নহাক্কী নপুরোইবা নত্রগা নুপীগা য়ুম্বান পুন্সিদা খোঙদামিন্নরবা মতুংদা, তোঙান-তোঙানবা খুদোংচাদবা কয়া থেংনরক্কনি। হায়রিবশিংসি, ৱাখল্লোন মান্নদবা অমসুং তৌথোরকপা মওংদা খেৎনবা কয়া লৈবদগী ওইরকপা য়াই। নত্রগা থাজরুদবা থৌদোকশিং থোক্লকপা অমসুং অতোপ্পা মরম কয়াদগী ওইরকপসু য়াই।

খুদোংচাদবশিং থেংনরকপদা মায় লৈদুনা চেন্নিংবা য়াই অদুবু বাইবলনদি মদু মাইয়োক্নগদবনি হায়না তাকপী। (মাত্থি ৫:২৩, ২৪) বাইবলগী নিয়মশিং ইনজদুনা, থেংনরিবা খুদোংচাদবশিং অদু য়াম্না মায় পাক্না মাইয়োক্নবা ঙমগনি।

বাইবলনা করি হায়রি: “ৱা ঙাঙবগী মতম” লৈ। (পাউ শন্দোকপা ৩:১, ৭) থেংনরিবা খুদোংচাদবদুগী মরমদা খন্ননবা মতম শোয়দনা লৌগদবনি। মদুগী মতাংদা নহাক্না করি খল্লি নত্রগা করম্না ফাওই হায়বদু নহাক্কী নপুরোইবা নত্রগা নুপীগী মফমদা থম্মোয়শেংনা খঙহনবীয়ু। মতমচুপ্পদা মহাক্কা “অচুম্বা ৱা ঙাঙনৌ।” (এফিসা ৪:২৫) পুক্নিং ফাথবা ঙম্লক্তবা, শাউনিংবা ফাওরকপা মতমদা খৎন-চৈনবা থোক্তনবা হোৎনবিয়ু। ঈং তপ্না ৱারী শান্নরগদি শাথিনা খৎন-চৈনবা থোকহন্দবা য়াগনি।—পাউরৌ ১৫:৪; ২৬:২০

য়ানিংদবা মতাং য়াওরবসু মহাক্কী মফমদা নুংশিবা, ইকায়খুম্নবা অমসুং থৌজালহৈবা উৎপদি কৈদৌনুংদা কাওরোইদবনি। (কোলোসীয়া ৪:৬) খন্নরিবা ৱাফমদু য়ারিমখৈ থুনা লোয়শিন্নবা হোৎনগদবনি। শাওনরিবনি হায়দুনা কৌন ঙাঙনদবা তৌরোইদবনি।—এফিসা ৪:২৬

নহাক্না তৌবা য়াবদি:

• থেংনরিবা খুদোংচাদবদুগী মরমদা, মতাং মতম চানা খন্নবিয়ু

• নহাক্না তাগদবা মতাং ওইরবদি তাবীয়ু মরক থৎলগা ঙাঙলুদনবা হোৎনবিয়ু। নহাক্কী অপাম্বা ফোঙদোক্নবগী মতমসু ফংগনি।

বাইবলনা করি হায়রি: “অমগা অমগা নুংশিনৌ, অমনা অমবু অথোইবনি নীংদুনা ঈকাই খুম্নৌ।” (রোমীয় ১২:১০) মহাক্না হায়বা মতমদা নহাক্না করম্না তাবীবগে হায়বদু য়াম্না মরু ওই। ‘নোল্লুকপগা’ লোয়ননা নহাক্কী নপুরোইবা নত্রগা নুপীনা খল্লিবা ৱাখল্লোনদু খঙনবা হোৎনবিয়ু। (১ পিতর ৩:৮; যাকোব ১:১৯) তাবা শাশিন্নবগী মওং তৌবিগনু। য়ারগদি, নহাক্না থবক অমা তৌরম্বা তারগসু ঙাইহাক লেপ্লগা, মহাক্না হায়রিবদুদা য়াম্না পুক্নিং চঙনা তাবীয়ু। অদুগুম্বা মতাং ওইদ্রগদি, কোন্না ৱারী শানবা হায়বীয়ু। নহাক্কী পুন্সি খোঙলোয় ওইরিবা মহাকপু, নহাক্না য়েক্নবা অমগুম খনদবা অদুবু মরুপ ওইনা খল্লবদি নহাক ‘শাউগৎপা থুবা ওইরোই।’—পাউ শন্দোকপা ৭:৯

নহাক্না তৌবা য়াবদি:

• মহাক্না হায়রিবশিংদুদা য়ানিংদবা য়াওরবসু মরৈ য়েৎনদনা অদুম তাবীয়ু

• শীজিন্নরিবা ৱাহৈশিংদু নত্তবা অদুবু ফোঙদোকনিংলিবা অর্থদু খঙনবা হোৎনবীয়ু। মহাক্না ফোঙদোক্লিবা অমসুং ঙাঙথোক্লিবা মওং মতৌদু খঙবীয়ু

বাইবলনা করি হায়রি: “থবক কন্না নোমজবা পূম্নমক্তা তোংজবা লৈ; অদুবু চীনবান্দা ঙাঙবতনদি লাইর-চূথহল্লি।” (পাউরৌ ১৪:২৩) নখোয় অনীনা অফবা ৱারেপ অমা পুন্না লৌমিন্নরে হায়বা খক্তনা য়াদে। অদুবু লৌখিবা ৱারেপতু থবক ওইনা পাঙথোকপা তঙাইফদে। মদুগীদমক নহাক্না য়াম্না কন্না হোৎনবা য়াই অদুবু পুম্নমক্তু নহাক্কী কান্ননবা ওইগনি। (পাউরৌ ১০:৪) নখোয় অনী পুল্লগা কন্না হোৎনজবা মতমদা মদুগী “অফবা মনা” শোয়দবা ফংজগনি।—পাউ শন্দোকপা ৪:৯

নহাক্না তৌবা য়াবদি:

• থেংনরিবা খুদোংচাদবদু মাইয়োক্ননবগীদমক ইশা-ইশানা থবক ওইনা পাঙথোকপা য়াবশিংদু লেপথোকপিয়ু

• খুদোংচাদবদু কদায় ফাওবা মায়োক্নবা ঙম্লবগে হায়বদু, মতম মতমগী ওইনা য়েংবিয়ু