SAK A 7
Wẽnnaam Rĩungã yaa bõe?
1. Wẽnnaam soolmã bɩ a Rĩungã yaa bõe?
Bõe n kɩt tɩ yaa a Zezi n tog n yɩ rĩmã?—MARK 1:40-42.
Wẽnnaam Rĩungã yaa goosneema sẽn be saasẽ. A na n wa menesa goosneema rãmbã fãa, la a kɩt tɩ Wẽnnaam daabã maan saasẽ la tẽngã zugu. Woto sɩd yaa koe-noogo. Ka la bilfu, ninsaalbã na n paama goosneem ning b sẽn datã. Wakat kãnga, dũniyã nebã fãa na n zemsa taaba.—Karm-y Daniɛll 2:44; Matɩe 6:9, 10; 24:14.
Rĩung fãa tara a rĩm. A Zeova yãka a biig a Zezi Kirist t’a yaa a Rĩungã rĩma.—Karm-y Wilgr 11:15.
Ges-y video wã Wẽnnaam Rĩungã yaa bõe?
2. Bõe n kɩt tɩ yaa a Zezi n tog n yɩ rĩmã?
Wẽnnaam biigã n sɩd tog n yɩ rĩmã, bala a yaa nin-sõngo, n nong tɩrlem. (Zã 1:14) A tara pãng tɩ sek n tõe n sõng ãdem-biisã, bala yaa saasẽ la a na n zĩnd n dɩ naam tẽngã zugu. A vʋʋgrã poore, a leba saasẽ n tɩ zĩnd a Zeova rɩtgo, n da gũud wakat ning a sẽn na n kõ-a naamã. (Hebre dãmba 10:12, 13) Wakat kãng sẽn wa n ta wã, Wẽnnaam kɩtame t’a sɩng naam dɩɩbo.—Karm-y Daniɛll 7:13, 14.
3. Neb n na n naag a Zezi n dɩ naamã bɩ?
Wẽnnaam yãka neb tɩ b na n dɩ naamã ne a Zezi saasẽ. B boond-b lame tɩ “Sẽn-ka-to neba.” (Daniɛll 7:27) Yɩɩ a Zezi tʋm-tʋmdb nins sẽn kell n sak-a wã la b yãk pipi. La a Zeova ket n yãkda pagb la rap sẽn maand a raabã tɩ b na n tɩ naag-ba. Wa a Zezi, b kũum poore, Wẽnnaam vʋʋgd-b lame tɩ b lebg malɛgs n kẽng saasẽ.—Karm-y Zã 14:1-3; 1 Korẽnt dãmb 15:42-44.
Yaa neb a wãn n na n kẽng saasẽ wã? A Zezi bool-b lame tɩ “wubr pa zemb bũmbu,” rat n yeel tɩ bãg-bila. (Luk 12:32, Sebr Sõngo) B sõorã na n yɩɩ 144 000. B na n dɩɩ naam ne a Zezi dũniyã zugu.—Karm-y Wilgr 14:1.
4. A Zezi sẽn deeg naamã, bõe n maane?
Wẽnnaam Rĩungã lugla yʋʋmd 1914. * A Zezi sẽn deeg naamã, a pipi tʋʋmd yɩɩ a sẽn dig a Sʋɩtãan ne a zĩn-dãmbã tɩ b sig tẽngã zugã. Sʋɩtãanã sũur puugame, t’a wat ne toog zĩig fãa. (Wilgri 12:7-10, 12) Rẽ tɛka, zu-loeesã tara kengre. Zabã, komã, bãasã la tẽn-digimdgã fãa yaa “bãnd” sẽn wilgd tɩ ka la bilfu, Rĩungã na n welga dũniyã yɛl fãa.—Karm-y Luk 21:7, 10, 11, 31.
5. Bõe la Wẽnnaam Rĩungã maanda?
Rũndã-rũndã, b moonda koɛɛg dũniyã gill zugu. Ne rẽ maasem, Wẽnnaam Rĩungã tigimda buud toɛy-toɛy neb kʋʋngo, tɩ zems-n-taar be b sʋka. Neb milyõ rãmb sẽn yaa sik-m-mens rãmb n sakd n lebgd Rĩungã nin-buiidu, t’a Zezi yaa b rĩma. Rĩungã sã n wa na n sãam dũni-kãnga, a na n kogla nin-kãensã. Dẽnd ned sã n dat n paam nafa nins Wẽnnaam Rĩungã sẽn na n wa ne wã, a segd n sakda a Zezi.—Karm-y Wilgr 7:9, 14, 16, 17.
Rĩungã na n dɩka yʋʋm 1 000 n kɩt tɩ Wẽnnaam sẽn da rat tɩ ninsaalbã vɩɩm yɩ to-to wã pidsi. Tẽngã gill na n lebga arzãna. Rẽ poore, a Zezi na n lebsa Rĩungã a Ba wã. (1 Korẽnt dãmba 15:24-26) Yãmb me tõe n togsa neb a taab y sẽn bãng bũmb ning Wẽnnaam Rĩungã zugã.—Karm-y Yɩɩl Sõamyã 37:10, 11, 29.
