Kif Kien Jidher Ġesù?

DOQQ

It-tweġiba tal-Bibbja

Ħadd ma jaf eżatt, għax il-Bibbja ma tgħidilniex kif kien jidher Ġesù. Għalhekk naraw li dan mhuwiex importanti. Imma mill-Bibbja nistgħu nieħdu idea taʼ kif kien jidher Ġesù.

Kif kien jidher: Peress li omm Ġesù kienet Lhudija, hu x’aktarx li kien jixbah lil-Lhud. (Ebrej 7:14) X’aktarx, ma tantx kien jidher differenti minn oħrajn. Darba waħda, hu vvjaġġa bil-moħbi mill-Galilija għal Ġerusalemm u ħadd ma għarfu. (Ġwanni 7:10, 11) Milli jidher, hu ma kienx jidher differenti ħafna mill-appostli. Ftakar li meta xi rġiel marru biex jarrestaw lil Ġesù, Ġuda l-Iskarjota kellu jurihom min kien.—Mattew 26:47-49.
Xagħru: Wisq probabbli, xagħar Ġesù ma kienx twil għax il-Bibbja tgħid li “jekk raġel ikollu xagħru twil, dan ikun diżunur għalih.”—1 Korintin 11:14.
Daqna: Ġesù kellu daqna. Bħala Lhudi, hu kien jobdi l-liġi taʼ Mosè. Din kienet tgħid li l-irġiel m’għandhomx ‘jaqtgħu t-tarf tad-daqna tagħhom.’ (Levitiku 19:27; Galatin 4:4) Il-Bibbja ssemmi d-daqna taʼ Ġesù fi profezija. Din tgħid li kien se jbati.—Isaija 50:6.
Saħħtu: Dak li naqraw dwar Ġesù juri li hu kien b’saħħtu. Meta kien jipprietka, hu kien jimxi għal distanzi twal. (Mattew 9:35) Hu naddaf it-tempju darbtejn billi qaleb l-imwejjed tal-flus u keċċa l-annimali bi frosta. (Luqa 19:45, 46; Ġwanni 2:14, 15) Is-Cyclopedia taʼ McClintock u Strong tgħid: “Dak li naqraw dwar Ġesù mill-evanġelji juri li hu kien b’saħħtu.”—Volume IV, paġna 884.
L-espressjonijiet taʼ wiċċu: Ġesù kien dħuli u jħoss għan-nies. Allura, dawn il-kwalitajiet żgur kienu jidhru fl-espressjonijiet taʼ wiċċu. (Mattew 11:28, 29) Nies minn kull background kienu jmorru għandu għall-għajnuna. (Luqa 5:12, 13; 7:37, 38) Anki t-tfal kienu jħossuhom komdi miegħu.—Mattew 19:13-15; Marku 9:35-37.

Ideat żbaljati dwar kif kien jidher Ġesù

Idea żbaljata: Xi wħud jgħidu li Ġesù kellu background Afrikan. Jaħsbu hekk għax il-ktieb tar-Rivelazzjoni jqabbel xagħru maʼ suf u saqajh maʼ “ram aħmar.”—Rivelazzjoni 1:14, 15.

Verità: Il-ktieb tar-Rivelazzjoni jispjega l-affarijiet “b’sinjali.” (Rivelazzjoni 1:1) Il-mod kif Rivelazzjoni qed jiddeskrivi xagħar u saqajn Ġesù hu simboliku. Mhux qed jiddeskrivi kif kien jidher Ġesù meta kien fuq l-art, imma l-kwalitajiet li għandu wara li rxoxta. Rivelazzjoni 1:14 jgħid li “rasu u xagħru kienu bojod bħal suf abjad, bħas-silġ.” Hawnhekk juża l-kulur biex jiddeskrivi l-għerf li għandu u mhux biex jiddeskrivi t-tip taʼ xagħar li kellu.—Rivelazzjoni 3:14.

Saqajn Ġesù kienu “bħal ram aħmar pur li jleqq meta jkun fil-forn.” (Rivelazzjoni 1:15) Wiċċu kien “bħax-xemx meta tiddi fil-qawwa tagħha.” (Rivelazzjoni 1:16) Peress li l-ebda ġilda f’din id-dinja m’għandha dan il-kulur, din il-viżjoni hi simbolika. Din qed turi lil Ġesù fis-sema li qed jgħix “f’dawl li ma tistax tersaq lejh.”—1 Timotju 6:16.

Idea żbaljata: Ġesù kien dgħajjef.

Verità: Ġesù wera li kien b’saħħtu u kuraġġuż. Pereżempju, meta l-folla ġiet biex tarrestah, hu b’kuraġġ qalilhom min kien. (Ġwanni 18:4-8) Ukoll, Ġesù bilfors li kien b’saħħtu peress li kien jaħdem bħala mastrudaxxa.—Marku 6:3.

Allura, għala kellu bżonn l-għajnuna biex iġorr iz-zokk tat-tortura? U għala miet qabel iż-żewġ kriminali l-oħra? (Luqa 23:26; Ġwanni 19:31-33) Qabel ma sammru lil Ġesù, hu kien ġa bata ħafna. Hu għamel lejl sħiħ imqajjem. Waħda mir-raġunijiet kienet minħabba li kien anzjuż. (Luqa 22:42-44) Il-Lhud ittrattawh ħażin u filgħodu r-Rumani ttorturawh. (Mattew 26:67, 68; Ġwanni 19:1-3) Minħabba dan kollu, hu miet iżjed malajr.

Idea żbaljata: Ġesù kien dejjem imdejjaq.

Verità: Ġesù kien juri b’mod perfett il-kwalitajiet taʼ Missieru, Ġeħova. Il-Bibbja tiddeskrivi lil Ġeħova bħala “l-Alla l-hieni.” (1 Timotju 1:11; Ġwanni 14:9) Ġesù għallem lil oħrajn kif jistgħu jkunu ferħanin. (Mattew 5:3-9; Luqa 11:28) Minn dan naraw li ħafna drabi Ġesù kien juri li hu ferħan mill-espressjonijiet taʼ wiċċu.