၂၀၁၃ ခုနှစ်၊ ဩဂုတ်​လ​ဟာ ဖိလစ်ပိုင်​နိုင်ငံက ယေဟောဝါသက်သေတွေ​အတွက် သမိုင်း​မှတ်တိုင်​တစ်ခု ဖြစ်ပါတယ်။ အကြောင်းကတော့ ဖိလစ်ပိုင်​နိုင်ငံမှာ တစ်ထောင်​ခု​မြောက် ဝတ်ပြုရာ​ခန်းမ​ကို ဆောက်လုပ်ပြီး​စီး​ခဲ့လို့​ပါပဲ။ တခြား​နိုင်ငံ တော်​တော်​များများ​လို​ပဲ ဖိလစ်ပိုင်​နိုင်ငံက အသင်းတော်​တွေဟာ အကူအညီ​သာ မရှိဘူး​ဆိုရင် မိမိတို့​ဘာသာ ကိုယ်ပိုင် ဝတ်ပြုရာ​ခန်းမ ဆောက်လုပ်ဖို့ ငွေကြေး မတတ်​နိုင်သလို ဆောက်လုပ်ရေး အတွေ့အကြုံ​လည်း မရှိကြဘူး။ နှစ်​အတော်ကြာ​တဲ့​အထိ တချို့​အသင်းတော်​တွေဟာ ကိုယ်ပိုင်​အိမ်တွေမှာ ဝတ်ပြု​ခဲ့​ကြပြီး တခြား​အသင်းတော်တွေက​တော့ ဝါး​အိမ်​ငယ်​လေး​တွေ​မှာ ဝတ်ပြု​ခဲ့​ကြတယ်။

ဖိလစ်ပိုင်​နိုင်ငံနဲ့ တခြား​နိုင်ငံ​များစွာမှာ ယေဟောဝါ​သက်သေ အရေအတွက် တဖြည်းဖြည်း များ​လာတဲ့​အတွက် ဝတ်ပြုရာ​ခန်းမ​တွေ လိုအပ်​လာတယ်။ ဒါနဲ့ ၁၉၉၉ ခုနှစ်မှာ ယေဟောဝါသက်သေတွေရဲ့ အုပ်ချုပ်ရေး​အဖွဲ့က ဆင်းရဲနွမ်းပါး​တဲ့ နိုင်ငံတွေ​မှာ ဝတ်ပြုရာ​ခန်းမ​တွေ တည်ဆောက်ဖို့ အစီအစဉ် တစ်ခု ဆွဲ​ခဲ့တယ်။ အဲဒီ​အစီအစဉ်​ကတော့ ဒေသခံ​သက်သေခံတွေ တတ်​နိုင်သလောက် ထည့်ဝင်တဲ့ အလှူငွေနဲ့ တခြား​နိုင်ငံတွေက ထည့်ဝင်တဲ့ အလှူငွေ​ပေါင်း​ပြီး ရန်ပုံငွေ ယူတယ်။ လေ့ကျင့်​ခံ​ထားရတဲ့ ဆောက်လုပ်ရေး လုပ်သားတွေကို အုပ်စု​လေး​တွေ ဖွဲ့​ပြီး အသင်းတော်​တွေ ဝတ်ပြုရာ​ခန်းမ တည်ဆောက်တဲ့​အခါ အကူအညီ ပေးတယ်။ ၂၀၀၁ ခုနှစ်၊ နိုဝင်ဘာလ​မှာ အဲဒီ​အစီအစဉ်ကို ဖိလစ်ပိုင်​နိုင်ငံမှာ စတင် အကောင်အထည်ဖော်​ခဲ့တယ်။

အီ​လူ​မီ​နာ​ဒို​ဟာ တစ်ထောင်​ခု​မြောက် ဝတ်ပြုရာ​ခန်းမ တည်ရှိရာ​နေရာ ဘူ​လာ​ကန်​ပြည်နယ်၊ မာ​ရီ​လာအို​မှာ ရှိတဲ့ အသင်းတော်က ယေဟောဝါသက်သေတစ်ယောက် ဖြစ်တယ်။ သူ​ဒီလို​ပြောပြတယ်– “ခရစ်ယာန် ညီအစ်ကို​အသင်းအပင်း​ဆိုတာ ဒီလို​ပါလား​လို့ သိခဲ့​ရ​ပါပြီ။ ယောက်ျား၊ မိန်းမ၊ လူကြီးလူငယ်​အားလုံး လုပ်အားပေး​ကြတယ်။ ချစ်ချစ်တောက် ပူ​နေတဲ့ နေ​အောက်မှာ အတူ​အလုပ်​လုပ်ကြတယ်။ တစ်​နေ​ကုန် အလုပ်လုပ်​ပြီးတဲ့နောက်မှာ ပင်ပန်း​နွမ်း​နယ်​နေကြပေမဲ့​လည်း လုပ်ပြီး​သွားတာ​တွေကို ကြည့်ပြီး ပီတိဖြစ်​ရတယ်။”

ယေဟောဝါ​သက်သေ မဟုတ်တဲ့​သူတွေတောင် ညီအစ်ကို​၊ ညီအစ်မ​တွေ အလုပ်လုပ်​နေတာကို ကြည့်ပြီး ချီးကျူး​ကြတယ်။ သဲတွေ၊ ကျောက်စရစ်​တွေကို ဆောက်လုပ်ရေး​နေရာကို သယ်ပို့​ပေးတဲ့ ထရပ်ကား​ပိုင်ရှင်​က “ခင်ဗျားတို့​လူတွေ များ​လိုက်တာ၊ ပုရွက်ဆိတ်​တွေ ကျ​နေတာပဲ။ အားလုံး အလုပ်လုပ်​နေကြတယ်။ ဒီလိုမျိုး တစ်ခါ​မှ မတွေ့ဖူး​ဘူး” လို့ ပြောခဲ့တယ်။

စပြီး တည်ဆောက်တဲ့​အချိန်​ကနေ ရက်သတ္တပတ် ခြောက်​ပတ် မပြည့်​ခင်မှာ ခန်းမ​ကို ဆောက်လုပ်​ပြီးစီး​သွားပါ​တယ်။ ဝတ်ပြုရာ​ခန်းမ ဆောက်လုပ်ခြင်း​အလုပ် မြန်မြန် ပြီးသွား​တဲ့​အတွက် ယေဟောဝါသက်သေတွေ​ဟာ အရေးကြီးတဲ့ ဘုရားသခင့်​နိုင်ငံတော် သတင်းကောင်း ဟောပြောခြင်း​လုပ်ငန်းမှာ အပြည့်အဝ ပြန်ပါ​ဝင်နိုင်​ခဲ့​ကြတယ်။—မဿဲ ၂၄:၁၄။

ဒေသခံ​ယေဟောဝါသက်သေ​တစ်ယောက်ဖြစ်တဲ့ အယ်လင် ဒီလို​ပြောတယ်– “အရင်​ခန်းမ​အဟောင်း​တုန်း​က အားလုံး အထဲမှာ ထိုင်​ဖို့ မဆံ့​ဘူး။ အတော်များများ​က အပြင်မှာ ထိုင်​ရတယ်။ အခု ခန်းမ​အသစ်​က လှ​လည်း လှတယ်။ သက်သောင့်သက်သာ​လည်း ရှိတယ်။ ဒါကြောင့် အစည်းအဝေးတွေကနေရတဲ့ သွန်သင်ချက်တွေ၊ အားပေးမှု​တွေ​ကနေ ပိုပြီး အကျိုး​ခံစား​ကြရတယ်။”