ဟေရှာယ ၆၅:၁-၂၅
၆၅ “ငါ့ကို မမေးတဲ့သူတွေကို ပြန်ဖြေဖို့၊ငါ့ကို မရှာတဲ့သူတွေကို အတွေ့ခံဖို့ ငါအသင့်ရှိတယ်။+
ငါ့နာမည်ကိုခေါ်ပြီး ဆုမတောင်းတဲ့ လူမျိုးကိုလည်း ‘ငါဒီမှာရှိတယ်’ လို့ ပြောတယ်။+
၂ ခေါင်းမာတဲ့သူတွေ၊+စိတ်ထင်ရာလုပ်ပြီး+ လမ်းမှားလိုက်နေသူတွေကို+ငါတစ်နေ့လုံး လက်ကမ်းထားတယ်။
၃ သူတို့ဟာ ငါစိတ်ဆိုးအောင် ပြောင်ပြောင်တင်းတင်း လုပ်နေတဲ့သူတွေပဲ။+
ဥယျာဉ်တွေမှာ ယဇ်ပူဇော်ပြီး+ အုတ်ခဲတွေပေါ်မှာ မီးရှို့ပူဇော်တဲ့သူတွေပဲ။
၄ သူတို့က အုတ်ဂူတွေကြားမှာ ထိုင်ပြီး+ မှောင်မိုက်အရပ်တွေမှာ ညကိုကုန်လွန်စေကြတယ်။
ဝက်သား စားကြတယ်။+
ညစ်ညူးတဲ့ အသားပြုတ်ရည်ကို အိုးခွက်တွေထဲ ထည့်ထားကြတယ်။+
၅ ‘ကိုယ့်ဟာကိုယ် နေပါ။ ငါ့အနား မကပ်နဲ့။
ငါက မင်းထက် ပိုသန့်ရှင်းတယ်’ လို့ ပြောကြတယ်။
ဒီလူတွေဟာ ငါ့နှာခေါင်းထဲဝင်လာတဲ့ မီးခိုး၊ တစ်နေ့လုံး လောင်နေတဲ့ မီးပဲ။
၆ အဲဒါတွေကို ငါ့ရှေ့မှာ ရေးမှတ်ထားတယ်။
ငါငြိမ်နေမှာ မဟုတ်ဘူး။
သူတို့ကို ပြန်ဆပ်ပေးမယ်။+
အပြည့်အဝ ပြန်ဆပ်ပေးမယ်။
၇ သူတို့က တောင်တန်းတွေပေါ်မှာ မီးရှို့ပူဇော်ပြီး တောင်ကုန်းတွေပေါ်မှာ ငါ့ကို မထီမဲ့မြင်ပြုကြတယ်။+
ဒါကြောင့် ငါက သူတို့ရဲ့အမှားတွေ၊ ဘိုးဘေးတွေရဲ့ အမှားတွေအတွက် ပြန်ဆပ်ပေးမယ်။+
သူတို့ရထိုက်တဲ့အခကို အရင်ဆုံး အပြည့်အဝပြန်ဆပ်မယ်” လို့ ယေဟောဝါ ပြောတယ်။
၈ ယေဟောဝါ ပြောတာက–
“အရည်ရွှမ်းတဲ့ စပျစ်သီးတစ်ပြွတ်ကို တွေ့တဲ့အခါ‘အဲဒီမှာ အသီးကောင်းတွေ ရှိသေးတယ်၊ မဖျက်ဆီးလိုက်နဲ့’ လို့ပြောတတ်သလို ငါကလည်း ငါ့ကျွန်တွေရဲ့ အကျိုးအတွက် အဲဒီလိုလုပ်ဆောင်မယ်။
အကုန်လုံးကို ဖျက်ဆီးမှာ မဟုတ်ဘူး။+
၉ ငါက မျိုးနွယ်ကို ယာကုပ်ထဲကနေ ပေါ်ထွက်စေမယ်။
ငါ့တောင်တန်းတွေကို အမွေဆက်ခံမယ့်သူကို ယုဒထဲကနေ ပေါ်ထွက်စေမယ်။+
ငါရွေးချယ်ထားတဲ့သူတွေက အဲဒီပြည်ကို ပိုင်ဆိုင်ရလိမ့်မယ်။
အဲဒီမှာ ငါ့ကျွန်တွေ နေထိုင်ရလိမ့်မယ်။+
၁၀ ရှာရုန်လွင်ပြင်ဟာ+ သိုးတွေအတွက် စားကျက်မြေ ဖြစ်လာမယ်။
အာခေါ်ချိုင့်ဝှမ်းလွင်ပြင်ဟာ+ သိုးနွားတွေ နားတဲ့နေရာ ဖြစ်လာမယ်။
ငါ့ကိုရှာတဲ့လူတွေအတွက် အဲဒီလိုလုပ်ဆောင်ပေးမယ်။
၁၁ ဒါပေမဲ့ မင်းတို့က ငါယေဟောဝါကို ပစ်ပယ်တယ်။+
ငါ့ရဲ့ သန့်ရှင်းတဲ့တောင်ကို မေ့လျော့တယ်။+
ကံကောင်းခြင်း နတ်ဘုရားအတွက် စားပွဲတည်ခင်းတယ်။
ကံကြမ္မာ နတ်ဘုရားအတွက် ခွက်ထဲ စပျစ်ဝိုင်ဖြည့်ပြီး ဆက်သတယ်။
၁၂ ငါခေါ်ပေမဲ့ မင်းတို့ပြန်မထူးဘူး။
ငါပြောပေမဲ့ နားမထောင်ဘူး။+
ငါ့ရှေ့မှာ မကောင်းတာတွေပဲ ဆက်လုပ်ပြီး ငါမကြိုက်တာတွေကို ရွေးချယ်တယ်။+
ဒါကြောင့် မင်းတို့အတွက် ဓားဘေးကို ငါစီမံထားမယ်။+
မင်တို့အားလုံး အသတ်ခံရဖို့ ဦးညွှတ်ရကြလိမ့်မယ်။”+
၁၃ အချုပ်အခြာအာဏာပိုင်ရှင် ယေဟောဝါ ပြောတာက–
“ငါ့ကျွန်တွေ စားရလိမ့်မယ်။ မင်းတို့ကတော့ ဆာလောင်မယ်။+
ငါ့ကျွန်တွေ သောက်ရလိမ့်မယ်။+ မင်းတို့ကတော့ ရေငတ်မယ်။
ငါ့ကျွန်တွေ ဝမ်းမြောက်ရလိမ့်မယ်။+ မင်းတို့ကတော့ အရှက်ကွဲမယ်။+
၁၄ ငါ့ကျွန်တွေဟာ စိတ်ကြည်နူးနေတဲ့အတွက် ရွှင်လန်းစွာ ကြွေးကြော်လိမ့်မယ်။
မင်းတို့ကတော့ စိတ်နာကျင်နေတဲ့အတွက် ညည်းတွားအော်ဟစ်မယ်။
စိတ်ကြေကွဲနေတဲ့အတွက် ငိုကြွေးမြည်တမ်းရလိမ့်မယ်။
၁၅ မင်းတို့ချန်ခဲ့တဲ့ နာမည်ဟာ ငါရွေးချယ်ထားသူတွေ ကျိန်စာတိုက်တဲ့အခါ သုံးဖို့ပဲ ဖြစ်သွားမယ်။
အချုပ်အခြာအာဏာပိုင်ရှင် ယေဟောဝါက မင်းတို့အားလုံးကို ကွပ်မျက်မယ်။
ငါ့ကျွန်တွေကိုတော့ နာမည်နောက်တစ်မျိုးနဲ့ မှည့်ခေါ်မယ်။+
၁၆ ဒါကြောင့် ကမ္ဘာပေါ်မှာ ကောင်းချီးတောင်းခံသူတွေဟာ အမှန်တရားရဲ့ ဘုရားသခင်ဆီကပဲ ကောင်းချီးခံစားရမယ်။
ကမ္ဘာပေါ်မှာ တိုင်တည်ကျိန်ဆိုသူတွေဟာ အမှန်တရားရဲ့ ဘုရားသခင်ကိုပဲ တိုင်တည်ကျိန်ဆိုလိမ့်မယ်။+
အတိတ်ကဒုက္ခတွေကို မေ့လျော့သွားမယ်။
အဲဒါတွေဟာ ငါ့ရှေ့ကနေ ပျောက်ကွယ်သွားမယ်။+
၁၇ ကြည့်ပါ။ ကောင်းကင်သစ်နဲ့ မြေကြီးသစ်ကို ငါဖန်ဆင်းနေတယ်။+
အရင်တုန်းက ဖြစ်ခဲ့တာတွေကို သတိရတော့မှာ မဟုတ်ဘူး။
အဲဒါတွေဟာ စိတ်ထဲပေါ်လာတော့မှာ မဟုတ်ဘူး။+
၁၈ ငါဖန်ဆင်းနေတဲ့ အရာအတွက် ထာဝစဉ် ရွှင်လန်းဝမ်းမြောက်ကြပါ။
ဂျေရုဆလင်မြို့ကို ရွှင်လန်းစေတဲ့အရာ၊လူတွေကို အားရရွှင်လန်းစေတဲ့ အရာအဖြစ် ငါဖန်ဆင်းနေတယ်။+
၁၉ ငါက ဂျေရုဆလင်မြို့ကြောင့် ဝမ်းမြောက်မယ်။ ငါ့လူတွေကြောင့် ရွှင်လန်းမယ်။+
အဲဒီမှာ ငိုကြွေးသံတွေ၊ ကူပါကယ်ပါဆိုတဲ့ အသံတွေ ကြားရတော့မှာ မဟုတ်ဘူး။”+
၂၀ “အဲဒီမှာ ရက်အနည်းငယ်ပဲ အသက်ရှင်တဲ့ နို့စို့ကလေးတွေ ရှိမှာ မဟုတ်ဘူး။
သက်တမ်းစေ့မနေရတဲ့ အသက်ကြီးသူတွေလည်း ရှိမှာ မဟုတ်ဘူး။
အသက်တစ်ရာမှာ သေဆုံးတဲ့သူကို ကလေးအရွယ်ပဲ ရှိသေးတယ်လို့ ယူမှတ်ကြလိမ့်မယ်။
အပြစ်ကျူးလွန်တဲ့သူဟာ အသက်တစ်ရာ ရှိနေရင်တောင် ကျိန်ခြင်းခံရလိမ့်မယ်။*
၂၁ လူတွေက အိမ်တွေဆောက်ပြီး ကိုယ်တိုင်နေထိုင်ရလိမ့်မယ်။+
စပျစ်ခြံတွေစိုက်ပြီး စပျစ်သီးတွေကို ကိုယ်တိုင်စားသုံးရလိမ့်မယ်။+
၂၂ သူတို့ဆောက်တဲ့အိမ်မှာ တခြားသူတွေ နေထိုင်မှာ မဟုတ်ဘူး။
သူတို့စိုက်ပျိုးတဲ့ အပင်တွေကို တခြားသူတွေ စားသုံးမှာ မဟုတ်ဘူး။
ငါ့လူတွေရဲ့ သက်တမ်းဟာ သစ်ပင်ရဲ့ သက်တမ်းလို ဖြစ်မယ်။+
ငါရွေးချယ်ထားသူတွေဟာ ကိုယ့်လုပ်အားရဲ့ အကျိုးကျေးဇူးကို အပြည့်အဝ ခံစားရလိမ့်မယ်။
၂၃ သူတို့ရော သားမြေးတွေပါ+ ငါယေဟောဝါပေးတဲ့ ကောင်းချီးကို ခံစားရတဲ့မျိုးနွယ် ဖြစ်လိမ့်မယ်။+
ဒါကြောင့် သူတို့ အပင်ပန်းခံခဲ့သမျှ အချည်းနှီးဖြစ်မှာ မဟုတ်ဘူး။+
မွေးလာတဲ့ ကလေးတွေလည်း ဘေးဒုက္ခခံရမှာ မဟုတ်ဘူး။
၂၄ သူတို့မခေါ်ခင်ကတည်းက ငါထူးမယ်။
သူတို့ပြောလို့မဆုံးခင် ငါနားထောင်ပြီး အဖြေပေးမယ်။
၂၅ ဝံပုလွေနဲ့သိုးသငယ် အတူကျက်စားလိမ့်မယ်။
ခြင်္သေ့က နွားလို ကောက်ရိုးစားလိမ့်မယ်။+
မြွေက မြေမှုန့်ကိုပဲ စားလိမ့်မယ်။
ငါ့ရဲ့ သန့်ရှင်းတဲ့တောင်တစ်ပြင်လုံးမှာ သူတို့ အန္တရာယ်ပြုမှာ၊ ဖျက်လိုဖျက်ဆီးလုပ်မှာ မဟုတ်ဘူး”+ လို့ ယေဟောဝါပြောတယ်။
အောက်ခြေမှတ်ချက်များ
^ “အသက်တစ်ရာ မပြည့်သူကို ကျိန်ခြင်းခံရသူလို့ ယူမှတ်ကြလိမ့်မယ်” လည်းဖြစ်နိုင်။
