M doga Ciudad Obregón sẽn be Megsik nug-rɩtgã. M roagdbã ra tara kamb a wɛ. Maam la nu soabã. Tõnd ra bee Ciudad Obregón tẽngã noore. M baaba ra tara pʋʋg be. Beenẽ vɩɩmã ra noomame. D zakã rãmb ra zemsda taab sõma, tɩ sũ-noog beẽ. Bʋko, m sẽn wa n tar yʋʋm a nu bala, sob-kɛɛng n sãam tõnd pʋʋgã. Kɩtame tɩ d yik n kẽng tẽng a to.

 M baaba wa n sɩng n paamda ligd wʋsgo. La wakat kãnga, a lebga rã-yũuda. Rẽ sãama a kãadmã, n nams tõnd a kambã me. Maam ne m kẽem kom-dibl a yi n sɩng n zuud m baaba sɩgaarã n yũuda. M sẽn wa n tar yʋʋm a yoob bala, m yũu rãam pipi n su. Pa yã n kaoose, m baaba ne m ma welga taaba. Kɩtame tɩ m sɩgaarã la rãamã yũub maneg n paam pãnga.

 M ma wa n tɩ bee ne rao a to. A talla tõnd n kẽnge. Raoã ra pa kõt-a ligd ye. M ma sẽn da paamdã me ra pa sekd tõnd ye. Rẽ n so tɩ maam ne m yaopã la m kẽem-dãmbã ra tʋmd tʋʋm ning fãa d sẽn paame. La baa ne rẽ, ra yaa toog tɩ d paam d noorã rɩɩb daar fãa. Mam da sɩɩrda neooda, n koosd buri, zʋrno-rãmba, sĩngom la bũmb a taaba. M da gilgda tẽngã pʋgẽ n baood rɩɩb rakã-rãmbã pubɛll dãmb pʋsẽ.

 M sẽn wa n tar yʋʋm piigã, rao a ye n yeel maam tɩ m wa tʋm ne-a sagdã lobr zĩigẽ. M sakame. M basa lekollã, la m yi zakã. Daar fãa a sẽn da kõt maamã pa tat koabg ye. Rɩɩbã a sẽn da wʋkd sagdã lobr zĩigẽ wã la a ra kõt maam. M da vɩɩ ro-bil m sẽn ka ne teed m sẽn wʋk sagdã zĩigẽ. Mam sẽn da be ne neb ninsã ra gomda gom-yoodo, la b ra nong yoob me. Wʋsg ra yaa dorgã la rãamã yembse. M vɩɩmã pʋgẽ, sasa kãng n yɩ toog n yɩɩda. Yʋng fãa m da yãbdame, la m da rigd rabeemã yĩnga. M sẽn da yaa naong soab la m pa karem n zãagã yĩnga, m da tagsdame tɩ m ka võor ye. M vɩɩmda sagdã lobr zĩigẽ na maan yʋʋm a tã, n yaool n na n yik n kẽng Megsik tẽng a to. Beenẽ, m tʋma pʋt pʋsẽ, n yãgsd fɩlɛɛr-dãmb la lamdo, n wʋkd kãnkã-sɩɩdo, la pomdetɛɛre.

 Yʋʋm a naas poore, mam leba Ciudad Obregón. M pʋgdb a ye sẽn da yaa tɩɩm soab n kõ maam gãag zĩig a zakẽ wã. M sɩngame n zãmsd zãms-yoodo. Rẽ kɩtame tɩ m yam yi vɩɩmã, hal tɩ m da rat n kʋ m mengã. Yʋng a ye m pʋʋsa Wẽnnaam n yeel-a yaa: “Zu-soaba, yãmb sã n sɩd beeme, m dat n bãnga yãmba, la m tũ yãmb m yõor tɛka. Tũudum hakɩɩk sã n sɩd beeme, m dat n bãng-a lame.”

 Hal sẽn kaoose, m da ratame n bãng Wẽnnaam. Baa m sẽn wa n yaa yãagã, m da kẽnda wẽnd-dot toɛy-toɛy pʋsẽ, la b fãa wa n sãama m sũuri. B baa a ye ra pa gomd Biiblã yell wʋsg ye. B pa sõng-m tɩ m bãng Wẽnnaam me ye. Tũudum kẽer pʋsẽ, sẽn da pak-b n yɩɩd yaa ligdã, tɩ wẽnd-dot sãnda neb da yaa yoaadba.

 M sẽn wa n tar yʋʋm 19, m dɛɛmb a ye n togs maam t’a Zeova Kaset rãmbã wilg-a-la Biiblã sẽn yet imaaz-rãmbã tall n pʋʋsã wɛɛngẽ. A karma Yikr 20:4, 5 wã n wilg maam. B wilga vɛrse wã pʋgẽ tɩ d pa segd n maan bõn-naands ye. Vɛrse a nu wã yetame: ‘Ra wõgemd bõn-kãens taoor n waoog-b ye. Bala, mam yaa a Zeova sẽn yaa yãmb Wẽnnaam. Mam yaa Wẽnnaam sẽn yaa sũ-kiir soaba.’ Rẽ poore, m dɛɛmbã soka maam yaa: “Sã n mikame tɩ Wẽnnaam tũnugda ne imaaz-rãmb n maand yel-soalma, wall a ratame tɩ d tall-b n pʋʋs-a, bõe yĩng t’a gɩdg b naanego?” Kɩtame tɩ m tagse. Rẽ zugẽ, tõnd sõsa naoor wʋsg Biiblã sẽn yetã wɛɛngẽ. Sõs-kãensã yɩɩ maam noog wʋsgo, hal tɩ ra yaa wa wakatã zoeta tao-tao.

 A wa n talla maam n kẽng a Zeova Kaset rãmbã tigsg a ye. M sẽn wʋm la m yã bũmb ninsã sɩd yɩ-m-la noogo. Kom-biis meng rʋʋ ɛstaraadã zug n wɛgs sõss ne yẽesem. M yeela m meng yaa: ‘Ad neb nins sẽn wat ka wã paamda zãmsg sẽn pa tar mak-n-taaga.’ Baa ne m zoob-wogdã, la m fu-yerdi wã sẽn da pa lebd be wã, a Zeova Kaset rãmbã reega maam sõma. Zak a ye neb meng n bool maam tigsgã poor tɩ m wa naag-b n dɩ.

 M sẽn sɩng Biiblã zãmsg ne a Zeova Kaset rãmbã bala, m bãngame tɩ Wẽnnaam a Zeova yaa ba sẽn nong tõnd la a get d yelle, tɩ pa tũ ne d tarem, d ziiri, d sẽn yit tẽng ningã, bɩ d bãngr ye. A sɩd pa tũusd ned ye. (Tʋʋma 10:34, 35) M yaa n paamame tɩ b sõng-m tɩ m bãng Wẽnnaam. M pa le tagsd tɩ bũmb sẽn tar yõod n paoog-m ye.

 Mam vɩɩmã toeema zãng fasɩ! M basa sɩgaarã ne rãamã yũubu, la gom-yoodã me. Sũ-toog ning m sẽn da tar hal m yãadmẽ wã boogdame. M zãms-yoodã me kolgda weoogo. Sẽn paase, m da tagsdame tɩ m ka võore, yel-beed nins m sẽn seg m yãadmẽ wã la m sẽn pa karem n zãagã yĩnga. La m wa n tõogame tɩ tagsg a woto pa le namsd-m ye.

 M paama pʋg-sõng sẽn nong a Zeova, la sẽn sõngd-m wʋsgo. Masã, m yaa a Zeova Kaset rãmbã tigims sull yel-gɛta, n gilgd n kaagd tigimsã, n kengd m tẽed-n-taasã raood la m sõngd-b tẽebã wɛɛngẽ. Biiblã zãmsgã, n paas bãngr ning m sẽn paamã kɩtame tɩ m pa le tagsd tɩ m ka võor ye.