Baasg sõsga
“Bɩ y modg n yɩ neb nins sẽn paam kãabgo, tẽeb ne sũ-mar yĩngã togs-n-taase.”—HEBRE DÃMB 6:12.
1, 2. Bõe yĩng tɩ yaa tɩlae tɩ d modg n tall tẽeb rũndã-rũndã ? Rɩk-y makre.
HAKƖKA, ned sã n tar tẽeb ne Wẽnnaam, yaa bõn-sõng tɛkẽ. La d sã n wʋm tɩ b gomd tẽeb yelle, yɩta sõma tɩ d tẽeg tɩ yaa yãgb yelle. Sɩd me, sã n mik tɩ y pa tar tẽebo, yaa tɩlae tɩ y modg n paam-a tao-tao. Y sã n tara tẽeb me, yaa tɩlae tɩ y ges a yell sõma, n da maan laas-laas t’a wa sãam ye. Bõe yĩng tɩ d yet woto?
2 D rɩk makr wa yãmb sẽn na n togd sore, n pãrgd rasempʋɩ-kẽenga, tɩ ko-yũudã wʋm-yã. Y sã n wa paam koom, y tog n bĩnga sõma, n da sãam-a ye. Yaa tɩlae me tɩ y ket n gẽesdẽ, tɩ y sã n yã koom bɩ y yãk n paase, tɩ ra wa sa tɩ y nan ka ta y sẽn dabdẽ wã ye. A Zeova tũubã wɛɛngẽ, dũni ning pʋgẽ tõnd sẽn vɩ wã yaa wa rasempʋɩ-kẽenga, tɩ tẽeb hakɩkã yaa wa koom, n pa wae, n le tõe n sãam tao-tao. Rẽ n so tɩ d segd n kogl d tẽebã la d modg t’a paasdẽ. Yaa tɩlae, bala wa d sẽn pa tõe n vɩ n pa yũud koomã, d sã n pa tar tẽeb me, d pa tõe n paam a Zeova zood ye.—Rom 1:17.
3. a) Bõe la a Zeova maan n na n sõng-d tɩ d bɩɩs d tẽebã? b) Bũmb a yiibã d sẽn pa segd n yĩmã la bʋse?
3 A Zeova miime tɩ tẽeb yaa tɩlae ne-do. A miime me tɩ tõog n bɩɩs d tẽebã la d kell n kogl-a yaa bũmb sẽn pa nana. Rẽ n so t’a kɩt tɩ b gʋls neb kibaya, tɩ d tõe n dɩk b togs-n-taare. A Zeova vẽnega tʋm-tʋmd a Poll t’a yeel woto: “Bɩ y modg n yɩ neb nins sẽn paam kãabgo, tẽeb ne sũ-mar yĩngã togs-n-taase.” (Heb. 6:12) Yaa rẽ n so me tɩ tʋm-tʋmd sẽn tũud sɩdã sagend tõnd tɩ d modg n tall pagb la rap nins yell d sẽn gom seb-kãngã pʋgẽ wã tẽebã buudã. La bõe la d tog n maan masã? Bũmb a yiib la d pa segd n yĩmi. Pipi, yaa tɩlae tɩ d ket n bɩɩsd d tẽebã. Yiibu, kãab-noodã d sẽn gũudã segd n yaa vẽeneg d yamẽ.
4. Bõe n wilgd t’a Sʋɩtãan pa rat tɩ d tall tẽebo, la bõe yĩng tɩ d pa segd n koms raoodo?
4 D ket n bɩɩsd d tẽebã. A Sʋɩtãan pa tol n dat tɩ d tall tẽeb ye. A sẽn yaa dũni-kãngã naabã, a kɩtame tɩ tẽebã yaa bũmb sẽn pa wae, tɩ yɩl n kell n tall d tẽebã pa nana ye. A Sʋɩtãan pãng yɩɩda tõnd zĩig sẽn zãre. La rẽ tog n komsa d raood tɩ d pa bao n na n tall tẽeb la d bɩɩs-a bɩ? Ayo! Ned sã n modgd n na n paam tẽeb hakɩkã, a Zeova yaa nin-kãng zoa meng-menga. A yetame tɩ d bas d yam t’a sã n be ne-do, d na n tõog n kɩɩsa a Sʋɩtãana, hal t’a zoe n zãage. (Zak 4:7) Sẽn na yɩl n kɩɩs-a, d tog n bɩɩsda d tẽebã daar fãa. Wãn to la d tõe n maan dẽ?
5. Wẽn-sakdb nins yell Biiblã sẽn gomdã maana wãn n paam tẽebo?
5 Pagb la rap nins sẽn tall tẽeb tɩ Biiblã gomd b yellã pa rog ne tẽeb ye. B yaa kaset tɩ yaa a Zeova vʋʋsem sõngã n sõngd ned t’a paam tẽebo. (Gal. 5:22, 23) B pʋʋsa a Zeova, n teeg-a, t’a Zeova me sɩd sõng-b tɩ b bɩɩs b tẽebã. Bɩ tõnd me maan wa bãmba. D ra tol n yĩm tɩ d sã n pʋʋs a Zeova n kos a vʋʋsem sõngã, la d modg n tʋm tɩ zems d kosgã, a Zeova na n sɩd kõ-d lame ye. (Luk 11:13) La bõe la d tõe n maan n paase?
6. Bõe la d tõe n maan tɩ Biiblã kibayã kareng naf-d sõma?
6 Pa pĩnd wẽn-sakdb nins sẽn tall tẽeb hakɩkã fãa yell la d sẽn gom seb-kãngã pʋgẽ wã ye. D sẽn pa gom b rãmb yellã waoogame. (Karm-y Hebre dãmb 11:32.) D sã n maag d yĩng n karem b ned kam fãa kibarã la d bʋgs a zugu, na n naf-d lame. D sã n karemd wẽn-sakdbã kibay sẽn be Biiblã pʋgẽ wã var-vare, pa na n sõng-d tɩ d bɩɩs tõnd mengã tẽebã ye. Sẽn na yɩl tɩ Biiblã kibar kareng naf-do, d segd n maaga d yĩng n vaees n bãng yɛlã sẽn da yaa to-to wakat kãngã. D sã n tẽegd wakat fãa tɩ wẽn-sakdb kãensã yɩɩ ‘ninsaalb wa tõndo,’ b kibayã na n lebga vẽeneg d yamẽ. (Zak 5:17) D sã n ning d meng b zĩigẽ, d na n tõog n bãnga b zu-loeesã sẽn wõnd tõnd rẽndã, la d bãng sẽn nams-b to-to.
7-9. a) Bõe yĩng tɩ d yetẽ tɩ pĩnd wẽn-sakdbã sã n da paam tɩ bũmb nins b sẽn da segd n maanã wõnd tõnd sẽn maandã, b sũur da na n yɩɩ noogo? b) Bõe yĩng tɩ d tog n bɩɩsd d tẽebã ne d tʋʋm-tʋmdɩ wã maasem?
7 D tõe n bɩɩsda d tẽebã ne d tʋʋm-tʋmdɩ wã maasem me. Sɩd me, tẽeb sã n pa lagem ne tʋʋma, a yaa kɩɩnga. (Zak 2:26) Tags-y n ges-y wẽn-sakdb nins yell d sẽn gomã sũy sẽn da na n yɩẽ noog to-to, b sã n da paamẽ t’a Zeova bobl-b tʋʋmd ning a sẽn kõ tõnd rũndã-rũndã wã.
8 Wala makre, a Abrahaam ra segd n wʋka kug n me tẽn-kug rasempʋɩɩgẽ wã sẽn na yɩl n waoog a Zeova. La rũndã-rũndã , Wẽnnaam nin-buiidã naagda taab Rĩung rotẽ la tigis-kãsems rotẽ n waoogd-a, la b paamdẽ tɩ b wɛgsd kãabs nins a Abrahaam sẽn ‘beel yɩɩgã’ tɩ b wʋmd a võor sõma. Mams-y n ges-y a Abrahaam sũur sẽn da na n yɩ noog to-to, yẽ me nengẽ sã n da yɩẽ woto. (Karm-y Hebre dãmb 11:13.) A Eli wakatẽ wã tɩ yaa rĩm sẽn yaa wẽn-kɩɩs n dɩt naam. La baa ne rẽ a Eli ra modgd n tũuda a Zeova. A tʋʋmd ra yaa a menes Baal no-rɛɛsdbã. Tags-y n ges-y a sũur sẽn da na n yɩ noog to-to, a tʋʋmd sã n da yaa kẽnd zak-zak n taasd koɛɛg sẽn kõt belsg la sẽn kɩtd tɩ nebã tẽed manegre. Yaa vẽeneg tɩ pĩnd wẽn-sakdbã ra nongẽ lame tɩ bũmb nins b sẽn da segd n maan a Zeova tũubã pʋgẽ wã wõnd tõnd sẽn maand rũndã-rũndã wã.
9 Bɩ d modg n ket n bɩɩsd d tẽebã ne d tʋʋm-tʋmdɩ wã maasem. D sã n maand woto, wilgdame tɩ d tũuda pĩnd wẽn-sakdbã mak-sõngã. Wa d sẽn yeel sɩngr sõsgã pʋgẽ wã, na n wa lebga wa nin-kãensã yɩɩ d zo-rãmba. Ka la bilf menga, b na n vʋʋgame, n sɩd lebg d zo-rãmba.
10. Bõe n na n maan arzãnã pʋgẽ tɩ paas d sũ-noogã?
10 Bɩ kãab-noodã d sẽn gũudã yɩ vẽeneg d yamẽ. Pĩnd wẽndẽ pagb la rap nins sẽn tall tẽebã ra tẽegda Wẽnnaam kãabsã yell wakat fãa, tɩ rẽ kõt-b raoodo. La yãmb yẽ? Tags-y n ges-y y sũur sẽn na n yɩ noog to-to, Wẽnnaam sã n wa vʋʋg neb nins sẽn tall tẽebã, tɩ d paam n bãng-ba. (Karm-y Zã 11:25.) Sogs-bʋs la y rat n sok-ba?
11, 12. Dũni-paalgã pʋgẽ, bõe la y rat n sok a) A Abɛll? b) A Nowe? d) A Abrahaam? e) A Rut? f) A Abigayill? g) A Ɛstɛɛr?
11 Y ratame tɩ y sã n wa seg a Abɛll bɩ y sok-a n bãng a roagdbã sẽn da yaa to-to bɩ? Y tõe n sok-a lame me n ges a sã n paam n goma ne malɛgs nins sẽn da gũud Edɛn zẽedã zĩigã, la b sã n leok-a lame. Sã n yaa a Nowe, y tõe n sok-a-la woto: “Fo ra zoeta nin-wobdã bɩ? Fo maana wãn n ges rũmsã sẽn zĩnd koglgã pʋgẽ wã yelle?” Y tõe n soka a Abrahaam woto: “Fo bãnga a Sɛm bɩ? Ãnd n gom a Zeova yell ne foo pipi? Yɩɩ nana ne-f tɩ f yik n bas Ur tẽngã bɩ?”
12 Ad sogsg kẽer y sẽn tõe n sok pĩnd wẽndẽ pagb sẽn na n vʋʋge. Y tõe n soka a Rut n gese, bõe n kɩt t’a wa yãk yam n na n tũ a Zeova. Sã n yaa a Abigayille, y tõe n sok-a-la woto: “Fo sẽn wa n dat n togs a Naball tɩ f sõnga a Davɩɩdã, rabeem yõka foo bɩ?” Y tõe n soka a Ɛstɛɛr me n ges bõe n maan yẽ ne a Mardose, zʋɩf rãmbã fãagrã poore.
13. a) Sogs-bʋs la sẽn na n vʋʋg-bã tõe n sok-yã? b) Y sẽn na n wa paam n yã pĩnd wẽn-sakdbã maanda yãmb bõe?
13 Tõe tɩ nin-kãensã sẽn na n vʋʋgã tara sogsg wʋsg me n na n sok yãmba. Yaa ne sũ-noog la d na n togs-b dũniyã sẽn da lebg to-to yaoolem wakatã, la a Zeova sẽn sõng a nin-buiidã to-to zu-loeesã sasa. B sã n bãng a Zeova sẽn maan to-to n pids a pʋlemsã fãa wã, b sũy na n yɩɩ noog wʋsgo. Wakat kãngã, pa na n le yɩ toog ne-d tɩ d tõog tɩ wẽn-sakdb nins kibay sẽn be Biiblã pʋgẽ wã yɩ vẽeneg d yamẽ ye. B na n zĩnda ne tõnd arzãnã pʋgẽ. Woto yĩnga, bɩ y ket n maand y sẽn tõe fãa sẽn na yɩl tɩ b kibayã yɩ vẽeneg y yamẽ. Modg-y n tall-y b tẽebã buudu. Wẽnd na kɩt tɩ y wa sɩd yɩ b zo-rãmb hakɩka, tɩ y naag taab n tũ a Zeova wakat sẽn kõn sa!
