SEBRÃ GOM-ZUG SÕSGÃ | Y TÕE N WƲMA BIIBLÃ GOAM VÕORE
Bõe yĩng tɩ y tog n bao n wʋm Biiblã goam võore?
“Biiblã yaa tũudum sebr neb wʋsg sẽn mi. La a yaa seb-sãanga, n pa zems ne Sɩn nebã ye.”—A LIN SẼN BE SƖNNÃ.
“Mam pa tõe n wʋm Ẽnduismã sẽn yaa mam tũudmã sɛbã goam võor meng ye. Woto wã, m maanda wãn n wʋm Biiblã goam võore?”—A AMIT SẼN BE ẼNDÃ.
“Mam nanda Biiblã, bala m miime t’a yaa seb-kʋdre. Sẽn paase, m wʋmame tɩ b yetẽ tɩ Biiblã yaa sebr b sẽn koos wʋsgo. La m na n zɩ n yã Biibl ne m nif ye.”—A YUMIKO SẼN BE ZAPÕ WÃ.
Dũniyã gill zugu, neb wʋsg nanda Biiblã. Baa ne rẽ, b tõeeme n pa mi Biiblã sẽn yetã sõma ye. Kẽer meng pʋd n pa mi baa fʋɩ Biiblã zug ye. Yaa woto ne neb milyõ-rãmb sẽn vɩ Aazi soolmẽ wã. Baa tẽns nins pʋsẽ Biiblã sẽn wae wã, neb n pa mi Biiblã sẽn yetã ye.
La tõe tɩ y sok y meng woto: ‘Bõe yĩng tɩ m segd n bao n wʋm Biiblã goam võore?’ Y sã n wʋm Biiblã goam võore, tõe n sõng-y lame tɩ
-
y vɩɩmã tall barka
-
y welg y zakã pʋgẽ zu-loeese
-
y boog y yɩɩrã
-
y tõog tɩ yãmb ne y taabã moor noome
-
y bãng n zã y ligdã sõma
D gom a Yoshiko sẽn be Zapõ wã yelle. A ra baood n bãnga Biiblã sẽn yaa sebr ning buudu. Rẽ n so t’a yãk yam n na n karem Biiblã a toore. A sẽn maan woto wã naf-a lame bɩ? Ad a sẽn yeele: “Biiblã sõnga maam tɩ m vɩɩmã tar barka, la kɩt tɩ m tẽed manegre. Pĩndã, m da getame tɩ m vɩɩmã pa tar võor ye. La masã, pa le yaa woto ye.” A Amit sẽn yaa rao ning yell d sẽn zoe n gomã me yãka yam n na n zãms Biiblã. A yeela woto: “Mam yãame tɩ Biiblã saglsã tõe n nafa ned buud fãa, hal tɩ ling-ma.”
Biiblã manega neb milyõ-rãmb vɩɩm. Yãmb me tõe n bao n bãnga Biiblã sẽn yetã, n ges rẽ sẽn tõe n naf-y to-to.
