၁။ ကာ​ဣန​ရဲ့ ပညာရှိရှိ ဆုံးဖြတ်နိုင်စွမ်း​ကို ဘာက ထိခိုက်​ခဲ့​သလဲ။ ဘာ​ရလဒ် ရရှိ​ခဲ့​သလဲ။

ကာ​ဣန ရွေးချယ် ဆုံးဖြတ်​ရတော့​မယ်။ အပြစ်​ကို အနိုင်ယူ​မလား။ ခံစားချက်ကို ရှေ့တန်း​တင်​မလား။ ဘယ်လိုပဲ ဆုံးဖြတ်​ပါစေ အကျိုးဆက်​ကို တစ်သက်လုံး ခံစား​သွားရမယ်။ ကာ​ဣန ဘယ်လို ဆုံးဖြတ်​ခဲ့​မှန်း သိကြပါတယ်။ ရွေးချယ်မှု မမှန်​ခဲ့ဘူး။ သူ့​ဆုံးဖြတ်ချက်​နဲ့ လုပ်ရပ်​ကြောင့် သစ္စာရှိ​ညီ အာဗေလ သေဆုံး​ခဲ့ရတယ်။ ကာ​ဣန​ရဲ့ ဆုံးဖြတ်ချက်​က ဖန်ဆင်းရှင်​နဲ့ ဆက်ဆံရေးကို ထိခိုက်​ခဲ့တယ်။—က. ၄:၃-၁၆။

၂။ ပညာရှိ​စွာ ရွေးချယ်​နိုင်စွမ်း​က ဘယ်လောက် အရေးကြီး​သလဲ။

^၂ ကျွန်တော်တို့လည်း ရွေးချယ်​ဆုံးဖြတ်​ကြရတယ်။ ဆုံးဖြတ်ချက်​တိုင်း သေရေးရှင်ရေး​တော့ မဟုတ်ဘူး။ ဒါပေမဲ့ ဆုံးဖြတ်ချက်​များစွာ​က ကျွန်တော်တို့​အပေါ် အကြီးအကျယ် အကျိုးသက်ရောက်​နိုင်တယ်။ ဆုံးဖြတ်ချက်ကောင်း ချ​နိုင်စွမ်း​က ဘဝ​မှာ ဒုက္ခ​သု​က္ခ၊ ပြဿနာ၊ စိတ်ပျက်​စ​ရာတွေ မရှိဘဲ အေးချမ်း​ငြိမ်သက်​စွာ အသက်​ရှင်ဖို့ ကူညီပေး​နိုင်တယ်။—သု. ၁၄:၈။

၃။ (က) ပညာရှိ​စွာ ဆုံးဖြတ်​နိုင်​ဖို့ ဘာ​တွေကို ယုံကြည်​သင့်သလဲ။ (ခ) ဘယ်မေးခွန်းတွေကို သုံးသပ်​ကြ​မလဲ။

^၃ ပညာရှိ​စွာ ဆုံးဖြတ်​နိုင်​ဖို့ ဘာက ကူညီပေး​မလဲ။ ဘုရားသခင်​ကို ယုံကြည်​ဖို့ လိုအပ်တယ်။ ကျွန်တော်တို့ ပညာ​ရှိအောင် ကူညီပေး​ချင်စိတ်၊ ကူညီပေး​ နိုင်စွမ်း​ရှိ​ခြင်း​အပေါ် သံသယ​မဖြစ်​ရဘူး။ ယေဟောဝါရဲ့ စကားတော် ကျမ်းစာ၊ ကိုယ်တော့်​လုပ်ဆောင်ပုံ​နည်းလမ်း၊ ကျမ်းစာ​အကြံဉာဏ်​တွေကိုလည်း ယုံကြည်ကိုးစား​ရမယ်။ (ယာကုပ် ၁:၅-၈ ကိုဖတ်ပါ။) ဘုရားသခင်​နဲ့ ရင်းနှီး​လာပြီး ကျမ်းစာကို နှစ်သက်မြတ်နိုး​လာ​လေ ဘုရားရဲ့ ဆုံးဖြတ်​ချက်ကို ယုံကြည်​လာ​လေ​ပဲ။ ဒီလိုနဲ့ ဆုံးဖြတ်ချက် မချခင် ကျမ်းစာမှာ ရှာဖွေ​လေ့လာတဲ့​အကျင့် ရလာ​ပါလိမ့်မယ်။ ဒါပေမဲ့ ဆုံးဖြတ်ချက်ချ​နိုင်စွမ်း​ကို ဘယ်လို တိုးတက်စေနိုင်သလဲ။ ဆုံးဖြတ်​ပြီးပြီ​ဆိုတာ​နဲ့ ဘာ​ပဲ​ဖြစ်ဖြစ် ဆုံးဖြတ်ချက်​အတိုင်း လုပ်​ရတော့​မယ်လို့ ဆိုလို​သလား။

၄။ အာဒံ ဘာ​ဆုံးဖြတ်​ခဲ့ရ​သလဲ။ ဘာ​အကျိုးဆက်​ရရှိ​ခဲ့​သလဲ။

^၄ လူ့သမိုင်း​အစ​ကတည်းက အရေးကြီးဆုံး​ဖြတ်​ချက်​တွေ ချ​ခဲ့ရတယ်။ အာဒံ​ဟာ ဖန်ဆင်းရှင်ရဲ့ စကားကို နားထောင်​မလား၊ ဧဝ​ရဲ့ စကားကို နားထောင်​မလား​ဆိုတာ ဆုံးဖြတ်​ခဲ့ရတယ်။ သူ့​ဆုံးဖြတ်​ချက်ကို ဘယ်လို ထင်သလဲ။ ပညာမဲ့​စွာ ဆုံးဖြတ်​ဖို့ ဧဝ ဩဇာ​လွှမ်းမိုး​ခဲ့တဲ့​အတွက် ပရဒိသု​က​နေ မောင်းထုတ်​ခံရပြီး အသက်​ပါ ဆုံးၡုံး​ခဲ့ရတယ်။ အဲ​ဒီ​ဆိုးကျိုး​က အစ​ပဲ ရှိသေးတယ်။ အာဒံ့ ဆုံးဖြတ်ချက်​အမှား​ကြောင့် ကျွန်တော်တို့အားလုံး ဒုက္ခခံ​စား​နေကြ​ရတယ်။

၅။ ဆုံးဖြတ်​ဖို့ လိုအပ်​တာကို ဘယ်လို သဘောထား​သင့်သလဲ။

^၅ ဆုံးဖြတ်ချက်​တွေ ချ​မနေ​ရ​ရင် ဘဝဟာ ပို​ပျော်စရာ​ကောင်း​မယ်လို့ တချို့ ထင်ကြ​တ​ယ်။ သင် အဲဒီလို ထင်သလား။ ယေဟောဝါက လူတွေကို စဉ်းစား​ဆုံးဖြတ်နိုင်စွမ်း မရှိတဲ့ စက်ရုပ်​လို မဖန်ဆင်း​ခဲ့​မှန်း သတိရပါ။ တကယ်တော့ ပညာရှိ​ဆုံးဖြတ်ချက်​တွေ ဘယ်လို ချရ​မလဲဆိုတာ ကျမ်းစာမှာ သင်ပေး​ထားတယ်။ ယေဟော​ဝါက ကျွန်တော်​တို့ကို ဆုံးဖြတ်​စေချင်​ပေ​မဲ့ မထိခိုက်​စေချင်​ဘူး။ အထောက်အထား​တချို့ကို သုံးသပ်ကြည့်ပါ။

၆၊ ၇။ ရှေးခေတ်​အစ္စရေးတွေ ဘာ​ဆုံးဖြတ်​ခဲ့ရ​သလဲ။ ပညာရှိ​စွာ ဆုံးဖြတ်​ဖို့ ဘာကြောင့် ခက်​ခဲ့​သလဲ။ (ဆောင်းပါးအစမှာပါတဲ့ ရုပ်ပုံကို ကြည့်ပါ။)

^၆ ရှေးအစ္စရေး​လူမျိုး​တွေ ကတိထားရာပြည်​မှာ အခြေ​ချပြီး​တာနဲ့ ယေဟောဝါကို ဝတ်ပြု​မလား၊ တခြား​ဘုရား(တွေ)ကို ဝတ်ပြု​မလား​ဆိုတဲ့ အရေးကြီးဆုံး​ဖြတ်​ချက်​ ချခဲ့​ရတယ်။ (ယောရှု ၂၄:၁၅ ကိုဖတ်ပါ။) လွယ်ကူ​တဲ့ ဆုံးဖြတ်ချက်​လို့ ထင်​ရပေမဲ့ သေရေးရှင်ရေး​ဖြစ်တယ်။ တရားသူကြီး​တွေ​ခေတ်​မှာလည်း အစ္စရေးတွေ ပညာမဲ့​စွာ ဆုံးဖြတ်​ခဲ့ကြတယ်။ ယေဟောဝါကို ကျောခိုင်း​ပြီး မှားယွင်း​တဲ့​ဘုရား​တွေကို ကိုးကွယ်​ခဲ့ကြတယ်။ (သူကြီး. ၂:၃၊ ၁၁-၂၃) ဆုံးဖြတ်​ဖို့ လိုအပ်​ခဲ့တဲ့ သမိုင်းဖြစ်ရပ်​တစ်ခု​ကိုလည်း စဉ်းစားကြည့်ပါ။ ယေဟောဝါကို ဝတ်ပြု​မလား၊ မှားယွင်း​တဲ့​ဘုရား ဗာလ​ကို ဝတ်ပြု​မလား​ဆိုပြီး ပရောဖက် ဧလိယ ရှင်းရှင်း​မေးခဲ့တယ်။ (၃ ရာ. ၁၈:၂၁၊ ကဘ) မပြတ်​မ​သား​ဖြစ်နေ​လို့ အစ္စရေး​တွေကို ဧလိယ အပြစ်တင်​ခဲ့တယ်။ ယေဟောဝါကို ဝတ်ပြု​တာ အမြဲ ပညာ​ရှိပြီး အကျိုးပြု​တဲ့အတွက် ဆုံးဖြတ်​ရလွယ်​တယ်လို့ ထင်​ရ​နိုင်တယ်။ ဆင်ခြင်တုံတရား​ရှိတဲ့​သူ ဘယ်သူမှ ဗာလ​ဘက် ပါ​မှာ မဟုတ်ဘူး။ ဒါပေမဲ့ အစ္စရေး​တွေဟာ ‘အယူအဆ​နှစ်ခု​ကြားမှာ ချီတုံချတုံ ဖြစ်​နေကြ’ တ​ယ်။ ယေဟောဝါကို ဝတ်ပြု​ဖို့ လူတွေကို ဧလိယ တိုက်တွန်း​ခဲ့တာ ပညာရှိ​ပါတယ်။

^၇ ပညာရှိ​စွာ ဆုံးဖြတ်​ဖို့ အစ္စရေးတွေ​အတွက် ဘာကြောင့် အဲဒီလောက် ခက်​နေရ​သလဲ။ ပထမ၊ ယေဟော​ဝါကို မယုံကြည်​တော့​လို့၊ ဘုရား​စကားကို နားမထောင်​ချင်​တော့​လို့ပဲ။ တိကျ​မှန်ကန်တဲ့ အသိပညာ၊ ဘုရားရေး​ရာ ဉာဏ်​ပညာ​ကို ဆက်​မ​ဆည်းပူး​ကြ​တော့ဘူး။ ယေဟော​ဝါကို မကိုးစား​ကြ​တော့ဘူး။ သူတို့​သာ တိကျ​မှန်ကန်တဲ့ အသိပညာ​အတိုင်း လုပ်ဆောင်​မယ်ဆိုရင် ပညာရှိ​စွာ ဆုံးဖြတ်​နိုင်ကြ​ပါလိမ့်မယ်။ (ဆာ. ၂၅:၁၂) တခြားသူတွေရဲ့ ဩဇာ​လွှမ်းမိုးမှု​ကိုလည်း ခံယူ​ခဲ့ကြတယ်။ တခြားသူတွေကို​တောင် မိမိတို့​ကိုယ်စား  ဆုံးဖြတ်​ချက် ချ​စေ​ခဲ့ကြတယ်။ ယေဟောဝါကို မကိုးကွယ်​သူတွေက အစ္စရေးတွေ​ရဲ့ တွေးခေါ်​ပုံကို လွှမ်းမိုး​ပြီး​ တိတ္ထိ​လူအုပ်​နောက် လိုက်​စေ​ခဲ့ကြတယ်။ အဲဒီလို ဖြစ်နိုင်တယ်​လို့ ယေဟောဝါ သတိပေး​ခဲ့တာ ကြာ​ပြီ။—ထွ. ၂၃:၂။

၈။ ဆုံးဖြတ်​တာနဲ့​ပတ်သက်ပြီး အစ္စရေးလူမျိုး​ရဲ့ သမိုင်းကြောင်း​ကနေ ဘာ​အရေးကြီး သင်ခန်းစာ ရရှိ​သလဲ။

^၈ အထက်ပါ ပုံနမူနာ​တွေ​က ရှင်း​ပါတယ်။ ကိုယ်​ကြိုက်​သလို ဆုံးဖြတ်နိုင်တယ်။ ပညာ​ရှိပြီး မှန်ကန်တဲ့ ဆုံးဖြတ်ချက်​တွေ​က ကျမ်းစာအသိပညာ​အပေါ် အခြေခံ​တ​ယ်။ “လူ​အသီးသီး​သည် မိမိတို့​၏​ဝန်​ကို ထမ်းရွက်​ကြ​ရမည်” လို့ ဂလာတိ ၆:၅ မှာ ဖော်ပြထားတယ်။ ဆုံးဖြတ်​ရမယ့်​တာဝန်ကို တခြားသူတွေ​ဆီ မလွှဲ​အပ်​သင့်​ဘူး။ ဘုရား​အမြင်မှာ မှန်ကန်တဲ့​အ​ရာကို သိအောင် ကိုယ်တိုင်​သင်ယူ၊ ဆုံးဖြတ်​သင့်တယ်။

၉။ ကိုယ့်​အတွက် တခြားသူတွေကို ဆုံးဖြတ်​စေ​တာ ဘာကြောင့် အန္တရာယ် ရှိ​နိုင်သလဲ။

^၉ ကိုယ့်​အတွက် တခြားသူတွေကို ဆုံးဖြတ်​စေတဲ့​အန္တရာယ်​ထဲ ဘယ်လို ကျရောက်​မိ​နိုင်သလဲ။ ရွယ်တူချင်းဖိအား​က မှားယွင်း​တဲ့ ဆုံးဖြတ်ချက် ချ​မိ​စေ​နိုင်တယ်။ (သု. ၁:၁၀၊ ၁၅) တခြားသူတွေ ဘယ်လောက်​ပဲ ဖိအားပေး​ပါစေ ကျမ်းစာနဲ့ လေ့ကျင့်​ထားတဲ့ သိစိတ်​အတိုင်း လိုက်လျှောက်​ရမှာက ကိုယ့်​တာဝန်ပဲ။ ကိုယ့်​အတွက် တခြားသူတွေကို ဆုံးဖြတ်​စေမယ်​ဆိုရင် သူတို့​နောက် “လိုက်” နေတာ​ပဲ။ အဲဒါ​ကလည်း ဆုံးဖြတ်ချက်​ပဲ။ ဒါပေမဲ့ မမှန်​တဲ့ ဆုံးဖြတ်ချက် ဖြစ်တယ်။

၁၀။ ဂလာတိ​အသင်းသား​တွေကို ပေါလု ဘာ​သတိပေး​ခဲ့​သလဲ။

^၁၀ ကိုယ်ရေးကိုယ်တာ​ကိစ္စတွေ​အတွက် တခြားသူတွေကို ဆုံးဖြတ်​စေတဲ့ အန္တရာယ်​အကြောင်း ဂလာတိ​အသင်းသား​တွေကို တမန်တော် ပေါလု ရှင်းရှင်း သတိပေး​ခဲ့တယ်။ (ဂလာတိ ၄:၁၇ ကိုဖတ်ပါ။) အသင်းတော်​မှာ​ တချို့က တခြားသူတွေ​အတွက် ဆုံးဖြတ်​ပေးချင်​ကြ​တ​ယ်။ ရည်ရွယ်ချက်​က တမန်တော်​တွေနဲ့ ဝေးကွာ​စေဖို့​ပဲ။ အဲ​ဒီ​တစ်ကိုယ်​ကောင်း​သမား​တွေဟာ ကိုယ်​ထင်ပေါ်​ဖို့​ပဲ ကြိုးစား​နေကြတယ်။ စည်း​ကျော်​နေကြတယ်။ ခရစ်ယာန်ချင်း​တွေရဲ့ ဆုံးဖြတ်ပိုင်ခွင့်​ကို မလေးစား​ကြဘူး။

၁၁။ တခြားသူတွေ ကိုယ်ရေးကိုယ်တာ ဆုံးဖြတ်ချက်​တွေ ချတဲ့အခါ ဘယ်လို ကူညီပေး​နိုင်သလဲ။

^၁၁ ညီအစ်ကိုတွေ​ရဲ့ လွတ်လပ်​စွာ ဆုံးဖြတ်ပိုင်ခွင့်​ ကို လေးစား​ရာမှာ ပေါလု ပုံသက်သေကောင်း ချမှတ်​ခဲ့တယ်။ (၂ ကောရိန္သု ၁:၂၄ ကိုဖတ်ပါ။) ဒီနေ့လည်း ကိုယ်ရေးကိုယ်တာ ဆုံးဖြတ်ချက်​နဲ့ပတ်သက်ပြီး အကြံပေး​တဲ့အခါ အဲ​ဒီ​ပုံသက်သေ​ကို အကြီးအကဲတွေ လိုက်နာ​သင့်တယ်။ ကျမ်းစာအခြေပြု အကြောင်းအရာ​တွေကို ဝေမျှပေး​ပေ​မဲ့ ညီအစ်ကို/မတွေကို ကိုယ်ပိုင်ဆုံးဖြတ်​စေ​ကြ​တ​ယ်။ အဲဒီလိုပဲ ဖြစ်​သင့်ပါတယ်။ ဆုံးဖြတ်ချက်​ရဲ့ အကျိုးဆက်​တွေကို ကိုယ်တိုင်​တာဝန်ယူ​ရမှာ​မို့​လို့ပဲ။ အရေးကြီး​သင်ခန်းစာ​က​တော့ တခြားသူတွေကို စိတ်ဝင်စား​နိုင်တယ်၊ ကျမ်းစာ​မူတွေ၊ အကြံဉာဏ်​တွေကို အမှတ်ရ​စေနိုင်​ပေ​မဲ့ ဆုံးဖြတ်​ရမှာက​တော့ သူတို့ရဲ့ တာဝန်​ဖြစ်တယ်။ ပညာရှိရှိ ဆုံးဖြတ်​ရင် အကျိုးခံစား​ရပါလိမ့်မယ်။ ဒါကြောင့် တခြား​ညီအစ်ကို/မတွေ​အတွက် ဆုံးဖြတ်ပိုင်ခွင့် ရှိတယ်ဆိုတဲ့ သဘောထားကို ရှောင်​သင့်တယ်။

၁၂၊ ၁၃။ ဒေါသထွက်​ချိန်၊ စိတ်ဓာတ်ကျ​ချိန်မှာ စိတ်အလို​လိုက်တာ ဘာကြောင့် အန္တရာယ် ရှိ​သလဲ။

^၁၂ ကျော်​ကြားတဲ့ အတွေးအခေါ်၊ ဆောင်ပုဒ်​တစ်ခုက​တော့ ‘စိတ်အလို လိုက်ပါ’ ဖြစ်တယ်။ ဒါပေမဲ့ စိတ်အလို လိုက်ခြင်း​က အန္တရာယ် ရှိ​နိုင်တယ်။ ကျမ်းစာ​နဲ့လည်း မညီ​ဘူး။ ဆုံးဖြတ်ချက် ချတဲ့အခါ မစုံလင်​တဲ့ စိတ်နှလုံး၊ ခံစားချက်ကို ရှေ့တန်း​မ​တင်​ဖို့ ကျမ်းစာမှာ သတိပေး​ထားတယ်။ (သု. ၂၈:၂၆) စိတ်အလို​လိုက်ခြင်း​ရဲ့ ဆိုးကျိုး​တွေကိုလည်း ဖော်ပြထားတယ်။ အဓိက ပြဿနာ​က​တော့ မစုံလင်​တဲ့ လူသားတွေ​ရဲ့ ‘စိတ်နှလုံး​သည် ခပ်သိမ်း​သော​အရာ​ထက် စဉ်း​လဲ​တတ်တယ်။ အလွန်​ယိုယွင်း​သော​သဘော ရှိတယ်။’ (ယေ. ၃:၁၇။ ၁၃:၁၀။ ၁၇:၉။ ၃ ရာ. ၁၁:၉) စိတ်အလို လိုက်​မိရင် ဘာဖြစ်​နိုင်သလဲ။

^၁၃ ခရစ်ယာန်​တစ်ယောက်​ရဲ့ စိတ်နှလုံး​က အရေးကြီးတယ်။ ယေဟောဝါကို စိတ်နှလုံး အကြွင်းမဲ့ ချစ်​ဖို့၊ လူသားချင်း​ကို ကိုယ်​နဲ့အမျှ ချစ်​ဖို့ မိန့်မှာခံ​ထား​ရလို့ပဲ။ (မ. ၂၂:၃၇-၃၉) ဒါပေမဲ့ ပြီး​ခဲ့တဲ့ အပိုဒ်​မှာ ညွှန်း​ထားတဲ့ ကျမ်းချက်တွေ​က ခံစားချက်ကို ရှေ့တန်း​တင် တွေးခေါ်​လုပ်ကိုင်​ခြင်း​ရဲ့ အန္တရာယ်​ကို အလေးပေး​ထားတယ်။ ဥပမာ၊ ဒေါသထွက်​နေချိန်မှာ ဆုံးဖြတ်​ရင် ဘာဖြစ်​သွား​နိုင်သလဲ။ အရင်က ဆုံးဖြတ်​ဖူး​ရင် အဖြေကို သိ​ပါလိမ့်မယ်။ (သု. ၁၄:၁၇။ ၂၉:၂၂) စိတ်ဓာတ်ကျ​နေချိန်မှာ​ကော ပညာရှိရှိ ဆုံးဖြတ်​နိုင်​ပါ့​မလား။ (တော. ၃၂:၆-၁၂။ သု. ၂၄:၁၀) “ဘုရားသခင့် ပညတ်တရား​၏​ကျွန်” ဖြစ်​ခြင်း​ရဲ့ ပညာရှိ​မှုကို ကျမ်းစာမှာ ဖော်ပြထားတယ်။ (ရော. ၇:၂၅) အရေးကြီး ဆုံးဖြတ်ချက်​တွေ ချတဲ့အခါ ခံစားချက်ကို ရှေ့တန်း​တင်​မယ်ဆိုရင် အလွယ်တကူ မှား​သွားနိုင်တယ်။

၁၄။ ဆုံးဖြတ်ချက်​တချို့ကို ပြန်ပြင်​တာ သင့်လျော်​ကြောင်း ဘယ်လို သိရ​သလဲ။

^၁၄ ပညာရှိရှိ ဆုံးဖြတ်​ဖို့ လိုတယ်။ ဒါပေမဲ့ ဆုံးဖြတ်ပြီး​တာနဲ့ အဲ​ဒီအတိုင်း လုပ်​ရ​တော့မယ်​ဆိုတဲ့ သဘော မဟုတ်ဘူး။ ဆုံးဖြတ်​ချက်ကို ပြန်သုံးသပ်​ပြီး ပြင်​ရမယ့်​အချိန်တွေ ရှိပါ​လိမ့်မယ်။ ယောန​ခေတ်​က နိနေဝေမြို့​သားတွေ​နဲ့ပတ်သက်ပြီး ယေဟောဝါရဲ့ ပုံသက်သေ​ကို သတိပြု​ကြည့်ပါ။ “မြို့သား​တို့သည် မိမိတို့​လိုက်​သော အဓမ္မ​လမ်း​ကို လွှဲရှောင်​၍ ကျင့်​သော​အကျင့်များ​ကို ဘုရား​သခင်သည် မြင်လျှင် အရင်​ခြိ​မ်း​သော​ဘေးဒဏ်​ကို မပေး​ဘဲ​နေ​တော်မူ၏။” (ယောန ၃:၁၀) နိနေဝေမြို့​သားတွေ​ရဲ့ နောင်တ၊ သဘောထား ပြောင်းလဲ​မှုကို တွေ့​တဲ့အခါ မိမိရဲ့​ဆုံးဖြတ်​ချက်ကို ယေဟောဝါ ပြင်​ခဲ့တယ်။ ဒီနည်းအားဖြင့် အကျိုးသင့်အကြောင်းသင့်​သဘော၊ နှိမ့်ချမှု၊ စာနာမှု​ရှိကြောင်း ဖော်ပြ​ခဲ့တယ်။ လူများစွာ​လို တ​ဒင်္ဂ​ဒေါသ​ကို ရှေ့တန်း​တင်ပြီး မဆုံး​ဖြတ်​ခဲ့ဘူး။

၁၅။ ဘာတွေ​ကြောင့် ဆုံးဖြတ်ချက် ပြင်​ဖို့ လိုအပ်​နိုင်သလဲ။

^၁၅ ဆုံးဖြတ်​ချက်ကို ပြန်​စဉ်းစား​သင့်တဲ့​အချိန်တွေ​ရှိ​ နိုင်ပါတယ်။ အခြေအနေတွေ ပြောင်းလဲ​သွား​တဲ့အခါ ဖြစ်နိုင်တယ်။ ယေဟောဝါ​တောင် အခြေအနေ ပြောင်းလဲ​သွား​တဲ့အခါ​တွေမှာ ဆုံးဖြတ်​ချက်ကို ပြင်​ခဲ့တယ်။ (၃ ရာ. ၂၁:၂၀၊ ၂၁၊ ၂၇-၂၉။ ၄ ရာ. ၂၀:၁-၅) အချက်အလက်​သစ်​တွေကြောင့် ပြန်ပြင်​ရ​တဲ့အခါ​တွေလည်း ရှိနိုင်တယ်။ ဘုရင်​ဒါဝိဒ်ဟာ ရှောလု​ရဲ့ မြေး မေ​ဖိဗော​ရှက်​နဲ့ပတ်သက်ပြီး သတင်း​မှား ရခဲ့တယ်။ နောက်ပိုင်း သတင်း​မှန် ပြန်​ရ​တဲ့အခါ ဆုံးဖြတ်​ချက်ကို ပြင်​ခဲ့တယ်။ (၂ ရာ. ၁၆:၃၊ ၄။ ၁၉:၂၄-၂၉) တစ်ခါတလေ ကျွန်တော်တို့လည်း ဆုံးဖြတ်​ချက်ကို ပြန်ပြင်​တာ ပညာရှိ​နိုင်တယ်။

၁၆။ (က) ပညာရှိ ဆုံးဖြတ်ချက်​တွေ ချ​ရာမှာ အထောက်အကူ​ပြု​နိုင်တဲ့ လမ်းညွှန်ချက်​တချို့ကို ဖော်ပြ​ပါ။ (ခ) ချပြီး​သား ဆုံးဖြတ်ချက်​တွေကို ဘာကြောင့် ပြန်သုံးသပ်​သင့်သလဲ။ ဘယ်လိုနည်းနဲ့​လဲ။

^၁၆ အရေးကြီးဆုံး​ဖြတ်​ချက်ကို အ​လောတ​ကြီး မ​ချဖို့ ကျမ်းစာမှာ အကြံပေး​ထားတယ်။ (သု. ၂၁:၅) ဆုံးဖြတ်ချက်​နဲ့ပတ်သက်တဲ့ အချက်အလက်​တွေကို ဘက်ပေါင်းစုံ​က​နေ အချိန်ယူ စဉ်းစား​မယ်ဆိုရင် ပို​အောင်မြင်​ပါလိမ့်မယ်။ (၁ သက်. ၅:၂၁) အိမ်ထောင်ဦးစီး​ဟာ မဆုံး​ဖြတ်​ခင် ကျမ်းစာနဲ့ ခရစ်ယာန်​စာပေ​တွေမှာ ရှာဖွေ​လေ့လာဖို့၊ မိသားစုဝင်​တွေရဲ့ သဘောထားကို သုံးသပ်​ဖို့ အချိန်ယူ​သင့်တယ်။ ဇနီး​ပြောတာကို နားထောင်​ဖို့ အာဗြဟံ​ကို ဘုရားသခင် တိုက်တွန်း​ခဲ့တာ သတိရပါ။ (က. ၂၁:၉-၁၂) အကြီးအကဲ​တွေလည်း အချိန်ယူ ရှာဖွေလေ့လာ​သင့်တယ်။ အကျိုးသင့် အကြောင်းသင့်​ရှိပြီး နှိမ့်ချ​ကျိုးနွံ​တဲ့ အကြီးအကဲ​တွေဟာ ပြုပြင်ပြောင်းလဲ​ရမှာ​ကို မစိုးရိမ်​ဘူး။ အချက်အလက်​သစ်​တွေ ပေါ်လာ​လို့ ဆုံးဖြတ်​ချက်ကို ပြန်သုံးသပ်​ရ​တဲ့အခါ လူတွေ မလေးစား​တော့မှာ​ကို တွေးမ​ပူ​ကြဘူး။ သင့်တော်​ချိန်မှာ မိမိတို့​ရဲ့ တွေးခေါ်ပုံ​နဲ့ ဆုံးဖြတ်ချက်​တွေကို ပြန်ပြင်​ဖို့ အသင့်ရှိ​ကြ​တ​ယ်။ ကျွန်တော်တို့အားလုံး အဲ​ဒီ​ပုံသက်သေ​ကို လိုက်လျှောက်​သင့်တယ်။ ဒါက အသင်းတော်ရဲ့ စည်းလုံး​ငြိမ်သက်​မှုကို တိုးပွား​စေ​နိုင်တယ်။—တ. ၆:၁-၄။

၁၇။ ဆုံးဖြတ်ချက်ချ​ရာမှာ ဘယ်လို ပို​အောင်မြင်​နိုင်သလဲ။

^၁၇ ဆုံးဖြတ်ချက်​တချို့က ပိုကြီး​လေး​တ​ယ်။ ဒါကြောင့် အချိန်ယူပြီး ပို​စဉ်းစား​ဖို့၊ ပို​ဆုတောင်း​ဖို့ လိုတယ်။ အိမ်ထောင်ပြု​ရ​မလား၊ ဘယ်သူ​နဲ့ ပြု​ရ​မလဲဆိုတာ ခရစ်ယာန်​တချို့ ဆုံးဖြတ်​ကြ​တ​ယ်။ ဘယ်​အ​ချိန်မှာ ဘယ်လိုနည်းနဲ့ အချိန်ပြည့်​လုပ်ငန်းမှာ စပါဝင်​မယ်​ဆိုတာ​လည်း​ ကြီးလေး​တဲ့ ဆုံးဖြတ်ချက်​ပါပဲ။ ဒီလို​အခြေအနေ​တွေမှာ ပညာရှိ​လမ်းညွှန်​မှုကို ယေဟောဝါ ပေးနိုင်​မှန်း၊ ပေးထား​မှန်း အပြည့်အဝ ယုံကြည်​ဖို့ အရေးကြီးတယ်။ (သု. ၁:၅) ကျမ်းစာမှာ အကောင်းဆုံး အကြံဉာဏ် ရှာဖွေ​ပြီး ယေဟောဝါရဲ့ လမ်းညွှန်မှု​အတွက် ဆုတောင်း​ဖို့​လည်း လိုတယ်။ အလိုတော်​နဲ့အညီ​ချ​တဲ့ ဆုံးဖြတ်ချက်​တွေ​အတိုင်း လုပ်ဆောင်နိုင်စွမ်း​ကို ယေဟောဝါ ပေးနိုင်​မှန်း သတိရပါ။ ဒါကြောင့် အရေးကြီး ဆုံးဖြတ်ချက်​တွေ ချ​တော့မယ်​ဆိုရင် ‘ဒီ​ဆုံးဖြတ်ချက်​ဟာ ယေဟောဝါအပေါ်​ထားတဲ့ မေတ္တာကို ပေါ်လွင်​စေ​မလား။ ငါ့​မိသားစု​ကို ငြိမ်းချမ်း​ပျော်ရွှင်​စေ​မလား။ ငါ​စိတ်ရှည်​ကြင်နာကြောင်း ဖော်ပြ​မလား’ ဆိုပြီး မေးပါ။

၁၈။ ကိုယ်ပိုင် ဆုံးဖြတ်ချက် ချဖို့ ယေဟောဝါ ဘာကြောင့် မျှော်လင့်​သလဲ။

^၁၈ မိမိ​ကို ချစ်​ဖို့၊ ဝတ်ပြု​ဖို့ ယေဟောဝါ အတင်းအကျပ် ဖိအား​မပေး​ဘူး။ ဒါဟာ ကိုယ်ပိုင်​ရွေးချယ်မှု ဖြစ်တယ်။ လွတ်လပ်​စွာ ရွေးချယ်ပိုင်ခွင့် ပေးထား​တဲ့အတွက် မိမိ​ကို ဝတ်ပြု​မပြု ‘ရွေး’ ရမယ့်​တာဝန်နဲ့ လုပ်ပိုင်ခွင့်​ကို ဘုရားသခင် လေးစား​တ​ယ်။ (ယောရှု ၂၄:၁၅။ ဒေ. ၅:၄) ဒါပေ​မဲ့ ဘုရားရဲ့ လမ်းညွှန်ချက်​အပေါ် အခြေခံ​တဲ့ ဆုံးဖြတ်ချက်​တွေ​အတိုင်း လုပ်​ဆောင်ဖို့​လည်း မျှော်လင့်​တ​ယ်။ ယေဟောဝါရဲ့ လုပ်ဆောင်ပုံ​နည်းလမ်း၊ ကျမ်းစာမူ​တွေကို ယုံကြည်​မယ်ဆိုရင် ပညာရှိ​စွာ ဆုံးဖြတ်​နိုင်ပြီး​ စိတ်​တည်ကြည်သူ ဖြစ်မှန်း သက်သေပြ​နိုင်​ပါလိမ့်မယ်။—ယာ. ၁:၅-၈။ ၄:၈။