Yʋʋmd fãa, a Zeova Kaset rãmbã sẽn be dũniyã gill zugã, n paas neb milyõ-rãmb b sẽn boond naagda taab n maand a Zeezi kũumã tẽegre, wa a yẽ mengã sẽn yeelã. (Luk 22:19) Tigs-kãngã sõngda tõnd tɩ d bãng a Zeezi sẽn ki ãdem-biisã fãa yĩngã yõod sẽn ta zĩig ninga. Tigsgã leb n sõngda tõnd tɩ d bãng a Zeezi sẽn ki tɩ yɩ maoongã sẽn tõe n naf-d to-to masã menga, la beoog daare.—Zã 3:16.

 Yãmb na n naag n maana a Zeezi kũumã tẽegrã rõndã tɩ y pa na n tõog me, wãn to la a Zeezi kũumã sẽn yɩ maoongã tõe n naf yãmba? A Zeezi yeelame tɩ d segd n maana bũmb a yiib sẽn tar yõod wʋsgo:

1.  1. Bao n bãng Wẽnnaam ne a Zeezi. A Zeezi pʋʋsa a Ba sẽn be saasẽ wã n yeel yaa: “Ad vɩɩm sẽn ka sɛtã sore: B segd n bãnga foom f ye bal sẽn yaa Wẽnnaam sɩd-sɩdã, la a Zeezi Kirist fo sẽn tʋm a soabã.”—Zã 17:3.

2.  2. Tũ bũmb nins d sẽn bãngdã. A Zeezi wilgame tɩ yaa tɩlɛ tɩ d tũ bũmb nins a sẽn zãms tõndã d vɩɩmã pʋgẽ. Wala makre, a sẽn wa n sõsd ne nebã tãngã zugu, a sõsgã baasgẽ, a pẽga ned ning fãa sẽn “kelgd [yẽ] goamã la a tũudẽ wã.” (Luk 6:46-48) Daar a to me, a yeelame yaa: “Yãmb sẽn mi bõn-kãensa wã, y sã n maand woto, y yaa sũ-noog rãmba.”—Zã 13:17.

 Y rat n bãnga bũmb a taab n paas Wẽnnaam ne a Zeezi zug bɩ? Yãmb dat n bãnga y sẽn na n maan to-to n tũ bũmb nins y sẽn bãngdã bɩ? Ad bũmb kẽer y sẽn tõe n maan tɩ sõng-yã.

 Tõnd sẽn zãmsd nebã Biiblã zaalmã sõnga neb wʋsg tɩ b bãng Biiblã sẽn yetã la b tũ b sẽn bãngdã b vɩɩmã pʋgẽ.

•   Ges-y tõnd sɩtã pʋgẽ, zĩig ning b sẽn gʋls tɩ Biiblã zãmsg ne a Zeova Kaset soaba, n bãng bũmb a taab n paas rẽ wɛɛngẽ.

•   Ges-y video ning gom-zug sẽn yaa: Ne y waoongo, yãmb sẽn dat n sɩng Biiblã zãmsgã, n bãng a Zeova Kaset rãmbã sẽn zãmsd nebã Biiblã to-to.

 Semen fãa, a Zeova Kaset rãmbã tigimda taab naoor a yiibu, zĩig b sẽn boond tɩ Rĩungã roogo. Tigis-kãensã sasa, d gomda Biiblã yelle, la d sẽn tõe n tũ a noyã la a saglsã to-to d vɩɩmã pʋgẽ.

 Ned buud fãa tõe n waame, baa a soab pa a Zeova Kaset soaba. Sẽn zems ne yɛlã sẽn yaa to-to yãmb babgẽ wã, y tõeeme n kẽng Rĩungã roogẽ n tɩ naag n maan tigisgã, wall y maan ne videokõnferãns maasem.

•   Ges-y video ning gom-zug sẽn yaa: Bõe la b maand Rĩung roogẽ? wã, n deng n bãng bũmb nins d sẽn maand d tigissã sasa.

•   Ges-y tõnd sɩtã pʋgẽ, zĩig ning sẽn yaa: A Zeova Kaset rãmbã tigissã, n bãng tigsg zĩig sẽn pẽ yãmba.

 Sõss la video-rãmb wʋsg sẽn be tõnd sɩtã pʋgẽ tõe n sõng-y lame tɩ y bãng bũmb a taab n paas bũmb nins a Zeezi sẽn zãms tõndã zugu, la a kũumã sẽn yɩ maoongã yõod sẽn ta zĩig ninga.

 Wala makre, y sã n dat n bãng nin-yend kũum sẽn tõe n naf neb milyõ-rãmb to-to, bɩ y karem sõss nins gom-zut sẽn yaa: “A Zeezi yaa fãagda: Rat n yeelame tɩ bõe?” La “Bõe yĩng t’a Zeezi nams la a ki?” pa rẽ bɩ y ges Bõe yĩng t’a Zeezi ki? video wã