Welsgã bee zĩig zãnga
Welsgã bee zĩig zãnga
A JONATHAN roagdbã yita Koore, la b rog-a-la Etazĩni. A sẽn wa n yaa bilf menga, a ra neeme tɩ b kisa yẽ a buudã sẽn yaa toorã yĩnga. A sẽn wa n bɩ wã a ra baooda zĩig nebã sẽn pa na n tik a yalẽ wã zug n kao a bʋʋdo. A wa n lebga logtore, n tɩ tʋmd Alaska sẽn be Etazĩni soolmẽ wã. Be nebã wõnda Koore neba. A Jonathan ra tagsdame tɩ be, b pa na n tik a buudã n kisg-a ye.
La daar a yembre, a tɩpa pag sẽn tar yʋʋm 25. Pagã ra sobgame. La a sẽn wa n vʋʋg n yã a Jonathan wã, a tʋʋs-a lame, n pʋd gomd sẽn wilgd t’a kisa Koore nebã. Woto kɩtame t’a Jonathan bãng tɩ baa yẽ sẽn maaneg fãa, a pa tõe n põs bu-welsgã ye.
Bũmb ning sẽn paam a Jonathan wã wilgdame tɩ bʋ-welsgã bee dũniyã ween-vɩɩs a naasã. Yaa wa zĩig ning fãa neb sẽn beẽ, welsg me bee be.
Baa bu-welsgã sẽn be zĩig zãngã, nebã fãa la bal yetame t’a pa sõma ye. La bõe yĩng tɩ bũmb neb wʋsg sẽn kis be zĩig zãnga? Yaa tɩ neb wʋsg tõe n kisa buud a taab neb n yaool n pa miẽ ye. Tõe n yaa woto me ne yãmba.
YELL SẼN PAK NED KAM FÃA
D miime tɩ d pa mi me, yaa toog tɩ d bãng d sã n kisa buud a taab neb bɩ d pa kis-ba. Biiblã wilga bũmb ning sẽn kɩt tɩ yaa woto wã, n yeele: “Ninsaal sũur tara ziri n yɩɩd bũmb fãa.” (Zeremi 17:9) Rẽnd d tõe n yaa bu-wɛls n yaool n tagsdẽ tɩ d nonga neb buud fãa. Tõe me tɩ d tara tags-kɛg buud ning neb zugu, n yaool n tẽed tɩ d tara bʋʋm.
Y sã n kẽnd n segd neb a woto, y yam na gãand bãan sɩda?
Ned tõe n tara tags-kɛg buud ning neb zug n ka miẽ bɩ? D rɩk makre: Yãmb kẽnda y ye yʋngo, tɩ kom-bɩɩs a yi y sẽn zĩ n yã kẽnd n segd-yã. B taa rap zĩigẽ, tɩ yaa wa a ye wã zãada bũmbu.
Yãmb na n tagsame tɩ kom-bɩɩsã tõe n wa maan-y-la wẽng bɩ? Yaa sɩd tɩ ned sã n zoe n maan-y-la wẽnga, y na n gũusame. La rẽ yĩnga woto seka y na tags tɩ kom-bɩ-kãensã na n maan-y-la wẽng sɩda? Bũmb a to sẽn tõe n kɩt tɩ y yɛɛs yaa y sẽn na n bãng b sẽn yaa buud ning nebã. Sã n yaa b sẽn yaa buud ning nebã n kɩt tɩ y yɛɛsdẽ, tõe tɩ yaa y sẽn tar tags-kɛgã yĩnga.
D sã n tags sõma, d mikdame tɩ baa pa wae, d mi n gesa ned yalẽ wall a sẽn yaa buud ning nedã n kao a bʋʋdo. Biiblã meng wilga rẽ n yeel woto: “Ninsaal geta nin sẽn ne.” (1 Sãmwɛll 16:7) Sẽn mik tɩ yaa woto wã, la tɩ rẽ mi n wata ne zu-loeesã, yaa vẽeneg tɩ d rat n basa welsg buud fãa. La rẽ yĩnga d tõe n maana woto bɩ? D tõe n saagame tɩ welsg buud fãa na n wa saame bɩ?
