သမ္မာကျမ်းစာရှုထောင့် | သန့်ရှင်းခြင်း
သန့်ရှင်းခြင်း
ကျွန်ုပ်တို့ရဲ့ တစ်ကိုယ်ရေသန့်ရှင်းမှုကို ဘုရားသခင် အလေးထားပါသလား။
‘ကိုယ်စိတ်နှစ်ပါးကို ညစ်ညူးစေသောအရာရှိသမျှတို့နှင့် ကိုယ်ကိုကင်းစင်စေပါ။’၂ ကောရိန္သု ၇:၁။
သမ္မာကျမ်းစာပြောဆိုရာ
ဖန်ဆင်းရှင်ဘုရားသခင်က လူသားတွေကိုချစ်ပြီး သက်ရှည်၊ ကျန်းမာတဲ့ဘဝကို ပိုင်ဆိုင်စေချင်ပါတယ်။ ‘ငါ့ပညတ်တို့ကို သင်၏နှလုံး စောင့်ရှောက်ပါစေ။ အသက်တာရှည်သောကာလ နှစ်ပေါင်းများကိုလည်းကောင်း၊ ငြိမ်ဝပ်ခြင်းကိုလည်းကောင်း တိုးပွားစေလိမ့်မည်” လို့ ဘုရားသခင် ပြောထားတယ်။ (သုတ္တံ ၃:၁၊ ၂) လူသားတွေကို ဘုရားသခင်ချစ်တယ်ဆိုတာကို အစ္စရေးလူမျိုးကိုပေးခဲ့တဲ့ တစ်ကိုယ်ရေသန့်ရှင်းမှုနဲ့ပတ်သက်တဲ့ ပညတ်တွေကိုကြည့်ရင် သိနိုင်တယ်။ (တရားဟောရာ ၂၃:၁၂-၁၄) အစ္စရေးတွေဟာ အဲဒီပညတ်တွေကို လိုက်နာတဲ့အခါ ကျန်းမာရေးပိုကောင်းလာတယ်၊ ရောဂါကူးစက်မှုကနေ အကာအကွယ်ရတယ်။ ဘုရားသခင်ရဲ့ အဲဒီပညတ်ချက်တွေ မရရှိထားတဲ့ အီဂျစ်အပါအဝင် တခြားလူမျိုးတွေဟာ အဲဒီအကာအကွယ် မရခဲ့ကြဘူး။—တရားဟောရာ ၇:၁၂၊ ၁၅။
ဒီနေ့ခေတ်မှာလည်း အလားတူပါပဲ၊ ဆေးလိပ်သောက်ခြင်း၊ အရက်အလွန်အကျွံသောက်ခြင်း၊ မူးယစ်ဆေးဝါးသုံးစွဲခြင်း စတဲ့အကျင့်တွေဟာ “ကိုယ်စိတ်နှစ်ပါးကို ညစ်ညူးစေ” ပါတယ်။ အဲဒီအကျင့်တွေနဲ့ “ကိုယ်ကိုကင်းစင်စေ” တဲ့သူတွေဟာ အဖျားအနာနည်းတဲ့အပြင် အချိန်မတန်ဘဲ သေဆုံးတာမျိုးကိုလည်း ရှောင်နိုင်တယ်။ ကိုယ်တစ်ယောက်တည်း သီးသန့် နေထိုင်ဖို့ ဆိုတာလည်း မဖြစ်နိုင်တဲ့အတွက် သန့်ရှင်းခြင်းနဲ့ပတ်သက်တဲ့ ဘုရားသခင့်စံနှုန်းတွေကို လိုက်နာတာက တခြားသူတွေကို ထောက်ထားစာနာမှု တင်ပြရာလည်းရောက်တယ်။ —မာကု ၁၂:၃၀၊ ၃၁။
ကိုယ်ကျင့်တရားနဲ့ ဝတ်ပြုရေးသန့်ရှင်းမှုကိုလည်း ဘုရားသခင် အလေးထားပါသလား။
‘မတရားမေထုန်ပြုခြင်း၊ မသန့်ရှင်းခြင်း၊ သွေးသားဆန္ဒပြင်းပြခြင်း၊ မကောင်းသောတောင့်တခြင်း၊ တပ်မက်ခြင်းနှင့်ဆိုင်သည့် သင်တို့၏ကိုယ်အင်္ဂါများကို သေစေကြလော့။ ထိုအရာများကြောင့် ဘုရားသခင်၏ အမျက်တော် သင့်ရောက်လိမ့်မည်။’ကောလောသဲ ၃:၅၊ ၆။
သမ္မာကျမ်းစာပြောဆိုရာ
အစပိုင်းမှာဖော်ပြခဲ့သလိုပဲ ‘ကိုယ်စိတ်နှစ်ပါးကို ညစ်ညူးစေသောအရာရှိသမျှတို့နှင့် ကိုယ်ကိုကင်းစင်စေ’ ဖို့ သမ္မာကျမ်းစာမှာ တိုက်တွန်းထားတယ်။ ယေရှုခရစ်အချိန်မှာ ဂျူးဘာသာရေးခေါင်းဆောင်တွေအပါအဝင် လူများစွာဟာ တစ်ကိုယ်ရေသန့်ရှင်းမှုကို အလွန်အမင်း ဂရုစိုက်ခဲ့ကြပေမဲ့ ကိုယ်ကျင့်တရားနဲ့ ဝတ်ပြုရေးပိုင်း သန့်ရှင်းဖို့ကိုတော့ ဂရုမစိုက်ခဲ့ကြဘူး။ (မာကု ၇:၁-၅) ဘယ်အရာ ပိုသန့်ရှင်းသင့်တယ်ဆိုတာနဲ့ပတ်သက်ပြီး ယေရှု ဒီလိုပြောခဲ့တယ်– “ပြင်ပမှ လူအတွင်းသို့ဝင်သောအရာသည် လူကိုမညစ်ညူးစေနိုင်ကြောင်း သင်တို့မသိကြသလော။ ခံတွင်းသို့ ဝင်သမျှသည် . . . ဝမ်းထဲရောက်၍ ရေအိမ်သို့ဆင်းသွားရသည် မဟုတ်လော။” ဒီလိုလည်း ဆက်ပြောခဲ့တယ်– “လူအတွင်းမှ ထွက်သောအရာသည် လူကိုညစ်ညူးစေတတ်၏။ အကြောင်းမူကား လူအတွင်းရှိ စိတ်နှလုံးထဲမှထွက်လာသည့် မကောင်းသောအကြံအစည်များမှာ မတရားမေထုန်ပြုခြင်း၊ ခိုးခြင်း၊ လူ့အသက်ကိုသတ်ခြင်း၊ အိမ်ထောင်ရေးဖောက်ပြန်ခြင်း၊ သူ့ဥစ္စာကိုတပ်မက်ခြင်း၊ ဆိုးသွမ်းခြင်း၊ လှည့်စားခြင်း၊ အကျင့်ပျက်ခြင်း၊ မနာလိုမျက်စိရှိခြင်း၊ . . . မိုက်မဲခြင်းတို့ဖြစ်၏။ ဤဆိုးညစ်သောအရာအပေါင်းတို့သည် . . . လူကိုညစ်ညူးစေကြ၏။”—မာကု ၇:၁၈-၂၃။
တစ်ကိုယ်ရေသန့်ရှင်းမှုကို ဂရုစိုက်လွန်းပြီး ကိုယ်ကျင့်တရားနဲ့ ဝတ်ပြုရေးပိုင်းသန့်ရှင်းဖို့ ဂရုမစိုက်တဲ့သူတွေဟာ အပြင်ဘက်သန့်ပြီး အတွင်းဘက်မှာ ညစ်ပတ်နေတဲ့ ခွက်နဲ့တူတယ်လို့ ယေရှုပြောခဲ့တယ်။—မဿဲ ၂၃:၂၅၊ ၂၆။
ကျမ်းစာစံနှုန်းတွေက သင့်တင့်မျှတရဲ့လား။
“ဘုရားသခင်ကို ချစ်ခြင်းဟူသည် ကိုယ်တော်၏ပညတ်များကို လိုက်နာခြင်းဖြစ်၏။ ကိုယ်တော်၏ပညတ်များသည် ဝန်ထုပ်ဝန်ပိုး ဖြစ်သည်မဟုတ်။”၁ ယောဟန် ၅:၃။
သမ္မာကျမ်းစာပြောဆိုရာ
မိက္ခာ ၆:၈ မှာ ဒီလိုပြောထားတယ်– “တရားသဖြင့်ပြုခြင်း၊ ကရုဏာကိုနှစ်သက်ခြင်း၊ သင်၏ဘုရားသခင့်ရှေ့တော်၌ နှိမ့်ချသောစိတ်နှင့်ကျင့်နေခြင်းမှတစ်ပါး အဘယ်ပူဇော်သကာကို ထာဝရဘုရားတောင်းတော်မူသနည်း။” ဒါဟာ သင့်တင့်မျှတတဲ့ တောင်းဆိုချက် ဟုတ်တယ် မဟုတ်လား။ ဒါ့အပြင် ဖန်ဆင်းရှင်ဘုရားသခင်က ကိုယ်တော့်ကိုချစ်လို့ နာခံတာကိုပဲ လိုလားတယ်။ အဲဒီလိုလုပ်တဲ့သူတွေဟာ ပျော်ရွှင် ချမ်းမြေ့ကြတယ်။ (ဆာလံ ၄၀:၈) အမှားလုပ်မိတဲ့အခါ ဘုရားသခင်ရဲ့ ကရုဏာကနေ နှစ်သိမ့်မှုရနိုင်ပါတယ်။ “အဘသည် သားတို့ကို သနားစုံမက်သည်နည်းတူ ထာဝရဘုရားသည် ကြောက်ရွံ့သောသူတို့ကို သနားစုံမက်တော်မူ၏။ အကြောင်းမူကား ငါတို့ကိုယ်ခန္ဓာကိုသိတော်မူ၏။ ငါတို့သည် မြေမှုန့်ဖြစ်ကြောင်းကို အောက်မေ့တော်မူ၏။”—ဆာလံ ၁၀၃:၁၃၊ ၁၄။
အတိုချုပ်ပြောရရင် ကာယပိုင်း၊ ကိုယ်ကျင့်တရားပိုင်း၊ ဝတ်ပြုရေးပိုင်းတွေနဲ့ပတ်သက်တဲ့ ဘုရားသခင့်စံနှုန်းတွေဟာ ကိုယ်တော် ဘယ်လောက်ကောင်းမြတ်ကြောင်း၊ ကျွန်ုပ်တို့ကိုချစ်ကြောင်း ဖော်ပြတယ်။ အဲဒီစံနှုန်းတွေကို လိုလိုလားလားနာခံတာက ပညာရှိရာရောက်ပြီး ကိုယ်တော့်ကို ချစ်ကြောင်း တင်ပြရာရောက်ပါတယ်။
ကြိုက်လို ကြိုက်ငြား အကြောင်းအရာများ
ကင်းမျှော်စင်
ဆေးလိပ်သောက်တာကို ဘုရားလက်ခံသလား
ကျမ်းစာက ဆေးလိပ်အကြောင်း ဘာမှမပြောထားဘူး။ ဒါဆိုရင် ဆေးလိပ်အကြောင်း ဘယ်လိုသိနိုင်မလဲ။
ကင်းမျှော်စင်
သမ္မာကျမ်းစာက ဘဝပုံစံတွေကို ပြောင်းလဲပေးနိုင်—အောက်တိုဘာ ၂၀၁၂
အရက်၊ မူးယစ်ဆေးနဲ့ အကျင့်ဆိုးတွေ စွန့်ပစ်ခဲ့သူနှစ်ဦး ပျော်ရွှင်တဲ့သူတွေ ဘယ်လိုဖြစ်လာကြသလဲ။
နိုးလော့!
ကြိုတင်ကာကွယ်ပါ
ရိုးရှင်းတဲ့ ကာကွယ်မှုတွေကို လုပ်ဆောင်ခြင်းက အချိန်နဲ့ ငွေကုန်သက်သာစေမယ့်အပြင် အဖျားအနာနဲ့ ဒုက္ခဝေဒနာတွေ မဖြစ်အောင်လည်း ကူညီပေးနိုင်တယ်။
