SEBRÃ GOM-ZUG SÕSGÃ | A ZEOVA KASET RÃMBÃ YAA ÃND DÃMBA?
A Zeova Kaset rãmbã paamda ligdã yɛ n tʋmd b tʋʋmã?
Yʋʋmd fãa, a Zeova Kaset rãmbã yiisda Biibl milyõ-rãmb la sɛb a taaba. D meta Betɛll-dãmba, la ẽnprimeri-rãmb dũniyã gill zugu. D tigimda taab zĩis tusa sẽn be rasãnde, n waoogd Wẽnnaam. D boonda zĩ-kãens tɩ Rĩung roto. Yɛ la d paamd ligdã n tʋmd tʋʋm-kãensã?
Nebã kõta ligd ne yamleoog n teend tõnd tʋʋmdã. (2 Korẽnt-rãmbã 9:7) Yʋʋmd 1879 soabã, Gũusg Gasg a ye pʋgẽ, d yeela woto: “Tõnd kɩsa sɩd t’a ZEOVA n sõngd tɩ d yiisd ‘Le Phare de la Tour de Sion (angl.),’[bɩ Gũusg Gasgã.] Woto wã, d pa na n tol n bõos wall d kos ninsaalbã teelg ye.” Sɩd me, d zɩ n maan a buud ye.
Tõnd toonda d ligdã Betɛllẽ, wall d ning-a kogendã sẽn be d Rĩungã rotã pʋsẽ wã. La d zɩ n yãk ligd sõor n kɩt tɩ ned yao, bɩ n pɩʋʋg ne lepre, wall d koos d sɛbã ye. D moonda koɛɛgã, n wɛgsd sõss tigimsã pʋsẽ, la d sõngd n met Rĩung roto, n pa reegd yaood ye. A Zeezi ra yeela woto: “Yãmb deega zaalem, bɩ y kõ zaalem.” (Matye 10:8) Neb nins sẽn tʋmd Betɛll-dãmbẽ wã, bɩ tõnd biru-kãsengẽ wã, n paas a Zeova Kaset rãmbã Siglgã taoor lʋɩtb Sull neb pa reegd yaood ye.
“Yaa nebã sẽn kõt ligdã ne yamleoogã n sõngd t’a Zeova Kaset rãmbã tõogd n tʋmd b tʋʋmã. Ned fãa n yãkd ligd sõor a sẽn na n kõtẽ, n teel a tũudmã.”—Erop bʋ-kaoodbã sull ning sẽn get ninsaalbã dʋrwa-rãmb yellã, yʋʋmd 2011
Ligdã nebã sẽn kõtã kɩtame me tɩ d tõe n sõng neb nins sabab-wẽns sẽn paamã. Pipi kiris-nebã ra sõngda neb nins sẽn be zu-loees pʋgẽ wã ne yamleoogo. (Rom-dãmbã 15:26) Tõnd me maanda bũmb toor-toor n sõngd neb sabab-wẽns sẽn paame. Wala makre, d lebsd n meta b ro-gãase, b Rĩung roto, la d toond-b rɩɩbo, futu, ne tɩto.
