SAK A 4
Yãmb mii a Zeezi Kirist bɩ?
1. A Zezi vɩɩmã sɩnga wãn-wãna?
Bõe n kɩt tɩ nebã ra nong a Zezi zĩigẽ?—MATƖE 11:29; MARK 10:13-16.
A Zezi ra yaa malɛk n be saasẽ, n yaool n wa tẽngã zugu. Dẽnd a yɩɩ toor ne ninsaalb a taabã. (Zã 8:23) A yaa Wẽnnaam pipi bõn-naandga, sẽn sõng n naan bũmb fãa. Sẽn yaa Wẽnnaam mengã n naan-a wã yĩnga, b boond-a lame tɩ Wẽnnaam “biig sẽn ka to.” (Zã 1:14) A Zezi yɩɩ Wẽnnaam koe-taasda, rẽ n kɩt tɩ b boond-a me tɩ “Gomdã.”—Karm-y Yelbũn 8:22, 23, 30; Kolos rãmb 1:15, 16.
2. Bõe yĩng t’a Zezi wa tẽngã zugu?
Wẽnnaam dɩka a biigã vɩɩm n ning pʋg-sad sẽn da pa mi rao pʋgẽ, t’a rog-a. Pʋg-sadã ra yaa zʋɩf, t’a yʋʋr la a Maari. Dẽnd a Zezi pa tall ba tẽng zug ye. (Luk 1:30-35) A sẽn wa tẽngã zugã, 1) yaa sẽn na yɩl n zãms nebã sɩdã Wẽnnaam zugu, 2) n wilg tɩ baa namsg pʋgẽ, d tõe n maana Wẽnnaam daabã, la 3) n ki t’a vɩɩmã sẽn zems zãngã yɩ rondo, n yao ãdem-biisã yĩnga.—Karm-y Matɩe 20:28.
3. Bõe yĩng tɩ rondã yaa tɩlae?
Rond tõe n yɩɩ yaood b sẽn yaoode, sẽn na yɩl tɩ ned paam a meng ne yell sẽn tõe n tũ ne a yõore. (Yikri 21:29, 30) Wẽnnaam da pa rat tɩ ninsaalbã kʋʋndẽ la b kiidẽ ye. Bõe n wilgd rẽ? Bala a ra yeela a Ãdem tɩ yaa a sã n kɩɩs yẽ noorã la a na n ki. Dẽnd a sã n da pa kɩɩsẽ, n maan yel-wẽndã, a ra pa na n tol n ki ye. (Sɩngre 2:16, 17; 5:5) Biiblã wilgdame tɩ yaa a Ãdem n kɩt tɩ kũumã beẽ. Yẽ n kɩt tɩ yel-wẽndã long a kambã la a yagensã, tɩ b fãa lebg kiidba. Rẽ n so tɩ rondã lebg tɩlae.—Karm-y Rom dãmb 5:12; 6:23.
Ãnd n da tõe n yao rondã tɩ d paam d mens ne kũumã? Ninsaal sã n ki, a yaoa a meng yel-wẽnã yĩng bala. Ninsaalbã fãa sẽn pa zems zãngã yĩnga, ned ka tõe n yao a to yel-wẽn yĩng ye.—Karm-y Yɩɩl Sõamyã 49:8-10, Sebr Sõngo.
4. Bõe yĩng t’a Zezi ki?
A Zezi ra zemsa zãnga, a pa rog ne yel-wẽndã ye. Dẽnd a sẽn ki wã pa a meng yel-wẽnd yĩng ye. A kũumã yɩɩ yaoodo, neb a taabã yel-wẽnã yĩnga. Wẽnnaam wilga tõnd a nonglem sẽn ka to, a sẽn tʋm a biigã t’a wa ki tõnd yĩngã. A Zezi me wilga tõnd a nonglem, a sẽn sak a Ba wã n wa ki tɩ yɩ rond tõnd yel-wẽnã yĩngã.—Karm-y Zã 3:16; Rom dãmb 5:18, 19.
Ges-y video wã Bõe yĩng t’a Zezi ki?
5. Bõe la a Zezi maand rũndã-rũndã?
A Zezi sẽn wa n be tẽngã zugã, a maaga bãase, n vʋʋg neb sẽn ki, la a sõng neb sẽn da namsde. Woto wilga bũmb nins a sẽn na n wa maan n kõ wẽn-sakdbã. (Matɩe 15:30, 31; Zã 5:28) A Zezi sẽn ki wã, Wẽnnaam vʋʋg-a lame t’a le lebg malɛka. (Efɛɛz rãmba 1:20) A zĩnda a Zeova rɩtg n gũ, hal tɩ ta wakat ning a sẽn kõ-a naam t’a na n soog tẽngã gillã. (Hebre dãmba 10:12, 13) Rũndã-rũndã, a Zezi yaa Rĩm n dɩt naam saasẽ, t’a poorẽ dãmbã moond koe-no-kãng dũniyã gill zugu.—Karm-y Daniɛll 7:13, 14; Matɩe 24:14.
A Zezi sẽn lebg Rĩmã, ka la bilfu a na n sãama nin-wẽnsã, tɩ namsgã sa. Neb nins fãa sẽn sakd a Zezi, n wilgdẽ tɩ b tẽed-a lame wã na n vɩɩmda arzãnã pʋgẽ, tẽngã zugu.—Karm-y Yɩɩl Sõamyã 37:9-11.
