Biiblã pʋgẽ, b pʋlma bũmb wʋsgo, la b kõt sagls buud toor-toor me. Tõe tɩ y rat n bãnga Biiblã sẽn yetã, la tõe tɩ y yam yoodame. Rẽ yĩnga, y tõe n kɩsa sɩd ne pʋlems la sagls nins sẽn be seb-kʋdr a woto pʋgẽ wã bɩ? Biiblã sẽn yetã tara yõod rũndã-rũndã bɩ? Y tõe n tẽe a sẽn yet bũmb ning beoog vɩɩmã wɛɛngẽ wã bɩ? Neb milyõ-rãmb kɩsa sɩd ne rẽ. D ges bũmb kẽer sẽn tõe n sõng yãmb me tɩ y kɩs sɩda.

1. Kibay nins sẽn be Biiblã pʋgẽ wã yaa sɩd bɩ, bɩ yaa soalma?

Biiblã yeelame t’a ‘goamã zemsame, la tɩ b yaa goam sẽn yaa sɩda.’ (Koɛɛg soaba 12:10) A sẽn gomd yɛl nins yelle, la neb nins yellã sɩd zĩndame. (Karm-y Luk 1:3; 3:1, 2.) Bãngdb la tẽn-vaeesdb wʋsg kõo kaset tɩ Biiblã pʋgẽ, yɛl kẽer sẽn maan sasa ninsi, neba, zĩis la bũmb a taab yell b sẽn gomdã zemsa kɛpɩ.

2. Bõe yĩng tɩ d tõe n yeel tɩ Biiblã ket n tara yõod rũndã-rũndã?

Biiblã goma bũmb kẽer yell a wakatẽ nebã sẽn da nan pa mi. Wala makre, a goma yɛl kẽer yell siãnsã bãngdb me sẽn gomde. Yel-kãensã wʋsg wɛɛngẽ, nebã ra kɩɩsda taaba. La rũndã-rũndã, siãnsã bãngdb sak n deegame tɩ Biiblã sẽn yetã zemsa kɛpɩ. D tõe n teega a goamã wakat fãa.—Yɩɩn-sõamyã 111:8.

3. Bõe yĩng tɩ d tõe n kɩs sɩd ne Biiblã sẽn yet beoog-daarã wɛɛngẽ wã?

Biiblã pʋgẽ, d yãta bãngr-goam * sẽn togsd yɛl ‘hal wakat sẽn zãr tɩ b nan ka maan ye.’ (Ezayi 46:10) Yɛl wʋsg sẽn zĩnd la a ra reng n togs hal sẽn kaoose, tɩ sɩd wa pids kɛpɩ. Sẽn paase, a pĩnd n togsa yɛl nins sẽn maand dũniyã zugã ball-balle. Sag-kãngã pʋgẽ, d na n goma Biiblã bãngr-goam kẽer yelle. B sẽn pids to-to wã yaa wa yel-solemde.

 KƲMSGO

Kʋdemdã yɛla, siãnsã la bãngr-goamã fãa wilgdame tɩ d tõe n kɩsa sɩd ne Biiblã sẽn yetã.

Lebg-n-gese

• Kibay nins sẽn be Biiblã pʋgẽ wã yaa sɩd bɩ, bɩ yaa soalma?

• Wilg-y bũmb kẽer siãnsã sẽn yete, tɩ zems ne Biiblã

• Yãmb tagsdame tɩ Biiblã togsda yɛl sẽn wat beoog bɩ? Wilg-y y leoorã võore.