SÕNGRE, ZAGSÃ RÃMB YĨNGA
Y sũur sã n yiki, y maanda wãn n tõog y menga?
Y pagã bɩ y sɩdã yeela bũmbu, bɩ a maana bũmb sẽn yikd yãmb sũurã. Y makame n na n tõog y menga. La a gũus n gesame tɩ yaa wa bũmb n tar-y-yã, t’a sɩng n sokd yãmb sogsgo. Rẽ maneg n puuga y sũurã. Y na n maana wãn n tõog y menga?
Y sẽn segd n bãnge
Sũ-yikrã tõe n sãama y yĩns laafɩ wã. Neb n maan vaeesg n wilg tɩ ned sẽn yikd a sũur tao-tao tõe n wa bẽe tãnsɩõ, sũur bãaga, depresɩõ, wall pʋ-zaba. Sũ-yikrã me tõe n kɩtame tɩ ned pa gõe sõma, bɩ n maand yɩɩr wʋsgo, wall n bẽ yĩn-gãong bãag menga. Yaa rẽ n so tɩ Biiblã yeel yaa: “Zãgs sũ-yikri . . , t’a ra wa kɩt tɩ f maan sẽn yaa wẽng ye.”—Yɩɩn-sõamyã 37:8.
Y sũurã sã n yik tɩ y pa gome, rẽ me tõe n waa ne yelle. Ned sũur sã n yik n pa sigda, tõe n nams-a-la tẽngr-tẽngre. Wala makre, a tõe n lebga ned sẽn nong wɩdga, bɩ n tagsd tɩ yɛlã pa na n maneg ye. Manesem kãngã yaool n tõe n sãama ned kãadem, bɩ n kɩt tɩ neb a taabã pa nong a zĩigẽ ye.
Y sẽn tõe n maane
Tags-y y sɩdã bɩ y pagã zʋg-sõma yelle. Gʋls-y bũmb a tãab y sẽn nong y sɩdã bɩ y pagã nengẽ. A sã n wa maan bũmb tɩ y sũurã yiki, tags-y-yã a zʋg-sõma wã yelle. Rẽ na n sõng-y lame tɩ y tõog y mengã.
Biiblã saglga: “Yɩ-y neb sẽn mi y zaamẽ”—Koloos-rãmbã 3:15.
Yɩ-y neb sẽn kõt sugri. Pipi, bao-y n bãng-y y sɩdã bɩ y pagã tagsgo. Rẽ na n sõng-y lame tɩ y yɩ wʋmda, tɩ y yiibã tall “yam a yembre,” wa Biiblã sẽn yetã. (1 Pɩyɛɛr 3:8) Rẽ poore, sok-y y meng yaa: ‘Yellã yaa n seka m na yik m sũur n pa kõ sugr bɩ?’
“Sẽn tar-a yam . . . zu-zẽkrã yaa a sẽn basd b sẽn beeg yẽnda wã taalã.”—Yel-bũnã 19:11.
Togs-y y tagsg ne bʋgsem la yam. Ra ning-y y to wã taal ye. Wala makre, ra yeel-y tɩ “yaa f sẽn pa nand maamã la f sẽn pa bool maam n togs f sẽn da beẽ wã.” Ad-y y sẽn tõe n yeele: “Zĩigã sẽn da sobgd tɩ m pa mi f sẽn beẽ wã ra yɛɛsd-m-la wʋsgo.” Y sã n gom ne bʋgsem, na n sõng-y lame tɩ y tõog y menga.
Biiblã saglga: “Kɩt-y tɩ yãmb goam tall bark wakat fãa n tar yamsem noom.”—Koloos-rãmbã 4:6.
Maag-y y yĩng n kelg y to wã. Y sã n togs y tagsgã n sa, bas-y y pagã bɩ y sɩdã tɩ yẽ me gome. Ra kʋʋg-y-yã-a ye. A sã n gom n sa, kʋms-y-yã a goamã n ges y sã n wʋm a sẽn yeelã võor sõma. Y sẽn maag y yĩng n kelg-a wã tõe n sõng-y lame tɩ y tõog y menga, baa y sũurã sã n da yikame.
Biiblã saglga: “Bɩ ned fãa wɩng ne kelgre, la a maag ne goamã.”—Zak 1:19.