A Zeezi sagla a karen-biisã, n sõng-b tɩ b bãng b sẽn tog n tall b paoongã n maan bũmb ninga. La pa a karen-biisã bal n wʋm a sẽn yeelã ye. Fariizẽ-rãmb me n da be be, la bãmb n da segd n kelg a Zeezi goamã n yɩɩda. Bõe yĩnga? B sẽn “nong ligdã” yĩnga. La b sẽn wʋm a Zeezi sẽn yeelã, b yaal-a lame.—Luk 15:2; 16:13, 14.

La rẽ pa tõog t’a Zeezi sĩnd ye. A pʋd n yeel-b lame yaa: “Yãmb yaa neb sẽn wilgd nebã tɩ y yaa tɩrse. La Wẽnnaam mii yãmb sũyã. Bala, bũmb ning nebã sẽn pẽgd wʋsgã yaa bõn-wẽng Wẽnnaam nifẽ.”—Luk 16:15.

Hal sẽn kaoos la Fariizẽ-rãmbã ra paam tɩ ‘nebã pẽgd-b wʋsgo.’ La masã wã, na n toeemame. B ra yaa neb sẽn tar ziiri, arzɛgse, n leb n tar naam tũudmã pʋgẽ. La rẽ fãa ra na n saame. Neb nins sẽn yaa nimbãan-dãmba, n miẽ tɩ b segd n baoo Wẽnnaamã n na n paam waoogr masã. A Zeezi wilga vẽeneg tɩ yɛlã zoe n sɩnga toeengo.

A yeela woto: “Hal tɩ ta a Zã wakate, dag n yaa tõogã ne no-rɛɛsdbã wakate. La sẽn sɩng ne a Zã wakatã, b moonda Wẽnnaam soolem koe-noogã, la ned kam fãa nangda pãng n dat n kẽ be. Yĩngr la tẽng loogr yaa naana n yɩɩd tõogã kargr a yembr menengo.” (Luk 3:18; 16:16, 17) A Zeezi gom-kãensã wilgdame tɩ yɛlã sɩnga toeengo. Bõe yĩng tɩ d yet woto?

Zʋɩf-rãmbã tũudmã taoor dãmb ra wẽeda b yãoog n yetẽ tɩ b tũuda a Moyiiz tõogã. D tẽeg t’a Zeezi sẽn puk zoangã nin Zeruzalɛmmã, Fariizẽ-rãmbã sẽn yaa wuk-m-mens rãmbã ra yeela woto: “Tõnd yẽ yaa a Moyiis karen-biisi. Tõnd miime tɩ Wẽnnaam goma ne a Moyiisi.” (Zã 9:13, 28, 29) Bũmb a ye sẽn kɩt tɩ Wẽnnaam kõ Israyɛll nebã tõogã yaa sẽn na n sõng sik-m-mens rãmbã tɩ b bãng Mesi wã sẽn yaa a Zeezi wã. A Zãmbatiis yeela vẽeneg tɩ yaa a Zeezi la Wẽnnaam Pe-bilã. (Zã 1:29-34) A Zãmbatiis moona “Wẽnnaam soolem” koe-noogã, tɩ zʋɩf-rãmb sẽn yaa sik-m-mens rãmb wʋme. Bãmb wʋsg ra yaa naong rãmba. Sɩd me, ‘koe-noog’ la b taasd neb nins fãa sẽn dat n kẽ Wẽnnaam soolmã pʋgẽ n paam n dɩ a yõodã.

Woto pa rat n yeel t’a Moyiiz tõogã pa tall yõod ye. Tõogã pʋd n sõnga nebã hal n tãag Mesi wã waoongo. La a tũub ra pa na n le yɩ tɩlɛ ye. Wala makre, tõogã ra kõta ned sor t’a tõe n kao a kãadem bʋʋm toɛy-toɛy yĩnga. La a Zeezi yeelame tɩ wakat kãng tɛka: “Ned ning fãa sẽn dig a pag la a rɩk a to, maanda yoobo. La ned ning fãa sẽn dɩk pag a sɩd sẽn dig maanda yoobo.” (Luk 16:18) Gom-kãensã yika Fariizẽ-rãmbã sũyã wʋsgo, bala bãmb ra nong n lugenda noy bũmb fãa pʋgẽ.

Rẽ masã la a Zeezi togs kibare, n na n wilg-b tɩ toeengã pa na n yɩ bilf ye. A goma neb a yiib yelle. B ned kam fãa yɛlã tiig n toeema fasɩ. Tẽeg-y tɩ neb nins sẽn da kelgd a Zeezi wã sʋka, Fariizẽ-rãmb n da naage. Yaa neb sẽn nong ligdi, tɩ nin-buiidã me ra pẽgd-b wʋsgo.

A Zeezi yeela woto: “Rao a ye n dag n be n yaa arzɛk soaba, n yeelgd fu-sõama sẽn yaa neeba. La daar fãa, a tara bũmb fãa tɩ seke, t’a vɩɩmã yaa noog wʋsgo. Naong soab a yembr sẽn boond t’a Lazaar dag n gãee arzɛk soabã zak noore. La a yĩngã fãa da pida ne noada. A rag n nongẽ lame n paam rɩ-zeremsã sẽn yit arzɛk soaba taabl zug n lʋɩtẽ wã n dɩ. La sẽn paase, baasã wat n lelemda a noadã.”—Luk 16:19-21.

Fariizẽ-rãmbã yaa ligd-noangdba. Dẽnd sãmbg kae tɩ kibarã pʋgẽ, yaa bãmb la a Zeezi sẽn mak ne “arzɛk soabã.” Zʋɩf tũudmã taoor dãmb nong n ningda fut ligd sẽn yaa toogo, bɩ wilg-m-meng futu. Wõnda b arzɛkã sẽn yãk a toogo, b sẽn paam n yaa tũudmã taoor dãmbã ra kɩtame tɩ b tar naam la ziiri. A Zeezi wilgame tɩ arzɛk soabã ra yera fu-sõma sẽn yaa neeba. Woto makda Fariizẽ-rãmbã sẽn nong naamã la b sẽn yaa tɩrs b mens nifẽ wã.—Dãniyɛlle 5:7.

La nin-kãensã sẽn yaa zẽk-m-mens rãmbã manesem ra yaa wãn ne naong rãmbã? B ra pa rat n pẽneg-b ye. B pʋd n da boond-b lame tɩ ‛am ha·’aʹrets, sẽn dat n yeel tɩ tẽng-tom neba, neb sẽn pa mi tõogã, la sẽn pa zems tɩ b zãms-b tõogã. (Zã 7:49) A Zeezi kibarã pʋgẽ,  “naong soab” a Lazaar makda nin-kãensã. A rag n nongẽ lame n “paam rɩ-zeremsã sẽn yit arzɛk soabã taabl zug n lʋɩtẽ wã” n dɩ. A Lazaar yĩngã sẽn da yaa noadã, arzɛk soabã ra pa rat n pẽneg-a ye. Woto me, Fariizẽ-rãmbã sẽn da get naong rãmbã wa neb sẽn ka bark Wẽnnaam nifẽ wã kɩtame tɩ b ra pa rat n pẽneg-b ye.

A Zeezi sẽn bilg yell ning a makrã pʋgẽ wã ra sɩng n beeme. La a ra miime tɩ wakat taame tɩ yɛlã na n toeeme. Arzɛk soabã sẽn makd neb ninsã, la a Lazaar sẽn makd neb ninsã me yɛl na n tiig n toeemame.

A Zeezi wilga yɛlã sẽn toeem to-to wã. A yeelame: “Naong soabã wa n kiime. La malegsã talla yẽnda n kẽng a Abrahaam nengẽ. La arzɛk soabã me wa n kiime, la b mum-a lame. Kɩɩm-kulg pʋgẽ, yẽnda nak n gesame. La a namsgã pʋgẽ, a tool n yãnda a Abrahaam yɩɩga, t’a Lazaar be ne-a.”—Luk 16:22, 23.

Neb nins sẽn da kelgd a Zeezi wã ra miime t’a Abrahaam kii hal daar zãra, tɩ b mum-a. Gʋlsg-sõamyã wilga vẽeneg me tɩ sẽn be-b yaadẽ bɩ kɩɩm-kulgã pa tõe n gome, bɩ n yã bũmb ye. Dẽnd a Abrahaam pa gomde, a pa ne. (Koɛɛg soaba 9:5, 10) Sã n yaa woto, wãn to la tũudmã taoor dãmb wʋmd a Zeezi kibarã võore? Bõe la a ra rat n wilg naong rãmbã wɛɛngẽ, la tũudmã taoor dãmb sẽn nong ligdã me wɛɛngẽ?

A Zeezi ra zoe n goma toeeng yelle, n yeel tɩ ‘hal tɩ ta a Zã wakate, dag n yaa tõogã ne no-rɛɛsdbã wakate, la tɩ sẽn sɩng ne a Zã wakatã, b moonda Wẽnnaam soolem koe-noogã.’ Dẽnd rat n yeelame t’a Zã ne a Zeezi Kiris sẽn moond koɛɛgã, kɩtame t’a Lazaar ne arzɛk soabã vɩɩm toeemdẽ.

Wẽnnaam tũubã wɛɛngẽ, nin-talsã ra pa tolg n paamd sõngr ye. La b paamda sõngr masã, bala b wʋmda Wẽnnaam Rĩungã koɛɛgã a Zãmbatiis sẽn deng n taase, t’a Zeezi me wa togs n paasã, hal n sakdẽ menga. Pĩndã, sõngrã ra paoodame, n yaa wa rɩ-zerems sẽn yit tũudmã taoor dãmb taablẽ n lʋɩtẽ. La masã, nin-kãensã paamame n wʋmd Gʋlsg-sõamyã goam kẽer võore, sẽn yɩɩd fãa a Zeezi sẽn da togsd-b bũmb ninsã. Dẽnd Wẽnnaam a Zeova nifẽ masã, bãmb n lebg neb sẽn tar yẽ barka.

La tũudmã taoor dãmb sẽn yaa arzɛk rãmb la neb sẽn tar ziirã pa sak Rĩungã koɛɛgã a Zã sẽn moonã ye. B leb n pa kelg a Zeezi me sẽn da moond zĩig fãa wã ye. (Matye 3:1, 2; 4:17) B sũyã pʋd n yikame tɩ b namsdẽ, bala koɛɛgã ra wilgdame tɩ Wẽnnaam na n kaoo b bʋʋdo. (Matye 3:7-12) A Zeezi ne a karen-biisã sã n da bas koɛɛgã moonego, ra na n yolsa  tũudmã taoor dãmba. Nin-kãensã ra yaa wa arzɛk soabã a Zeezi sẽn gom a makrã pʋgẽ wã. Arzɛk soabã yeela woto: “M ba a Abrahaam! Zoe-y mam nimbãanega, n tʋm a Lazaar t’a tẽk a nug-bil koomẽ n wa n wʋlg m zelemdã. Bala, mam namsda wʋsg bug-kãngã pʋgẽ.”—Luk 16:24.

La tũudmã taoor dãmb wʋsg yaool n pa na n tek yam ye. B zãgsame tɩ b kõn “kelg a Moyiis ne Wẽnnaam no-rɛɛsdbã” sẽn yeelã ye. Yaool n yaa rẽ n da na n sõng-b tɩ b sak tɩ yaa a Zeezi la Mesi wã, Rĩm ning Wẽnnaam sẽn yãkã. (Luk 16:29, 31; Galat-rãmbã 3:24) B sẽn pa sik-m-mens rãmbã, b pa bas tɩ neb nins sẽn sak a Zeezi n tar Wẽnnaam barkã sõng-b ye. La a Zeezi karen-biisã pa na n sak n kɩɩs Wẽnnaam noyã, bɩ n golem sɩdã, sẽn na yɩl n noog tũudmã taoor dãmb sũy ye. A Zeezi makrã pʋgẽ, a Abrahaam sẽn leok arzɛk soabã to-to wã wilga rẽ vẽenega.

Ad a Abrahaam sẽn yeelã: “M biiga, bɩ f tẽeg tɩ fo paama arzegs f vɩɩmã wakate, la t’a Lazaar paama toodo. La moasã, yẽnda paamda belsg ka, tɩ fo be toog pʋgẽ. La rẽ fãa sẽn yãk a toogo, bok-kãseng n be tõnd ne yãmb sʋka, sẽn na n yɩl tɩ neb nins sẽn dat n yi ka n wa yãmb nengẽ wã ra tõog ye, la tɩ sẽn be-b yãmb nengẽ wã me ra tõog n wa tõnd nengẽ ye.”—Luk 16:25, 26.

Ad toeeng-kãngã sɩd zemsame! Masã lebga b sẽn pa nand-b rãmbã sẽn sak a Zeezi wã n paamd yolsgo, la b paamd n bãngd bũmb wʋsg Wẽnnaam tũubã wɛɛngẽ. Pa le yaa tũudmã taoor dãmb sẽn yaa wuk-m-mens rãmbã ye. (Matye 11:28-30) Ra pa na n kaoos la Wẽnnaam kɩt tɩ kaool paalgã ledg tõogã kaoolã ye. Wakat kãnga, na n lebga vẽeneg tɩ yɛlã sɩd toeemame. (Zeremi 31:31-33; Koloos-rãmbã 2:14; Ebre-rãmbã 8:7-13) Yʋʋmd 33 Pãntekotã sasa, Wẽnnaam pʋdga a vʋʋsem sõngã a Zeezi karen-biisã zugu, tɩ maneg n lebg vẽeneg tɩ yaa bãmb n tar Wẽnnaam barka, la pa Fariizẽ-rãmbã ne b poorẽ dãmbã ye.