নহাক্কী নপুরোইবগা নত্রগা নুপীগা মরুওইবা ৱাফম অমা খন্নদ্রিঙৈদা অমনা অমদা হায়বা ফজনা তাবা ঙম্নবা অমসুং ঈংথনা লৈবা ঙম্নবা ঈশ্বরদা হায়জদুনা মতেং নিজগদবনি

• ৱা অমা হায়দ্রিঙৈ মমাঙদা করি হায়গনি অমসুং করম্না হায়গনি হায়বদু মুন্না খন্থবীয়ু

বাইবলনা করি হায়রি: অদোম্না য়ুম পাল্লবা মতমদা নহাক্কী নপুরোইবা নত্রগা নুপীগা “হকচাং অমত্তা ওইরে”। (মাত্থি ১৯:৫) অদুবু তোঙান-তোঙান্বা মীশক ওইবনিনা মোৎ খেৎনরকপা য়াই। মরম অসিনা অনিমক্না পুক্নিংদা ফাওবা অমসুং খনবা ৱাখল্লোনদা অমত্তা ওইবা ঙম্নবা হোৎনগদবনি। (ফিলিপ্পীয়া ২:২) ৱারেপ কয়া লৌরকপা মতমদা ৱাখল অমত্তা ওইবা হায়বসি য়াম্না মরু ওই। বাইবলনা হায়রি: “পাউতাক লৌবা থৌরাং খুদিং মরা চেৎলি” (পাউরৌ ২০:১৮) মরুওইবা ৱারেপশিং পুন্না লৌমিন্নবা মতমদা বাইবলদা য়াওরিবা নিয়মশিংগী মরমদা মুন্না খল্লগা লৌবীয়ু।—পাউরৌ ৮:৩২, ৩৩

নহাক্না তৌবা য়াবদি:

• নহাক্কী নপুরোইবা নত্রগা নুপীদা অপাম্বা হায়বা নত্রগা মোৎ ফোঙদোকপা খক নত্তনা থম্মোয়দা ফাওবসু ময়েক শেংনা হায়বীয়ু

• ৱারেপ হান্না লৌশিনদ্রিঙৈদা নহাক্কী নপুরোইবা নত্রগা নুপীগা তান্নবীয়ু