1-3. Daar a ye, a Pɩɛɛr maana kaset ne yel-solemd bʋgo, la baraar yʋngã, bõe la b ra maand hal tɩ pa nana?

A PƖƐƐR bee koom-koglg pʋgẽ ne neb a taaba. Yaa yʋngo. Yẽ me zãada raoog n gaad koomã ne a pãng fãa. A wa n yãa vẽenem sẽn tʋrs yaanga. La rẽ yĩnga, yaa zĩigã n dat n yẽeg bɩ? A sẽn sɩng koomã gaab kaoosame, hal t’a bãgdã fãa zabdẽ masã. Sebgã fugda wʋsgo, n pemd a Pɩɛɛr zoobdã, tɩ Galile mogrã koom me tar gudgr bala. Ko-wiisã wat n wẽeda koglgã taoorã, tɩ koomã sẽn maasã yɩgd n fãeed a Pɩɛɛr tɩ yaa waoodo. Baasgo, a ket n tara koomã gaabo.

² A Pɩɛɛr ne karen-biis a taabã ra basa a Zezi a ye mogrã noore. Baraarã, b ra maana kaset ne a Zezi sẽn dɩlg neb tusa ne bur a wãn la zĩm bilf balã. Nebã sẽn yã rẽ wã, b baoome n na n yõk a Zezi t’a lebg b rĩma, la a sẽn pa rat n kẽ politikã yĩnga, a zãgsame. A ra rat n sõnga a karen-biisã me tɩ b bãng tɩ b pa tog n kẽes b toog politikã yɛlẽ ye. Rẽ n so t’a bas kʋʋngã, la a kɩt t’a karen-biisã kẽ koom-koglgã n tees rʋʋndã, tɩ yẽ mengã kẽng tãngã zug n na n tɩ pʋʋse.—Mark 6:35-45; karm-y Zã 6:14-17.

³ Karen-biisã sẽn wa n loogdẽ wã tɩ kiuugã zẽkame n be zug-tẽn-sʋka, n yaa mumd la bala. Masã wã a kɩllda bilf-bilfu, n be nin-taoor sẽnese. La yaool n nan yaa kilo a wãn bal la koom-koglgã maan-yã. B sẽn modgd n dat tɩ koglgã kẽn tao-tao wã, n paas sebgã sẽn tar fugb tɩ ko-wiisã maand bʋʋrã kɩtame tɩ yaa toog tɩ b sõs ne taaba. Wõnda wakat kãng t’a Pɩɛɛr ra tagsda yɛl sẽn da zoe n maane.

4. Bõe la a Pɩɛɛr modg n base, tɩ yaa mak-sõng d sẽn tog n tũ?

⁴ Bũmb wʋsg n sɩd ra maan tɩ sek a Pɩɛɛr na tags rẽ yelle. Sẽn yɩɩd yʋʋm a yiib woto la a bãng Nazarɛt rao a Zezi. Rẽ tɛkã,  a bãnga bũmb wʋsg sẽn tar yõodo, la nan pa sa ye. Sẽn ketã meng waooga. A ra rata ne a sũur fãa n ket n paasd a bãngrã, tɩ yɩ tɩlae t’a modg n bas rabeem ne sãmbse. Rẽnd a kõo tõnd mak-sõng d sẽn tog n tũ. D na n yãa bũmb ning sẽn kɩt tɩ d yet woto wã.

5, 6. Bilg-y a Pɩɛɛr tʋʋmdã.

⁵ A Pɩɛɛr kõn tol n yĩm daar ning a sẽn bãng a Zezi wã ye. A ba-biig a Ãndere n deng n wa yeel-a woto: “Tõnd yãa Mesi” wã! A Pɩɛɛr vɩɩmã toeeng sɩnga a sẽn wʋm gom-kãensã wã tɛka. Pa na n le wõneg pĩndã baa bilfu.—Zã 1:41.

⁶ A Pɩɛɛr ra vɩɩ Kapɛrnaum sẽn yaa tẽng sẽn be Galile mogrã rɩtgã. Yẽ ne a Ãndere ra tʋmda ne a Zebede kamb a yiibu, a Zak la a Zã. B ra yaa zĩm-yõgdba. A Pɩɛɛr ra tara paga, t’a pagã ma ra be ne-ba, n paas a ba-biig a Ãndere. Yɩl tɩ zĩm-yõgd tõog n ges neb sõor sẽn ta woto yelle, yaa tɩlae t’a tʋm wʋsgo, la a tall minim tʋʋmdã pʋgẽ. Tags-y n ges-y! B ra tʋmda yʋng menga. B kẽeda koomã ne kogend a yiibu, n lob gãmbrã sʋka, n vuug b sẽn yõgã fãa n ning kogendẽ wã n yaool n yi. Rẽ poore, b tog n tũusa zĩmã, la b zĩnd n koose, tɩ gãmba wã sã n pãrs bɩ b sẽ la b maneg tɩ yɩ yolemde. Woto fãa rɩkda sẽk wʋsgo.

7. A Pɩɛɛr wʋma bõe a Zezi zugu, la bõe yĩng tɩ ra yaa kiba-noogo?

⁷ Biiblã yetame t’a Pɩɛɛr ba-biig a Ãndere ra yaa a Zãmbatiis karen-biiga. A Ãndere sã n da wa togsd a sẽn wʋm bũmb ning a Zãmbatiis nengẽ wã, a Pɩɛɛr tog n da kelgda neere. Daar a ye, a Ãndere yãa a Zãmbatiis sẽn tees a Zezi n yeel tɩ “ad Wẽnnaam Pe-bilã.” Wakat kãng tɛka, a Ãndere lebga a Zezi karen-biiga, la tao-tao bala, a tɩ togsa a Pɩɛɛr tɩ Mesi wã waame. Ad yaa kiba-noogo! (Zã 1:35-41) Sẽn na maan yʋʋm 4000, a Ãdem ne a Hawa kɩɩsgã poore, Wẽnnaam a Zeova ra pʋlmame tɩ ned n na n wa, la tɩ nin-kãng na n kɩtame tɩ ãdem-biisã beoog daarã yɩ neere. (Sɩng. 3:15) Yaa fãagd-kãng la a Ãndere sẽn yã wã. Mesi wã meng a toore! Tao-tao bala, a Pɩɛɛr me tũume n na n tɩ bãng a Zezi.

8. A Zezi sẽn kõ a Pɩɛɛr yʋʋr ningã võor yaa bõe, la bõe yĩng tɩ neb kẽer ket n yetẽ tɩ yʋ-kãng pa zems ne-a?

⁸ B ra boonda a Pɩɛɛr t’a Sɩmo. La a Zezi sẽn yã-a wã, a yeel-a lame: “Fo yaa a Zã biig a Sɩmo. B na n boola foo t’a Sefas sẽn dat n togs tɩ kugri.” (Zã 1:42) Sefasã yaa yʋʋr sẽn da wae, t’a võor yaa “kugr” bɩ “pĩiga.” Yaa vẽeneg t’a Zezi sẽn yeelã yaa bãngr-gomde. A ra rat n wilgame tɩ yẽ karen-biisã sʋka, a Pɩɛɛr  na n yɩɩ wa pĩiga, rat n yeel t’a tẽebã na n vigla sõma n pa vigsdẽ, tɩ rẽ kengd a taabã. A Pɩɛɛr ra tagsdame tɩ yẽ na n yɩɩ woto bɩ? Ayo. Neb kẽer sẽn karemd Evãnzillã yetame tɩ b pa ne a Pɩɛɛr sẽn wõnd pĩig zĩig ningã ye. Sãnda yetame meng tɩ sã n yaa ne Biiblã sẽn yet bũmb ningã, wõnda a Pɩɛɛr ra yaa rabɛɛma, la ned yam sẽn yuusdi.

9. Bõe la a Zeova ne a Biigã get tõnd nengẽ n yɩɩda, la bõe yĩng tɩ y tagsdẽ tɩ segdame tɩ d kɩs b sɩda?

⁹ Yaa vẽeneg t’a Pɩɛɛr ra kongda yɛl kẽer pʋgẽ. A Zezi ra mii rẽ. La wa a Ba a Zeova, wakat fãa a Zezi sẽn get n yɩɩdã yaa nebã zʋg-sõma wã. A Zezi yãa zʋg-sõma wʋsg a Pɩɛɛr nengẽ, n dat n sõng-a t’a bɩɩs zʋg-kãens n paase. Rũndã-rũndã me, a Zeova ne a Biigã sẽn get n yɩɩd yaa tõnd zʋg-sõma wã. Tõe n mii n yaa toog ne tõnd mengã tɩ d tẽ tɩ b na n yãa zʋg-sõma tõnd nengẽ. Baasgo, wa a Pɩɛɛre, segdame tɩ d kɩs b sɩda, la d modg n wilg tɩ d yaa neb sẽn sakd tɩ b zãms-do, la sẽn basd tɩ b rems-do.—Karm-y 1 Zã 3:19, 20.

10. Wõnda a Pɩɛɛr maana kaset ne bõe, la baasgo, a basa a Zezi n le tɩ maand bõe?

¹⁰ Wõnda a Pɩɛɛr ra paam n yãaga a Zezi bilf t’a gilg n moon koɛɛgã. Dẽnd tõe t’a Zezi sẽn kẽng yi-kãadem kibs Kana, n tɩ maan a pipi yel-solemd n kɩt tɩ koom lebg rãamã, a Pɩɛɛr zĩnda be. Sẽn tar yõod n yɩɩda, a wʋma Wẽnnaam Rĩungã koe-noogã a Zezi sẽn da taasde, n wilgdẽ tɩ beoog na n yɩɩ neerã. Baa ne rẽ, a wa n basa a Zezi pʋgbo, n le tɩ yõgd a zĩm. La kiis a wãn poore, a Pɩɛɛr wa n le sega a Zezi. So-kãngã, a Zezi yeel-a lame t’a ratame t’a wa tũ yẽ wakat fãa.

11, 12. a) Bilg-y a Pɩɛɛr dãmb sẽn tʋm tʋʋm-toog ning ne yʋngã. b) A Pɩɛɛr sẽn kelg a Zezi wã, tõe t’a tagsa bõe yelle?

¹¹ Baraar t’a Pɩɛɛr dãmb tʋma yʋngã tõr tɩ pa yãk neng ye. B loba b gãmba wã naoor wʋsgo, la b sã n tak n yiis fãa, yaa vɩʋʋgo. A Pɩɛɛr tog n tʋma ne a bãngrã la a minimã fãa, n toeem zĩis meng n lob n mak n konge. Sãmbg kae tɩ wakat ninga, a Pɩɛɛr la zĩm-yõgdb a taabã yam la b kẽ koomã tẽngr n yã zĩmã sẽn tigmẽ wã, wall b maan b sẽn na maan tɩ zĩmã zoe n wa kẽ gãmbrã pʋgẽ. Hakɩka, woto ra komsda a Pɩɛɛr raood n paasdẽ. Pa yamleoog la a Pɩɛɛr ra yõgd zĩmã ye. Yaa rẽ la a ra teeg n get a zakã rãmb yelle. La kaeto, a yasa nug-vɩɩdo. Gãmbrã kãaga yel-yaals t’a segd n yãgse. A sẽn wa n maand rẽ wã la a Zezi ta-yã.

¹² Kʋʋng n da gũbg a Zezi, n kelgd a sẽn yetã neere. Nebã sẽn waoogã, a Zezi kẽe a Pɩɛɛr koglgã pʋgẽ, n kos-a t’a zãag ne  kʋɩl-koakã bilfu. Woto kɩtame t’a koɛɛgã zẽk sõma masã, t’a sõs ne kʋʋngã. A Pɩɛɛr kelga a Zezi sõsgã neere, wa neb a taabã. Yaa Wẽnnaam Rĩungã yell la a ra gomd n yɩɩda. La a Pɩɛɛr yam pa tol n yi rẽ kelgr ye. A sã n da paam n na n sõng a Zezi tɩ koe-no-kãngã ta zĩig fãa, na n yɩɩ zu-zẽkr tɛkẽ! La rẽ yĩnga a na n tõogame bɩ? A na n maana wãn n ket n get a zakã rãmb yelle? Tõe t’a lebg n tagsa b sẽn tʋm yʋngã tõr n pa paam bũmbã.—Luk 5:1-3.

13, 14. Yel-solemd bʋg la a Zezi maan a Pɩɛɛr nafr yĩnga, la a Pɩɛɛr manesem yɩɩ wãna?

¹³ A Zezi sẽn sõs n sɛ, a yeela a Pɩɛɛr woto: “Kẽng-y koomã sʋk n tɩ lob y zĩm-gãmbã n yõg zĩmã.” A Pɩɛɛr yam da yoodame. Rẽ n so t’a yeel yaa: “Karen-saamba, tõnd tʋma yʋngã tɛk n ka tol n yõk bũmb ye. La baoosgo, yãmb sẽn yeelã, mam na n loba zĩm-gãmbrã.” A Pɩɛɛr ra zoe n manega a gãmbrã tɩ yaa yolemde. A ra pa rat lobrã, bala a tẽedame tɩ b pa tõe n paam zĩm wakat kãng ye. La baasgo, a sakame. Tõeeme meng t’a boola a tʋmd-n-taasã tɩ b pʋgl ne koglg a to.—Luk 5:4, 5.

¹⁴ Gãmbrã lebga zɩsg hal tɩ ling a Pɩɛɛre. A sẽn pa tẽed tɩ tõe n yɩɩ zĩmã, a taka ne a pãngã fãa, n yã tɩ yaa zĩm zembal n be be n nugda. A yɛɛsame n kong n bool sẽn pʋgl-b ne koglg a to wã tɩ b wa sõnge. B sẽn wa, b mikame tɩ zĩmã pa kẽed koglg a yembr ye. B pidsa kogend a yiibã fãa, la zĩmã zɩslem kɩtame tɩ kogendã rat n bõre. Rabeem wʋsg yõka a Pɩɛɛre. A ra zoe n yãa Kiristã sẽn maan yel-soalma, la so-kãngã wã, yɩɩ yel-solemd sẽn nafd yẽ ne a zakã rãmba. Tags-y n ges-y! Ned sẽn tõe meng tɩ zĩm wa kẽ gãmba pʋgẽ. A Pɩɛɛr sɩngame n digd ne rabeem. A wõgemda a Zezi taoor n yeele: “Zu-soaba, bas-y maam tɩ mam yaa yel-wẽn soaba.” A tagsame tɩ yẽ pa zems tɩ tũ ned sẽn paamd tɩ Wẽnnaam kõt-a tõog t’a maand woto fãa ye.—Karm-y Luk 5:6-9.

15. Wãn to la a Zezi sõng a Pɩɛɛr t’a bãng t’a pa tar bʋʋm n na n maan sãmbs la rabeem?

¹⁵ A Zezi yeel-a-la woto: “Da zoe rabeem ye. Sẽn sɩng masã, fo na n yɩɩ mam neb baooda.” (Luk 5:10) A Pɩɛɛr pa tog n le maand sãmbs la rabeem ye. A pa le tar bʋʋm n maand yɩɩr ne a sẽn na n maan to-to n ges a meng la a zakã rãmb yell ye. A pa tog n le tagsdẽ me t’a yaa koangda, la t’a pa tar minim sẽn sek  n tõe n moon koɛɛgã ye. Tʋʋmd ning a Zezi sẽn tʋmdã yaa tʋʋm-kãsenga, sẽn na n sõng nebã tɩ b bas b yam tɩ beoog na n yɩɩ neere. Yaa Wẽnnaam ning “sẽn kõt sugr wʋsgã” raab la a maanda. (Ezai 55:7) Dẽnd a Zeova na n gesame t’a Pɩɛɛr paam sẽn yaa tɩlae ne yẽ la a zakã rãmbã, la a sõng-a me t’a tõog n moon koɛɛgã.—Mat. 6:33.

16. A Zezi sẽn bool a Pɩɛɛr ne a Zak la a Zã wã, b maana wãna, la bõe tɩ yam-yãkr le kae n yaa sõma n yɩɩd rẽ?

¹⁶ A Pɩɛɛr saka zĩig pʋgẽ, wa a Zak ne a Zã. Biiblã yeta woto: “Bãmb sẽn tall kogendã n wa koomã noore, bãmb basa fãa n tũ a Zezi.” (Luk 5:11) A Pɩɛɛr wilga a tẽeb ne a Zezi la ne Wẽnnaam ning sẽn tʋm-a wã. Yam-yãkr le kae n yaa sõma n yɩɩd wã ye. Rũndã-rũndã, kiris-neb nins sẽn basd sãmbs la rabeem, sẽn na  yɩl n maan Wẽnnaam daabã wilgda b tẽeb ne-a. Ned sã n teeg a Zeova woto, a pa basd-a ye.—Yɩɩl 22:5, 6.

17. A Pɩɛɛr sẽn bãng a Zezi na maan yʋʋm a yiibã, bõe yell la a ra ket n tẽra?

¹⁷ Wa d sẽn zoe n yeelã, a Pɩɛɛr sẽn wa n be koglgã pʋgẽ ne yʋngã, n zãad raoog n gaad Galile mogrã koomã tɩ sebgã fugdã t’a sẽn bãng a Zezi rat n taa yʋʋm a yiibu. D pa tõe n bãng sẽn da be a yamẽ wã takɩ ye. La d miime bal tɩ yɛl wʋsg n maane, tɩ sek a na tags rẽ yelle. A Zezi sãooga a Pɩɛɛr pagã ma. A sẽn sõs ne nebã tãngã zugã, a Pɩɛɛr zĩnda be. Wakat fãa, a Zezi sẽn zãms nebã bũmb ninsã la a yel-soalmã wilgame tɩ yẽ la Mesi wã, ned ning a Zeova sẽn yãkã. Yaa vẽeneg tɩ tarẽ-n-tarẽ a Pɩɛɛr rabeemã la a sãmbsã wa n boogame. A pʋd n da naaga tʋm-tʋmdb 12 a Zezi sẽn yãkã. Ne rẽ fãa, a mengã na n wa bãngame t’a rabeemã ne a sãmbsã pa sa fasɩ ye.

18, 19. a) Bilg-y a Pɩɛɛr sẽn yã Galile mogrã zugã. b) A Zezi kõo a Pɩɛɛr sor t’a maan bõe?

¹⁸ Tõd-beoogo, sẽn zems wakat a 3, a Pɩɛɛr wa n basa koomã gaab n zĩ kuu. A tool n nee bũmb sẽn kẽnd koomã zugu. Yaa kiuugã vẽenemã n tʋrsd ko-wiisã tɩ wõnd yaa bũmb n wat bɩ? Ayo, pa tõe n yɩ rẽ ye. Bala yaa bũmb sẽn yaa selle. Wõnda neda. Sɩd me, yaa ned la sẽn kẽnd mogrã zug n watẽ wã. A soabã teesa bãmb n watẽ, tɩ yaa wa a na n ta n yõsgame. Karen-biisã yɛɛsa wʋsgo, n tags tɩ yaa zĩna. La a soabã yeel-b-la woto: “Keng-y y sũyã, yaa maam. Da zoe-y rabeem ye.” Ra yaa a Zezi!—Mat. 14:25-27.

¹⁹ A Pɩɛɛr leokame yaa: “Zu-soaba, sã n yaa yãmba, bɩ y kõ maam noor tɩ m kẽn koomã zug n wa yãmb nengẽ.” (Mat. 14:28) Zĩig pʋgẽ wã, a Pɩɛɛr paama raoodo. A sũur yɩɩ noog ne yel-solemdã, t’a bao n na n maan a buud n keng a tẽebã. A Zezi sakame, n yeel-a t’a wa. A Pɩɛɛr gãnga koglgã n na n kẽn mogrã zugu. Tags-y n ges-y a sẽn tabg koomã tɩ yaa wa tẽn-labre, t’a pa bõrd ye. A kẽndame n segd a Zezi, la a yamẽ wã, ne wa pa sɩd ye. A na n kell n talla raood bɩ?—Karm-y Matɩe 14:29.

20. a) Bõe n tiis a Pɩɛɛre, la waa ne yel-bʋgo? b) Bõe la a Zezi yeel a Pɩɛɛre, n na n sõng-a t’a tags neere?

²⁰ A Pɩɛɛr da segd n kell n gesa a Zezi, n da bas tɩ bũmb tiis-a ye. Yaa a Zezi n da kɩt t’a Pɩɛɛr kẽnd ko-wiisã zug baa ne sebgã, la yaa ne tõog ning a Zeova sẽn kõ-a wã. A Zezi sẽn sak n maan woto wã yaa a Pɩɛɛr sẽn wilg t’a tẽed-a lame wã yĩnga. La a Pɩɛɛr basame tɩ bũmb tiis-a. Kibarã yetame: “A Pɩɛɛr sẽn yã tɩ sebgã  yaa wʋsgo, rabeem yõka yẽnda.” A gesa sebgã sẽn lengd ko-wiisã tɩ wat n wẽed koglgã tɩ maand puudã, n yɛɛse. Tõe t’a zoe n ninga a yamẽ t’a bõrdame, n sigd koomã tẽngre. A rabeemã paasame, t’a tẽebã booge. Rao ning a Zezi sẽn bool tɩ pĩiga, a sẽn da na n yɩ ned tẽeb sẽn vigl sõma n pa vigsdẽ wã yĩngã sɩngame n bõrd wa kug-zaalle, bala a basame t’a tẽebã komse. A Pɩɛɛr ra mii koom dugb sõma, la a pa teeg rẽ n na n yi yellã pʋgẽ ye. A kelmame n yeele: “Zu-soaba, fãag-y maam!” A Zezi gãda a nugã n tak-a n yiisi. B sẽn wa n ket koomã zugã, a yeela a Pɩɛɛr gomd sẽn na n kɩt t’a tags neere. A yeela woto: “Tẽeb bilf soaba, yaa bõe tɩ fo yam yoaada?”—Mat. 14:30, 31.

21. Bõe yĩng tɩ sãmbs tõe n wã neda, la wãn to la d tõe n mao tɩ b ra tõog-do?

²¹ A Pɩɛɛr ‘yamã sẽn da yoodã’ n sɩd da yaa yellã. Yam-yoog tõe n wãa neda. D sã n bas tɩ d yamã yuusdẽ, tõe n komsa d tẽebã bilf-bilfu, hal n wa sãam d zoodã ne a Zeova. Rẽnda d mao sẽn na yɩl n da bas tɩ sãmbsã tõog-d ye. Wãn to? Yaa d sẽn na n tagsd bũmb nins sẽn tõe n sõng-dã yelle. D sã n tagsd bũmb nins sẽn kõt rabeemã yelle, bũmb nins sẽn komsd raoodã, wall sẽn tõe n tiis-d tɩ d pa tõog n sak a Zeova ne a Biigã, na n paasda d sãmbsã. D sã n teeg a Zeova ne a Biigã, n tagsd b sẽn zoe n maanã yelle, b sẽn ket n maandã, la b sẽn na n wa maan n kõ sẽn nong-b bãmbã, na n kɩtame tɩ sãmbsã ra tõog-d ye.

22. Bõe yĩng tɩ yaa sõma tɩ y rɩk a Pɩɛɛr togs-n-taare?

²² A Pɩɛɛr sẽn tũ a Zezi tɩ b kẽ koglgã, sebgã yõkame. Galile mogrã lebga sɩddd. A Pɩɛɛr ne karen-biis a taabã naaga taab n yeel woto: “Yãmb sɩd yaa Wẽnnaam Biiga.” (Mat. 14:33) Beoogã sẽn wa n vẽegdẽ wã, a Pɩɛɛr sũurã ra tog n pida ne mi-beoogo. A basa sãmbsã la rabeemã fasɩ. Baasgo, sẽn na yɩl n yɩ kiris-ned sẽn sɩd wõnd pĩig wa a Zezi sẽn yeelã, a ket n segd n mao n toeemame. La a sɩd ra rata ne a sũur fãa n toeeme. Yãmb me rat n maana woto bɩ? Sã n yaa rẽ, y na n mikame tɩ yaa sõma tɩ y rɩk a Pɩɛɛr togs-n-taare, n tall a tẽebã buudu.