A Zarina sẽn deeg lisg n lebg a Zeova Kaset soabã poore, a yii Risi n leb a ba-yirã Aazisãntralle. A da rata ne a sũur fãa n sõng a kom-pugli a yi wã tɩ b bãng a Zeova. La a nugã sẽn da pa zãadã yĩnga, yẽ ne a roagdbã n paas a yao bi-riblã ne a pagã ra bee ro-yɛng pʋgẽ. A Zarina roagdbã yeel-a lame t’a ra saag n gom a Zeova yell ne a kambã ye. Sẽn paase, b yeela kambã tɩ b ra saag n sõs ne b ma wã Biiblã wɛɛngẽ ye.

A Zarina tagsa a sẽn tõe n maan to-to n sõng a kom-pugli wã tɩ b bãng a Zeova. (Yel-bũnã 1:8) Rẽ n so t’a pʋʋs a Zeova ne a sũur fãa, n kos-a t’a sõng-a la a kõ-a yam. Rẽ poore, a Zarina maana bũmb sẽn zems ne a sẽn da pʋʋsd n kotẽ wã. Yẽ ne a kom-pugli wã ra tũuda taab n yita. Sora zugu, a ra gomda bũmb nins a Zeova sẽn naan tɩ be rasãndã yelle. A sẽn da maand woto ne a kom-pugli wã sõng-b lame tɩ b rat n bãng n paas Naandã zugu.

Bũmb a to me la a Zarina maan n sõng a kom-pugli wã. A tũnuga ne Biiblã sɩd yetame tɩ bõe? * sebrã n na n zãms-ba. A ra gʋlsda zãmsgã sulã ne sogsgã seb-peds zutu. A ra gʋlsda goam a taab me n paase, sẽn na yɩl n sõng a kom-pugli wã tɩ b wʋm zãmsgã võor sõma. Rẽ poore, a rɩkda seb-pedsã n paas kɛryõ n tɩ solg masĩnã b sẽn tar n pɛgd futã tẽngre. Kom-pugli wã sã n da kẽ, b rɩkda seb-pedsã n karme, la b gʋls sogsgã leoore.

A Zarina sẽn maan woto wã, a tõog n zãmsa a kom-pugli wã Biiblã sɩd yetame tɩ bõe? sebrã sags a yi nand meng tɩ bãmb b tã wã toeem zaka. Masã, a ra tõe n zãmsa a kom-pugli wã Biiblã tɩ gɩdgr kae ye. Yʋʋmd 2016 zĩ-likr kiuugã, a kom-pugli a yi wã reega lisgu. B sũur yaa noog b ma wã sẽn tall yam n sõng-b tɩ b bãng a Zeova wã.