1-3. a) Bõe n naan n wa ne yel-beed a Abigayill zakã rãmb zugu? b) Bõe la d na n bãng pʋg-kãngã zugu?

A ABIGAYILL neeme tɩ rabeem kãseng n tar tʋm-tʋmdã. La pa zaalem ye. Yel-beed n wate, bala sodaas sõor sẽn ta 400 n dɩk sore, n wat n na n kʋ rap nins fãa sẽn be a Abigayill sɩd a Naball zakẽ wã. Bõe yĩnga?

² Rẽ fãa yaa a Naball yelle. A yaa nin-toaag la ned sẽn nong n paoogd a taabã. La so-kãngã yẽ, a sẽn paoog rao ningã pa nin-yaar ye. Yaa rao sẽn tar sodaas sẽn nong-a wʋsgo, la sẽn mi zabr sõma. A Naball tʋm-tʋmd a ye sẽn yaa pe-kɩɩm n zoe n tɩ togs a Abigayill, n saagdẽ t’a na n yãa yellã tɩɩm n fãag-ba. La pag tõe n maana bõe sodaas kʋʋng taoore?

³ Pipi, d bao n bãng yɛl kẽer a Abigayill zugu. Pʋg-kãngã yɩɩ nin-bʋg buudu? Yellã sɩnga wãn to? La a sẽn tall tẽeb to-to wã zãmsda tõnd bõe?

4. A Naball ra yaa nin-bʋg buudu?

⁴ A Abigayill kãadmã pa tall neng ye. A Naball paama pʋg-sõngo, la a Abigayill yẽ pa paam sɩd-sõng baa bilf ye. A Naball yaa ra-kãagre. Rẽ n so t’a get a meng wa nin-kãsenga. La neb a taabã yẽ ra get-a-la woto bɩ? Biiblã pʋgẽ, b pa gom n sãbs ned wa b sẽn gom n sãbs a Naball to-to wã ye. A yʋʋrã meng võor yaa “yalma.” D pa mi sã n yaa a roagdbã n kõ-a yʋ-kãngã, bɩ yaa a manesem wẽngã yĩng n kɩt tɩ nebã ra boond-a woto ye. Sẽn yaa a soab fãa, a saka a yʋʋrã. A Naball ra “yaa nin-wẽnga, n ka maand neer ye.” A ra yaa rã-yũud la nin-toaaga, tɩ nebã fãa ra zoet-a, n pa nong a zĩigẽ ye.—1 Sãm. 25:2, 3, 17, 21, 25.

5, 6. a) A Abigayill zʋg-sõma kẽer la bʋse? b) Tõe tɩ yaa bõe n kɩt t’a Abigayill wa kẽ kãadem ne nin-yoog a Naballe?

 ⁵ A Abigayill yẽ ra yaa toor fasɩ. A yʋʋrã võor yaa: “M ba nooga a meng sũuri.” Rao sã n yã t’a bi-pugl yaa neere, a sũur yaa noogo. La ba sẽn tar yam sũur yaa noog n yɩɩda, a sã n yã t’a biigã tara zʋg-sõma. Naoor wʋsgo, ned sã n yaa neere, tõe n kɩtame t’a pa get tɩ tara yõod t’a yɩ gũusda, yam soaba, bɩ ned sẽn tar raood wall tẽeb ye. La a Abigayill yẽ ra pa tagsd woto ye. Biiblã pẽg-a lame n wilg t’a yaa pag sẽn tall yam, la sẽn da yaa neer me.—Karm-y 1 Sãmwɛll 25:3.

⁶ Tõe tɩ kẽer sokda b meng sɩnga wãn tɩ pʋg-sad sẽn tar yam woto kẽ kãadem ne nin-yoogo. Pĩndã, naoor wʋsgo yaa roagdbã n da baood sɩd bɩ pag n kõ b biiga. Baa pa rẽ, biig ra pa kẽed kãadem tɩ pa a roagdbã n kõ-a sor ye. Rẽ yĩnga, yaa a Naball sẽn da yaa ra-kãagr la ned yʋʋr sẽn yi wã n yɩ a Abigayill roagdbã noog tɩ b sak tɩ b biigã kẽ kãadem ne-a bɩ, bɩ yaa bãmb sẽn da yaa naong rãmb yĩnga? Sẽn yaa to-to me, a Naball ra tara ligdi, la a pa yɩ sɩd-sõng ye.

7. a) Roagdb sã n dat n sõng b biig t’a tall tagsg sẽn zems kãadmã zugu, b segd n gũusa ne bõe? b) Bõe la a Abigayill yãk yam n na n maane?

⁷ Roagdb sẽn tar yam sõngda b kambã tɩ b tall tagsg sẽn zems kãadmã zugu. B pa na n sagl-b tɩ b kẽ kãadem ligd yĩng ye. B pa na n pẽdg-b me tɩ b kẽ kãadem tɩ b yaool n paoodẽ, n pa tõe n zã zak ye. (Koɛ. 5:2-5) Baa a Abigayill sã n da tagsd rẽ yell me, tɩɩm kae ye. A ra zoe n kẽe kãadem ne a Naball. La baasgo, a yãka yam n na n yɩ pʋg-sõngo.

8. Yaa ãnd la a Naball sẽn tʋʋsã, la bõe yĩng tɩ d tõe n yeel tɩ yaa yalemdo?

⁸ A Naball sẽn bolg yell ningã kɩtame t’a Abigayill sũurã maneg n sãame. Wẽn-sakd a Davɩɩd la a sẽn tʋʋsã. Yaa yẽ la no-rɛɛs a Sãmwɛll zaeyã, tɩ wilgdẽ tɩ Wẽnnaam yãk-a lame t’a na n deeg rĩm a Sayull zĩig n dɩ naam. (1 Sãm. 16:1, 2, 11-13) Sũ-kiir yõka a Sayull t’a baood a Davɩɩd n na n kʋ. Rẽ n so t’a Davɩɩd ne a sodaas 600 zoe n tɩ be rasempʋɩɩgẽ wã.

9, 10. a) Bõe yĩng t’a Davɩɩd ne a sodaasã vɩɩm ra yaa toogo? b) Bõe yĩng t’a Naball ra segd n wilg a Davɩɩd ne a sodaasã a mi-beoogo? (Ges-y sull 10 vẽnegrã sẽn be tẽngrã.)

⁹ A Naball ra vɩɩ Maon, n kẽnd Karmell sẽn pa zãr ne be wã n tʋmdẽ, bala wõnda a ra tara pʋt be. * Yam-maas ra bee  tẽn-kãensã pʋgẽ, tɩ piisã gʋʋlg ra sakd sõma, t’a Naball piisã ta 3000. La tẽn-kɩremsã fãa ra pa sakd kood ye. Goabg yaa Parã rasempʋɩ-kẽengã, tɩ sẽn teesd Yamsem mogrã yaa tãens la londo. Beenẽ vɩɩm pa nana ye. Yaool n yaa be la a Davɩɩd ne a sodaasã zoe n tɩ soonde, n da tãoosd sẽn na yɩl n paam dɩɩbo, la b maood ne zu-loees a taaba. A Davɩɩd ne a sodaasã ra nong n segda a Naball pe-kɩɩmbã be.

¹⁰ Manesem bʋg la a Davɩɩd sodaasã sẽn mi zabr sõma wã ra tar ne pe-kɩɩmbã? B ra tõe n maand-b-la pãng n yãkd piis kẽere. La b pa maan woto ye. B pʋd n da kogenda pe-kɩɩmbã ne b piisã fãa. (Karm-y 1 Sãmwɛll 25:15, 16.) Pe-kɩɩmbã ne b piisã ra mi n paamda yɛl weoogẽ wã, bala we-rũms sẽn tõe n yõg piisã ra bee be. Sẽn paase, Israyɛll todsã sẽn da pa zãr ne be wã yĩng kɩtame tɩ wagda la fãadb ra nong n namsd pe-kɩɩmbã. *

11, 12. a) A Davɩɩd sẽn tʋm neb a Naball nengẽ wã, wãn to la a wilg t’a waoog-a lame? b) Bõe yĩng t’a Naball sẽn leok a Davɩɩd to-to wã pa zemse?

¹¹ Yɩl n tõog n dɩlg neb kʋʋngã rasempʋɩɩgẽ wã pa nana ye. Rẽ n so t’a Davɩɩd wa tʋm neb piig tɩ b kẽng a Naball nengẽ n bõos sõngre. A sẽn tʋm-b wakat ningã zemsame, bala yaa wakat kãng la nebã wõrsd b piisã kõbdo. Sasa kãngã, b kõta taab kũun la b naagd taab n maand sũ-noogo. A Davɩɩd maaga a yĩng me n bao gom-nood a nebã sẽn tog n tɩ yeel a Naball. A pʋd n yeel-b lame tɩ b tɩ yeel-a t’a “biig a Davɩɩd” n tʋm-ba. Tõe tɩ yaa sẽn na n waoog a Naball a sẽn kẽem yẽ wã yĩnga. A Naball leokame tɩ bõe?—1 Sãm. 25:5-8.

¹² A sũurã yikame. Tʋm-tʋmd ning sẽn da gomd ne a Abigayillã yeelame t’a Naball “waag-b-la no-beedo.” A zãgsa fasɩ t’a pa na n kõ-b a rɩɩbã, a koomã la a nemdã ye. A yaala a Davɩɩde, n yeel t’a yaa yamb sẽn bas a zu-soab n zoetẽ. Tõe t’a kisga a Davɩɩd wa a Sayull sẽn kisg-a to-to wã. B baa a ye ra pa get a Davɩɩd wa a Zeova sẽn da get-a to-to wã ye. Wẽnnaam da pa get a Davɩɩd wa yamb sẽn yaa tõat ye. A ra nong-a lame, n miẽ t’a na n lebga Israyɛll rĩma.—1 Sãm. 25:10, 11, 14, Sebr Sõngo.

13. a) A Davɩɩd sẽn wʋm a Naball sẽn yeelã, a yãka yam n na n maan bõe? b) Goam nins sẽn be Zak 1:20 wã sõngda tõnd tɩ d bãng bõe?

 ¹³ Nebã sẽn wa n togs a Davɩɩd a Naball sẽn yeelã, a sũurã yikame t’a yeel a sodaasã tɩ b sẽb b sʋʋse. A Davɩɩd me sẽbga a sʋʋga, tɩ yẽ ne sodaas 400 na n tɩ zab ne a Naballe. A wẽename t’a na n kʋʋ rap nins fãa sẽn be a Naball zakẽ wã. (1 Sãm. 25:12, 13, 21, 22) A Davɩɩd sũurã sẽn yikã, a bee bʋʋm. La a sẽn yãk yam n na n maan bũmb ningã pa sõma ye. Biiblã yetame tɩ “ninsaal sũ-yikr ka wat ne Wẽnnaam tɩrlem ye.” (Zak 1:20) Bõe la a Abigayill na n maan n fãag a zakã rãmba?

14. a) Bõe la a Abigayill maane, tɩ zoe n yaa bũmb sẽn na n fãag a zakã rãmba? b) Bõe n kɩt t’a Naball ne a Abigayill manesmã yaa toor-toore, la zãmsda tõnd bõe?

¹⁴ A Abigayill manesmã yaa toor ne a sɩdã. A mii ned kelgre. A sẽn maag a yĩng n kelg tʋm-tʋmdã zoe n yaa bũmb sẽn na n fãag a zakã rãmba. Tʋm-tʋmdã pʋd n yeelame t’a Naball “yaa nin-wẽng hal tɩ ned ka tõe n gom ne-b ye.” (1 Sãm. 25:17) Sɩd me, a Naball wuk-m-mengã kɩtame t’a pa kelgd ned ye. Rũndã-rũndã me, wʋsg yaa tɩta-neba. La a Naball tʋm-tʋmdã ra miime t’a Abigayill pa woto ye. Rẽ n so t’a tɩ togs-a yellã.

15, 16. a) Wãn to la a Abigayill wilg t’a yaa wa pʋg-sõng ning yell b sẽn gom Yelbũn sebrã pʋgẽ wã? b) Bõe yĩng tɩ d tõe n yeel t’a Abigayill pa kɩɩs a sɩdã zu-sobendã?

¹⁵ A Abigayill sẽn wʋm yellã, zĩig pʋgẽ a bãnga a sẽn na n maanega. B yeelame t’a “yika tao-tao.” Kibarã pʋgẽ, yaa naoor a naas la b yeel t’a Abigayill maana “tao-tao.” A baoo bũmb n na n tɩ kõ a Davɩɩd ne a nebã. A yãka buri, rãam, nemdo, ka-sãrdɩ, sib-gĩn la kankam koeemse. Vẽenega, a Abigayill da geta a zakã yell sõma, n da mi a sẽn tar bũmb ninga. A yaa wa pʋg-sõng ning yell b sẽn gom Yelbũn sebrã pʋgẽ wã. (Yel. 31:10-31) A kɩtame t’a tʋm-tʋmdbã reng taoor ne rɩbdã, tɩ yẽ meng pʋgl poorẽ. La b yeelame t’a “ka wilg a sɩd a Naball ye.”—1 Sãm. 25:18, 19.

 ¹⁶ A Abigayill sẽn maan bũmb ningã yaa a sɩdã zu-sobend kɩɩsg bɩ? Ayo. D tẽeg t’a Naball tʋʋsa a Zeova tʋm-tʋmd a sẽn zae, tɩ rẽ ra tõe n yɩ sabab t’a Naball zakã nebã sẽn da pa tar taalã ki. La a Abigayill sã n da pa maanẽ bũmbu, rẽ yĩnga a ra na n naaga a sɩdã n paam taal bɩ? Yel-kãngã pʋgẽ, a ra segd n saka a Wẽnnaamã n yɩɩd a sɩdã.

17, 18. a) A Abigayill sẽn seg a Davɩɩdã bõe la a maane? b) Bõe la a Abigayill yeel a Davɩɩde, la bõe yĩng t’a goamã kẽ-a?

¹⁷ Pa kaoos la a Abigayill ta a Davɩɩd ne a sodaasã nengẽ ye. Zĩ-kãngã yɛsa, a yɩɩ tao-tao n sig a bõangã zugu, n fõgen a neng tẽng a Davɩɩd taoore. (1 Sãm. 25:20, 23) A togsa a Davɩɩd sẽn be a sũurẽ, la a bõos-a t’a zoe a sɩd a Naball ne a zakã rãmb nimbãanega. Bõe yĩng t’a Davɩɩd ra pa tõe n pa sak a kosgã?

¹⁸ A Abigayill yeelame tɩ yel-kãngã pʋgẽ yẽ n konge, la a kos sugri. A mengã sak n deegame t’a sɩdã yaa yalma, wa a yʋʋrã sẽn dat n yɛɛlgã. Tõeeme t’a ra ratame t’a Davɩɩd bãng t’a sã n sɩbg ned a woto, a na n sãama a yʋʋr zaalem. A wilgame t’a kɩsa sɩd t’a Davɩɩd yaa a Zeova tʋm-tʋmda, la t’a zabda “Zu-soabã zaba.” A sẽn yeel tɩ “Zu-soabã sã n . . . kɩt tɩ y lebg Israyɛll naabã,” wilgdame me t’a ra miime t’a Zeova pʋlma a Davɩɩd naam. Sẽn paase, a yeela a Davɩɩd t’a ra maan bũmb sẽn na n kɩt t’a paam zɩɩm samde, bɩ sẽn na n kɩt t’a sũur-kasetã wa ningd-a taal ye. (Karm-y 1 Sãmwɛll 25:24-31.) Gom-nood tek woto!

19. A Davɩɩd sẽn kelg a Abigayill goamã a manesem yɩɩ wãna, la bõe yĩng t’a pẽg-a?

¹⁹ La a Davɩɩd manesem yɩɩ wãna? A saka a Abigayill kũunã n yeel-a woto: “Bɩ Israyɛll Zu-soab a Wẽnnaam sẽn tʋm foom tɩ f wa seg maam rũndã wã paam pẽgre. Bark Wẽnnaam f yamã yĩnga. Fo gɩdga maam tɩ m ka raag ned zɩɩm ye.” A Davɩɩd pẽga a Abigayill a sẽn tall raood n yɩ tao-tao n seg yẽ wã. A sak n deegame t’a kɩtame t’a ka paam zɩɩm samd ye. A sika a meng n yeel-a woto: “Lebg n kuil ne laafɩ tɩ m kelga f koɛɛgã.”—1 Sãm. 25:32-35.

20, 21. a) Bõe yĩng t’a Abigayill sẽn lebg n kẽng a sɩdã nengẽ wã sek pẽgre? b) Wãn to la a Abigayill wilg t’a tara raood la yam?

²⁰ A Abigayill sẽn lebg n loogã, sãmbg kae t’a ra ket n tagsda a sẽn seg a Davɩɩdã yell ye. A yãame t’a Davɩɩd sẽn yaa nin-sõng la wẽn-sakdã yaa toor fasɩ ne yẽ sɩd a Naball sẽn yaa  nin-toaagã. La a pa na n tall rẽ yell tagsg ye. B yeelame t’a ‘lebg n leba a Naball yirã.’ Sɩd me, a leba a sɩdã nengẽ n na n kell n maan a sẽn tõe fãa n yɩ pʋg-sõngo, baa sẽn pa nana ne-a wã. La rẽnda a togs a sɩdã t’a talla kũun n tɩ kõ a Davɩɩd ne a nebã, bala yaa yẽ la zakã soaba. Sẽn paase, a tog n kɩtame t’a sɩdã bãng tɩ yel-beed n da na n paam a zakã rãmba, t’a ra wa bãng a toor tɩ yãnd yõk-a ye. La a nan pa tõe n togs-a ye. Bala a sɩdã ra maanda kibs wa rĩm kibsa, hal n yũ rãam n tɩge.—1 Sãm. 25:36.

²¹ A Abigayill kell n talla raood la yam n bas tɩ beoogã vẽege, tɩ rẽ, a Naball rãamã sã n yi t’a gom ne-a, a na n bãnga bũmb ning a sẽn maan n fãag-a wã. La a yaool n tõe n lebga toaag n yɩɩd pĩnda. Baasgo, a Abigayill togs-a-la yellã fãa, n miẽ t’a sũurã na n puuga ne-a, la t’a tõe n pãb-a lame. La a sẽn togs a Naball yellã, a kell n paa sɩɩ.—1 Sãm. 25:37.

22. Bõe n paam a Naballe, la sõngd-d lame tɩ d bãng bõe?

²² Bõe n paam a Naballe? A “pɛleng yɩkame t’a sobg n lebg wa kugri.” Tõeeme tɩ yaa sũur bãag n yik-a. Rasem piig poore, a kiime. D pa tõe n yeel tɩ yaa bãag bal ye. Bala kibarã yeelame tɩ “Zu-soabã wẽ a Naball t’a ki.” (1 Sãm. 25:38) A Zeova sẽn kʋ-a wã, a Abigayill paama a meng ne a kãadmã sẽn da pa lebd be wã. Rũndã-rũndã, baa a Zeova sã n pa maand yel-solemd a woto, a Naball kibarã sõngda tõnd tɩ d bãng t’a Zeova nee namsg buud fãa nebã sẽn paamd b zagsã pʋsẽ wã. A sẽn yãk wakat ningã sã n ta, a remsda yɛlã.—Karm-y Luk 8:17.

23. Bark bʋg la a Abigayill paame, la bõe n wilgd tɩ rẽ pa kɩt t’a toeeme?

²³ A Abigayill paama a meng ne a kãadmã sẽn da pa lebd be wã. La a paama bark me. A Davɩɩd sẽn wʋm a Naball kũumã, a tʋma neb tɩ b tɩ yeel a Abigayill t’a rat-a lame n maan a paga. La a Abigayill yeela woto: “Ad maam, yaa bãmb n so maam. Mam na n tũume n tɩ waas b tʋm-tʋmdbã naoã.” A Abigayill pa wuk a menga, a sẽn bãng t’a na n lebga a Davɩɩd pagã ye. A pʋd n yeelame t’a na n tɩ waasda a tʋm-tʋmdbã nao. So-kãngã  yɛsa, b yeelame t’a yika tao-tao n kẽng a Davɩɩd nengẽ.—1 Sãm. 25:39-42.

24. Zu-loe-bʋs la a Abigayill paame, la wãn to la a sɩdã la a Wẽnnaamã ra get-a?

²⁴ Woto pa rat n yeel t’a Abigayill sẽn kẽ kãadem ne a Davɩɩdã, b pa na n paam zu-loees ye. A Davɩɩd ra zoe n kẽe kãadem ne a Asinoam. Baa ne Wẽnnaam sẽn da bas tɩ rao tõe n kẽ kãadem ne sẽn yɩɩd pag a ye wã, ra pa nana ne pagb nins sẽn yaa wẽn-sakdbã ye. Sẽn paase, a Davɩɩd ra nan pa rĩm ye. Nand t’a reeg naamã, a ra maooda ne zu-loees toor-toore. La a Abigayill sẽn kell n pa ne a Davɩɩd n sõng-a, n tol n dog bi-ribl n kõ-a wã, a bãngame t’a paama sɩd sẽn nong-a, la sẽn kogend-a. Daar a ye menga, a Davɩɩd fãag-a-la bɛɛb nugẽ. (1 Sãm. 30:1-19) A Davɩɩd rɩka a Zeova togs-n-taare, bala a Zeova nanda pagb nins sẽn tar yam ne raoodo, la b yaa wẽn-sakdbã.