“IL-​QALB tajba tal-​aħwa Kristjani kienet l-​iktar ħaġa li laqtitni,” tgħid Lisa. * Hi kienet qed tgħid dak li ġibidha lejn il-​verità. Anne, ġralha l-​istess. Hi tgħid, “Inġbidt lejn il-​verità minħabba li x-​Xhieda kienu qalbhom tajba miegħi, mhux minħabba dak li jgħallmu.” Dawn iż-​żewġ aħwa issa jieħdu pjaċir jaqraw il-​Bibbja u jimmeditaw fuqha, imma l-​qalb tajba li wrew magħhom ix-​Xhieda kellha effett kbir fuqhom.

Kif nistgħu nuru qalb tajba li tinkuraġġixxi lil oħrajn? B’żewġ modi, b’dak li ngħidu u b’dak li nagħmlu. Imbagħad se nikkunsidraw ma’ min għandna nuru qalb tajba.

Il-​mara miżżewġa li tissemma fi Proverbji kapitlu 31 kellha “l-​liġi tal-​qalb tajba bl-​imħabba” fuq ilsienha. (Prov. 31:26) Hi ħalliet din “il-​liġi” taffettwa dak li tgħid u kif tgħidu. Il-​missirijiet ukoll għandu jkollhom din “il-​liġi” f’dak li jgħidu. Ħafna ġenituri jafu li meta jitkellmu bl-​aħrax mat-​tfal tagħhom jistgħu jagħmlulhom il-​ħsara, u x’aktarx it-​tfal mhux se jisimgħu minnhom. Meta l-​ġenituri jitkellmu b’qalb tajba mat-​tfal, se jkun iktar faċli biex jisimgħu u jobdu.

Sew jekk aħna ġenituri u sew jekk le, kif nistgħu nitgħallmu nitkellmu b’qalb tajba? L-​ewwel parti taʼ Proverbji 31:26 tistaʼ tgħinna. Il-​vers jgħid, hi “fetħet fommha bl-​għerf.” Dan jinvolvi li nagħżlu kliemna u t-​ton taʼ leħinna. Dan jistaʼ jgħinna nsaqsu lilna nfusna, ‘B’dak li se ngħid, se nirrabja lil oħrajn jew inżomm il-​paċi?’ (Prov. 15:1) Iva, hu importanti li naħsbu qabel ma nitkellmu.

Proverbju ieħor jgħid: “Hemm min jitkellem bla ma jaħsibha qisu b’daqqiet taʼ sejf.” (Prov. 12:18) Meta naħsbu kif il-​kliem li ngħidu u t-​ton li ngħiduh jistaʼ jaffettwa lil oħrajn, dan jistaʼ jimmotivana biex nikkontrollaw dak li ngħidu. Meta nitkellmu skont “il-​liġi tal-​qalb tajba bl-​imħabba,” aħna mhux se nużaw kliem li jweġġaʼ jew nitkellmu bla rispett. (Efes. 4:31, 32) Aħna se nibdlu kliem u ħsibijiet negattivi ma’ kliem pożittiv u mimli ħlewwa. Ġeħova ħallielna eżempju meta hu assigura lil Elija meta kien qiegħed jibżaʼ. L-​anġlu li tkellem għal Ġeħova kellmu ‘b’leħen kalm u baxx.’ (1 Slat. 19:12) Però, biex nuru qalb tajba jinvolvi iktar milli nitkellmu bil-​ħlewwa. Irridu nuruha wkoll b’dak li nagħmlu. Kif?

Meta nitkellmu u naġixxu b’qalb tajba aħna nimitaw lil Ġeħova. (Efes. 4:32; 5:1, 2) Lisa, li semmejna diġà, tgħid kif ix-​Xhieda wrew qalb tajba magħha. “Meta bħala familja kellna nitilqu taʼ malajr minn fejn konna qed ngħixu, żewġ koppji mill-​kongregazzjoni ħadu l-​off mix-​xogħol tagħhom biex jgħinuna nippakkjaw. Dak iż-​żmien kont għadni lanqas nistudja l-​Bibbja!” Dan ġiegħel lil Lisa tkun trid titgħallem iktar dwar il-​verità.

 Anne, li semmejna fil-​bidu, ukoll tapprezza l-​qalb tajba li wrew magħha x-​Xhieda taʼ Ġeħova. Hi tgħid: “Minħabba s-​sitwazzjoni tad-​dinja li qed ngħixu fiha, sibtha diffiċli biex nafda lin-​nies. Meta ltqajt max-​Xhieda, lanqas lilhom ma fdajt. Jien għedt, ‘Dawn għala qed juru interess fija?’ Imma l-​qalb tajba li wrietni l-​oħt li kont qed nistudja magħha ġegħlitni nafdaha.” X’kien ir-​riżultat? “Iktar tard, bdejt niffoka fuq dak li kont qed nitgħallem.”

Rajt kif dak li miss qalb Lisa u Anne kien il-​qalb tajba li wrew magħhom uħud mill-​kongregazzjoni, u kif għenhom ikunu jridu jitgħallmu dwar il-​verità? Il-​qalb tajba li wrew l-​aħwa tal-​kongregazzjoni għenithom biex jibdew jafdaw lil Ġeħova u lill-​poplu tiegħu.

Minħabba t-​trobbija jew fejn jgħixu, xi nies huma mdorrijin jitkellmu b’qalb tajba u jitbissmu. Hu tajjeb li xi nies ikunu edukati minħabba l-​kultura jew il-​personalità  tagħhom. Imma jekk inkunu motivati biss mill-​kultura jew il-​personalità tagħna jistaʼ jkun li ma nkunux qed nimitaw il-​qalb tajba taʼ Ġeħova.—Qabbel Atti 28:2.

Il-​qalb tajba hi waħda mill-​kwalitajiet tal-​frott tal-​ispirtu t’Alla. (Gal. 5:22, 23) Mela biex nuru iktar qalb tajba, irridu nħallu l-​ispirtu t’Alla jinfluwenza l-​mod kif naħsbu u naġixxu. Meta nagħmlu hekk, inkunu qed nimitaw lil Ġeħova u lil Ġesù. U bħal Ġesù, aħna vera jimpurtana minn oħrajn. Għalhekk, niġu motivati biex nuru qalb tajba għax inħobbu lil Ġeħova u lin-​nies. Imbagħad il-​qalb tajba se ssir kwalità b’saħħitha li tiġi mill-​qalb u li Alla jaċċetta.

Jistaʼ jkun faċli biex nuru qalb tajba ma’ dawk li jirrispettawna jew dawk li nafu. (2 Sam. 2:6) Mod wieħed hu billi nirringrazzjawhom għal dak li jagħmlu magħna. (Kol. 3:15) Imma xi ngħidu jekk inħossu li xi ħadd ma ħaqqux li nuruh qalb tajba?

Aħseb dwar dan: Ġeħova hu l-​aqwa eżempju taʼ xi ħadd li juri qalb tajba mhix mistħoqqa. U l-​Bibbja tgħallimna lezzjoni importanti biex nuru din il-​kwalità. L-​espressjoni “qalb tajba mhix mistħoqqa” hi użata ħafna drabi fl-​Iskrittura Griega Kristjana. Ġeħova kif jurina qalb tajba?

Ġeħova juri qalb tajba man-​nies kollha billi jagħtihom dak kollu li jkollhom bżonn biex jgħixu. (Mt. 5:45) Fil-​fatt, anki qabel ma konna nafuh wera qalb tajba magħna. (Efes. 2:4, 5, 8) Pereżempju, hu ta lil Ibnu Ġesù għan-​nies kollha. L-​appostlu Pawlu kiteb li Ġeħova pprovda l-​fidwa “skond ir-​rikkezzi tal-​qalb tajba mhix mistħoqqa tiegħu.” (Efes. 1:7) Barra minn hekk, minkejja li aħna niżbaljaw u niddiżappuntaw lil Ġeħova, hu jkompli jgħallimna. Il-​gwida u l-​Kelma tiegħu huma bħal “irxiex” tax-​xita. (Dt. 32:2) Huwa impossibbli li npattu lura għal dak kollu li qed jagħmel magħna. U aħna nafu li jekk Ġeħova ma jurix qalb tajba magħna mhux se jkollna tama għall-​futur.—Qabbel l-​1 Pietru 1:13.

Bla dubju, il-​qalb tajba li juri Ġeħova għax iħobbna ġġegħelna nimitawh. Għalhekk, minflok ma nagħżlu ma’ min nuruha, għandna naħdmu iebes biex nimitaw lil Ġeħova u nuru qalb tajba ma’ kulħadd. (1 Tess. 5:15) Meta dejjem nuru qalb tajba nkunu qisna ħuġġieġa nar li tagħmel is-​sħana f’ġurnata kiesħa. Inkunu taʼ inkuraġġiment għall-​familja, għall-​aħwa, għal dawk li jaħdmu magħna, għat-​tfal tal-​iskola, u għall-​ġirien.

Aħseb kif tal-​familja u l-​aħwa fil-​kongregazzjoni se jibbenefikaw meta int titkellem u taġixxi b’qalb tajba. Jaf ikun hemm xi ħadd fil-​kongregazzjoni tiegħek li jkollu bżonn l-​għajnuna biex jieħu ħsieb xi affarijiet tad-​dar, jew jagħmel il-​qadi. U meta tkun fil-​ministeru u tiltaqaʼ ma’ xi ħadd li għandu bżonn l-​għajnuna, tistaʼ toffri li tgħinu?

Bħal Ġeħova, jalla dak li ngħidu u kif naġixxu dejjem ikun motivat “mil-​liġi tal-​qalb tajba bl-​imħabba.”