Isaija 3:1-26
3 Għax, ara, il-Mulej il-veru,+ Ġeħova taʼ l-armati, qed ineħħi minn Ġerusalemm+ u minn Ġuda kull appoġġ u għajnuna, jiġifieri, il-ħobż u l-ilma,+
2 ir-raġel setgħan u l-gwerrier, l-imħallef u l-profeta,+ dak li jipprattika t-teħbir u x-xiħ,+
3 il-kap taʼ ħamsin+ u r-raġel rispettat ferm u l-kunsillier u l-espert fl-arti tal-maġija, u s-saħħâr tas-sengħa.+
4 U nagħmel lit-tfal bħala prinċpijiet tagħhom, u l-qawwa li biha jaħkmu fuqhom jużawha skond kif ifettlilhom.+
5 U n-nies ikunu tiranni fuq xulxin, kull wieħed fuq sieħbu.+ Se jqumu kontra xulxin, it-tifel kontra x-xiħ,+ u dak li ma tantx hu stmat kontra dak li għandu jiġi onorat.+
6 Għax kull wieħed se jaqbad lil ħuh f’dar missieru, u jgħidlu: “Għandek mantell. Imissek tkun id-dittatur+ tagħna u din il-ħerba kollha tkun taħt idejk.”
7 Hu se jgħolli leħnu dakinhar, u jgħid: “M’iniex se ndewwi l-feriti; u f’dari la hemm ħobż u lanqas mantelli. M’għandkomx tagħmluni dittatur fuq il-poplu.”
8 Għax Ġerusalemm tfixklet u Ġuda waqaʼ,+ għax ilsienhom u l-għemejjel tagħhom huma kontra Ġeħova,+ billi ġabu ruħhom b’mod ribelluż fl-għajnejn glorjużi tiegħu.+
9 L-espressjoni stess taʼ wiċċhom tixhed kontrihom,+ u jgħidu dwar id-dnub tagħhom li jixbah lil taʼ Sodoma.+ Ma ħbewhx. Gwaj għalihom! Għax ġabu l-gwaj fuqhom infushom.+
10 Għidu li se jaħbatlu tajjeb lill-ġust,+ għax hu se jiekol frott l-għemejjel tiegħu.+
11 Jaħasra għall-ħażin! Gwaj! Għax kif ittratta lil ħaddieħor se jiġi trattat!+
12 U dawk li jagħtu x-xogħol lill-poplu tiegħi qed jaġixxu bl-aħrax, u n-nisa qed jaħkmu fuqu.+ O poplu tiegħi, dawk li qed imexxuk qed iġegħluk tiżvija,+ u ħawdulek it-triq minfejn għandek tgħaddi.+
13 Ġeħova jieħu postu għall-kawża u jqum bil-wieqfa biex jaqtaʼ s-sentenza fuq il-popli.+
14 Ġeħova jressaq għall-ġudizzju lix-xjuħ u lill-prinċpijiet tal-poplu tiegħu.+
“U intom ħraqtu l-għalqa tad-dwieli. Dak li ttieħed b’serq mingħand il-magħkus jinsab fi djarkom.+
15 Xi tridu tgħidu biha meta tgħaffġu lill-poplu tiegħi, u tisħqu wiċċ il-magħkusin?”+ hija l-kelma tal-Mulej Sovran, Ġeħova taʼ l-armati.
16 U Ġeħova jgħid: “Talli l-bniet taʼ Sijon saru suppervi u jimxu b’għonqhom imserdaq waqt li b’għajnejhom jitfgħu ħars provokattiv, u jimxu b’passi ħfief u żgħar, u jċenċlu b’saqajhom,+
17 Ġeħova se jimla l-qorriegħa taʼ ras il-bniet taʼ Sijon bil-qoxra,+ u Ġeħova se jikxfilhom ġbinhom.+
18 Dakinhar Ġeħova se jneħħi s-sbuħija taċ-ċpiepet u l-faxex taʼ madwar ir-ras u l-ornamenti għamla taʼ qamar,+
19 l-imsielet u l-brazzuletti u l-velijiet,+
20 taʼ kull għata tar-ras u l-katini ornamentali tas-saqajn u t-trieħi taʼ madwar is-sider+ u r-reċipjenti tal-fwieħa* u l-amuleti għamla taʼ bebbux,+
21 iċ-ċrieket u l-ħoloq taʼ l-imnieħer,+
22 l-ilbies ċerimonjali u t-tuniki taʼ fuq u l-imnatar u l-boroż,
23 u l-mirja taʼ l-idejn+ u l-ilbiesi taʼ taħt u t-turbantijiet+ u l-velijiet kbar.+
24 “U jrid iseħħ li minflok riħa taʼ żejt tal-balzmu+ jkun hemm biss riħa taʼ moffa; u minflok ċinturin, ħabel; u minflok stil taʼ xagħar artistiku, qargħa;+ u minflok ilbies rikk, tħażżim bl-ilbies taʼ l-ixkora;+ u marka tat-timbru+ minflok ġmiel.
25 Bis-sejf jaqgħu l-irġiel tiegħek, u s-setgħa tiegħek tgħib bil-gwerra.+
26 U l-bibien tagħha jkollhom jagħmlu l-vistu+ u jesprimu n-niket, u hi tiżvojta. U se toqgħod bil-qiegħda maʼ l-art.”+
Noti taʼ taħt
^ Letteralment, “djar tar-ruħ.”
