A Alexander yeelame: “Tõnd sẽn na n gom rãam yũub yell pipi ne d bi-puglã t’a tara yʋʋm a yoobe. Tõnd yãame t’a mii bũmb wʋsg rãamã yũub wɛɛngẽ n yɩɩd d sẽn da tagsdã hal tɩ ling-do.”

•  Y sẽn segd n bãnge

•  Y sẽn tõe n maane

•   Biiblã sẽn yet rãamã yũub wɛɛngẽ

 Yaa tɩlɛ tɩ y gom rãamã yũub yell ne y kambã. Ra bas-y tɩ y biigã bɩ, tɩ y yaool n gom rãamã yũub yell ne-a ye. A Khamit sẽn yit Risi wã yeelame: “M da nongẽ-la tõnd sẽn da na n gomẽ rãamã yũub yell ne d biigã t’a nan paoodẽ. M sẽn wa n bãng rẽ yõodã, m sũur sãama hal wʋsgo. Bala m wa n bãngame tɩ m biigã sɩnga rãamã yũub a sẽn wa n tar yʋʋm 13 bala.”

 Bõe yĩng tɩ yel-kãngã tog n pak yãmba?

•   Karen-bi-taasã, piblisite-rãmbã la bũmb nins kambã sẽn get televiziõ wã tõe n kɩtame tɩ b sɩng rãam yũubu.

•   Siglg a yembr (CDC) yeelame tɩ Etazĩni tẽngã pʋgẽ, kamb 100 sʋka, bãmb 11 n yũud rã-toos buud fãa tɩ b nan paoodẽ.

  Rẽ n so tɩ logtoeembã sagend roagdbã tɩ b sõng b kambã tɩ b nan paoodẽ, tɩ b bãng tɩ rãamã yũub tõe n waa ne zu-loeese. Wãn to la y tõe n maan rẽ?

 Reng-y n tags-y sogsg nins y kambã sẽn tõe n wa sok-yã yelle. Kom-bõonegã wae n dat n bãnga bũmb fãa, la kom-biisã n dat rẽ n yɩɩda. Dẽnd yɩta sõma tɩ y reng n bao n bãng y sẽn tõe n leok b sogsgã to-to. Makre:

•   Y biigã sã n dat n bãng rãam noosem sẽn yaa to-to, y tõe n yeel-a lame tɩ divẽ wã yaa miisg wa sitrõ, la tɩ bɩyɛɛrã yaa toog liga.

•   Y biigã sã n dat n lemb rãam, y tõe n yeel-a lame tɩ rãamã tara pãnga, la t’a tõee kom-bõonegã. Wilg-y-yã-a tɩ rãamã tõe n kɩtame tɩ ned sũur noome, la wilg-y-yã-a me tɩ ned sã n yũ tɩ looge, tõe n kɩtame t’a neng yilmi, t’a tʋm gãeen-tʋʋma, wall a gom goam n wa maand a bãngẽ.​—Yel-bũnã 23:29-35.

 Bao-y n bãng-y bũmb kẽer rãamã yũub wɛɛngẽ. Biiblã yetame: “Gũus-m-meng soab tʋmda ne bãngre.” (Yel-bũnã 13:16) Bao-y n bãng-y noy nins fãa tẽngã taoor dãmb sẽn gãneg rãamã wɛɛngẽ. Rẽ na n sõng-y lame tɩ y segl y meng sõma n tõog n sõng y biigã.

 Sõs-y ne y kambã rãamã yũub wɛɛngẽ. A Mark sẽn yaa roagd sẽn yit Gãrãnd Bertayn wã yeelame: “Kom-bõonegã tõeeme n pa mi rãamã yũub sã n yaa sõma bɩ pa sõma ye. Mam soka m biigã sẽn tar yʋʋm a nii wã n na n bãng rãamã yũub sã n yaa sõma bɩ pa sõma. Mam maaname tɩ sõsgã tall yamleoogo, tɩ rẽ sõng m biigã t’a togs a tagsg n pa yɛɛs ye.”

 Y sã n gom rãamã yũub yell ne y kambã naoor wʋsgo, y sẽn yetã na n kẽ b sũurã sõma tɩ b bãng tɩ pa reem yell ye. Y tõeeme me n gom bũmb kẽer yell y sõsgã sasa. Wala makre, y tõe n goma sorã zug kẽndã la pag ne rao lagengã yelle. La rẽ tog n zemsa ne y biigã yʋʋm sẽn yaa to-to wã.

 Kõ-y y kambã mak-sõngo. Kambã yaa wa sɩfõ sẽn fõogd koom buud fãa wã. B nong n dɩkda b roagdbã, b yagsã bɩ neb taab togs-n-taare. Bãngdbã me wilgame tɩ yaa b roagdbã togs-n-taar la b rɩkd n yɩɩda. Dẽnd y sã n wae n yũud rãam sẽn na yɩl n sigs y sũur wall n boog y yɩɩre, y biigã na n tagsame tɩ rãamã yaa zu-loeesã tɩɩm. Woto wã, kõ-y y kambã mak-sõngo. Modg-y tɩ b yã tɩ y tara manesem sẽn zems rãamã yũub wɛɛngẽ.