Biig sã n doge, minit 60 sẽn na n pʋglã yaa wakat sẽn tar yõod wʋsgo. Bõe yĩnga? Bala sasa kãngã, pagã sã n deeg a biigã tɩ b be ne taaba, sõngda biigã wʋsg a bɩʋʋngã pʋgẽ. *

Bõe yĩng tɩ pag get a bi-pɛɛlg yell sõma? Bãngd a Jeannette Crenshaw yeela sebr a ye pʋgẽ tɩ biig sã n doge, bũmb b sẽn boond tɩ ormon n be a ma wã yĩngẽ, n kɩtdẽ t’a sã n sɩɩsd a biigã, n get-a, wall a yẽsemd-a, bɩ a maneg n nong a biigã. Ormon buud a to me n be pagã yĩngẽ wakat kãnga, n sõngd pagã t’a bãngd a biigã raabo, tɩ rẽ kɩt tɩ yẽ ne a biigã wʋmd taaba. Bõe yĩng tɩ d sẽn mi rẽ wã tar yõodo?

Pag ne a biig sẽn nong taab to-to wã pa zaalem ye. Yaa a Zeova * sẽn yaa Naandã n maan tɩ yaa woto. Rĩm a Davɩɩd ra yeelame tɩ yaa Wẽnnaam n ‘yiis yẽ a ma pʋgẽ,’ la a kɩt t’a sã n da be a ma nusẽ bɩ a yam gãe. Ad a sẽn yeel a pʋʋsg pʋgẽ: “Mam dogem tɛka, b rɩka maam n gũnug yãmba. La baa mam sẽn dag n ket m ma pʋgẽ, yãmb n yaa mam Wẽnnaam.”—Yɩɩn-sõamyã 22:10, 11.

TAGS-Y N GES-Y: Wẽnnaam sã n maan woto fãa sẽn na yɩl tɩ pag tõe n bãng a bi-pɛɛlg raabo, n ges a yell sõma, pa zems tɩ d tags tɩ tõnd sẽn yaa “Wẽnnaam kambã,” a na n gesa d ned kam fãa yell sɩda?—Tʋʋma 17:29.

A Zeezi Kirist sẽn yaa a soab ning sẽn mi Naandã n tɩ yɩɩdã yeelame: “B ka koosd yirs a yiib su bɩ? La baasgo, a yembr ka lʋɩt tẽng tɩ yãmb Ba ka yã ye. La baa yãmb zoobdã fãa sõdame. Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.”—Matye 10:29-31, Wẽnnaam Sebre, 1983.

Neb a wãn n gũusd n get liuun-bõonesã sẽn yɩgdã, tɩ pa sokd liuun-bil sẽn ‘lʋɩt tẽnga’? Tõnd Ba sẽn be saasẽ wã yaool n nee liuul fãa. La a getame tɩ liuuli, baa liuuli wʋsg meng sẽn naag taab yõod pa ta ninsaal ye. Woto wilgdame tɩ y pa segd n “zoe rabeem,” n tagsdẽ tɩ Wẽnnaam pa ne-y ye. A nee yãmba, tɩ y yell pak-a!

Ad Biiblã sẽn yete:

• “Sẽn-Ka-Saab geta dũniyã fãa gilli, n na n sõng neb nins sẽn nong bãmb ne b sũyã fãa wã.”—2 KIBAYÃ 16:9.

• “Sẽn-Ka-Saab ninã bee nin-tɩrsã zutu, la b sã n bool bãmb n kos sõngre, b kelgd-b lame.”—YƖƖN-SÕAMYÃ 34:16.

• “Mam kɩdemdame n maand sũ-noog yãmb nonglmã pʋga. Bala, yãmb nee mam nimbãanegã, la yãmb mii mam yel-pakrã.”—YƖƖN-SÕAMYÃ 31:8.

Yãmb sã n miẽ tɩ y yell paka Wẽnnaam, la t’a geta yãmba, n dat y neere, tõe n toeema y vɩɩmã bɩ? Tõeeme. Ãngeletɛɛr pag a ye kibar n wilgd rẽ. A yʋʋr la a Ana. * Ad a sẽn yeele:

“M da wae n tagsdame t’a Zeova pa nong-ma, la t’a pa leokd mam pʋʋsg ye. M da tagsdame tɩ yaa m tẽebã sẽn paood yĩnga. M da tẽedame me t’a sɩbgda maam, wall a maanda a toog kae ne-ma, m sẽn ka bark a nifẽ yĩnga. M da getame tɩ m yell ka pak Wẽnnaam ye.”

La rũndã-rũndã, a Ana pa le sãmbd a Zeova sã n nong-a lame la a get a yell ye. Bõe n kɩt t’a toeem a tagsgã? Ad a sẽn yeele: “Pa yɩ zĩig pʋgẽ ye. M tẽra sõsg a ye m sẽn da kelg na maan yʋʋm wʋsg masã. Sõsgã pʋgẽ, b goma a Zeezi sẽn ki n dol tõnd yel-wẽnã yelle. Kẽ-m-la sõma, hal n sõng-m tɩ m maneg n bas m yam t’a Zeova nong-m lame. Sẽn paase, a Zeova sã n da leok m pʋʋsgo, m wae n daagda nintãm, bala m neeme t’a sɩd nong-m lame. Biiblã zãmsg la tigissã sõnga maam tɩ m bãng a Zeova n paase, n mi a sẽn yaa Wẽnnaam ning buudã, la a tagsg sẽn yaa a soab tõnd zugã. Masã, m nee vẽeneg t’a Zeova sõngda tõnd fãa, la t’a nong-d lame, n sakd n get d ned kam fãa yelle.”

A Ana goamã kengda raoodo. La bõe n tõe n sõng-y tɩ y kɩs sɩd t’a Zeova wʋmda yãmb yɛlã võore, n mi sẽn be y sũurẽ wã la a tẽegd rẽ yelle? Sõsg ning sẽn pʋgdã pʋgẽ, d na n leoka sok-kãnga.