A LUZIYA YAA WOABGA. A goabg kargã n pa sõma. A yãadmẽ wã la poliyo wã yõk-a. Yaa bãag sẽn komsd gĩin. A sẽn wa n tar yʋʋm 16, pag a ye a sẽn da tʋmd ne n yeel-a yaa: “Wẽnnaam n kɩt tɩ f lebg woabga, n na n sɩbg-fo, f sẽn da pa sakd f ma noore, n da namsd-a wã yĩnga.” Yaa yʋʋm wʋsg masã, la a ket n tẽra gom-kãensã sẽn sãam a sũur to-to wã.

A DAMARIS BẼEDA ZUG KÃNSƐƐRE. A sẽn na n bãngã raare, a ba wã sok-a lame yaa: “Bõe la f maan tɩ bã-kãngã wa yõkd foom? F tog n maana yel-wẽn-kãsenga. Yaa rẽ la Wẽnnaam sɩbgd-fo.” Gom-kãensã namsa a Damaris wʋsgo.

Kẽer sẽn tagsd tɩ ned sã n bẽedẽ, yaa Wẽnnaam n sɩbgd-a wã pa bũmb sẽn sɩng masã ye. Sebr a ye yeelame tɩ Kiristã wakatẽ wã, wʋsg ra tagsdame tɩ “ned sã n bẽedẽ, yaa yẽ mengã wall a roagd n maan yel-wẽnde, tɩ Wẽnnaam lobg-a bãag n na n sɩbg a mengã wall a roagdã.” Sebr a to me yeelame tɩ yʋʋm kobs Kirist wakatã poore, “neb kẽer ra tẽedame tɩ yaa Wẽnnaam n wat ne bã-longdsã n na n sɩbg bãmb b yel-wẽn yĩnga.” Yʋʋm 1300 wã sẽnese, bã-longdem n kʋ neb milyõ-rãmb Erop tẽnsẽ wã. Yaa Wẽnnaam n wa ne bãagã n na n sɩbg nin-wẽnsã bɩ, bɩ wa logtoɛɛmbã sẽn maan vaeesg n yã wã, yaa rẽgdã bal n wa ne bãagã bila? Neb kẽer tõe n sokda b mens sã n yaa Wẽnnaam n sɩd mi n wat ne bãasã, n na n sɩbg nebã b yel-wẽnã yĩnga. *

TAGS-Y N GES-Y: Sã n mik tɩ yaa Wẽnnaam n wat ne bãasã la namsg buud toor-toorã n na n sɩbg nebã, bõe yĩng t’a Zeezi sãoog neb bãase? Kõn yɩ wa a Zeezi ne Wẽnnaam pa noor a yembre, sẽn yaa tɩrg bɩ kɛgrã wɛɛngẽ sɩda? (Matye 4:23, 24) Wẽnnaam sã n tʋm a tʋʋmde, a Zeezi kõn saag n maan bũmb n sãam-a ye. A meng yeelame: “Wakat fãa, mam maanda sẽn noom bãmba.” A paasame yaa: “Mam maanda wa m ba sẽn yeel maamã.”—Zã 8:29; 14:31.

Biiblã togsda vẽeneg t’a Zeova “tʋʋmã zemsa zãnga!” (Tõodo 32:4) Wala makre, Wẽnnaam kõn kɩt tɩ sɩlg lʋɩ n kʋ neb kobse, a sẽn dat n sɩbg ned a ye sẽn be sɩlgã pʋgẽ yĩng ye. Wẽn-sakd a Abrahaam ra goma Wẽnnaam tɩrlmã yelle, n yeel tɩ Wẽnnaam pa na n ‘naag nin-tɩrs ne nin-wẽns n sãam’ ye. A pʋd n yeelame tɩ “yell a woto buud maaneg zãra” ne Wẽnnaam. (Sɩngre 18:23, 25) Biiblã leb n yetame tɩ Wẽnnaam “zãra ne wẽng maanego,” la t’a “ka tol n maand wẽng ye.”—Zoob 34:10-12.

D sã n namsdẽ, pa Wẽnnaam n sɩbgd tõnd d yel-wẽnd yĩng ye. A Zeezi yeela bũmb sẽn wilgd rẽ vẽenega. Daar a ye, yẽ ne a tʋm-tʋmdbã yãa rao sẽn yaa zoang hal a yãadmẽ, t’a karen-biisã sok-a yaa: “Karen-saamba, yaa ãnda soab n maan yel-wẽnd tɩ raoã rog ne zondo? Yaa yẽnda meng bɩ, bɩ yaa a ba-rãmbã?” A Zeezi leok-b lame, n yeele: “Ka tɩ yaa yẽnda bɩ a ba-rãmbã n maan yel-wẽnd ye.”—Zã 9:1-3.

Sẽn mik tɩ wakat kãngã, neb wʋsg ra tara tags-kɛg yel-kãngã buud wɛɛngẽ wã, a Zeezi sẽn yeel a karen-biisã tɩ pa raoã wall a roagdbã yel-wẽn yĩng la a sẽn yaa zoangã, tog n ling-b lame. Baraarã, A Zeezi kɩtame tɩ raoã zondã sa. La woto wilgame me tɩ nebã sẽn tagsd tɩ yaa Wẽnnaam n kɩtd tɩ nebã namsdẽ, n na n sɩbg-bã yaa ziri. (Zã 9:6, 7) Bã-kɛgemsã sẽn namsd neb nins rũndã-rũndã wã  sã n bãng tɩ pa Wẽnnaam n kɩt tɩ b namsdẽ, tõe n bels-b lame.

Ad Biiblã sẽn yete:

• “Wẽng ka tõe n mak Wẽnnaam, la bãmb mengã ka makd ned baa a yembr ye.” (ZAK 1:13) Ka la bilfu, Wẽnnaam pʋd n na n kɩtame tɩ “wẽng” buudã fãa sa. Bãase, kũum, toogo, la bũmb nins fãa sẽn sɩng n namsd ãdem-biisã.

• A Zeezi Kirist ‘maaga neb nins fãa sẽn ka laafɩ wã.’ (MATYE 8:16) Wẽnnaam Biigã sẽn maag bãad-rãmb nins fãa sẽn da wat a nengẽ wã, wilgdame tɩ Wẽnnaam Rĩungã na n wa maana woto dũniyã gill zugu.

• “Wẽnnaam na n yẽesa nintãm fãa sẽn be b ninẽ wã. Kũum kõn leb n zĩnd ye, la sũ-sãang wall yãbre, wall toog kõn leb n zĩnd ye. Bala, dẽenem bũmbã fãa loogame.”—VẼNEGRE 21:3-5.

Woto wã, bõe yĩng tɩ ninsaalbã namsd wʋsgo? Nebã sɩng n baooda sok-kãngã leoor hal sẽn kaoose. Sã n mik tɩ pa Wẽnnaam n wat ne namsgã, yaa ãnda? Sogs-kãensa la d na n leok sõsg ning sẽn pʋgdã pʋgẽ.