ဘုရားသခင်က သစ္စာရှိခရစ်ယာန်တချို့ကို အရေအတွက် အကန့်အသတ်နဲ့ ရွေးချယ်ထားတယ်။ သူတို့ဟာ သေဆုံးပြီးနောက် ကောင်းကင်အသက်တာကို ရှင်ပြန်ထမြောက်ပါလိမ့်မယ်။ (၁ ပေတရု ၁:​၃၊ ၄) သူတို့ဟာ ရွေးချယ်ခံရပြီးတာနဲ့ ယုံကြည်ခြင်း ခိုင်ခံ့နေအောင်၊ အမူအကျင့်တွေ သန့်ရှင်းနေအောင် ဆက်ထိန်းသိမ်းရမယ်။ အဲဒီလိုမလုပ်ရင် ကောင်းကင်အမွေကို ရရှိဖို့ အရည်အချင်းပြည့်မီတော့မှာ မဟုတ်ဘူး။​​—ဧဖက် ၅:၅။ ဖိလိပ္ပိ ၃:​၁၂–​၁၄။

ကောင်းကင်မှာ သူတို့ဘာလုပ်ကြမလဲ

 ယေရှုနဲ့အတူ ဘုရင်တွေ၊ ပုရောဟိတ်တွေအဖြစ် အနှစ် ၁,၀၀၀ အုပ်ချုပ်ကြပါလိမ့်မယ်။ (ဗျာဒိတ် ၅:​၉၊ ၁၀။ ၂၀:၆) သူတို့ဟာ “မြေကြီးသစ်” ဖြစ်တဲ့ မြေကြီးဆိုင်ရာအဖွဲ့အစည်းကို အုပ်ချုပ်မယ့် “ကောင်းကင်သစ်” တစ်နည်းအားဖြင့် ကောင်းကင်အစိုးရကို တည်ထောင်မှာ ဖြစ်တယ်။ ဒါ့အပြင် ဘုရားသခင့် မူလရည်ရွယ်ချက်အတိုင်း လူသားအားလုံးကို ဖြောင့်မတ်တဲ့အခြေအနေတွေ ပြန်ရရှိအောင် လုပ်ဆောင်ပေးပါလိမ့်မယ်။​—ဟေရှာယ ၆၅:၁၇။ ၂ ပေတရု ၃:​၁၃။

ကောင်းကင်ကို ဘယ်နှစ်ယောက် ရှင်ပြန်ထမြောက်ကြမလဲ

 ကောင်းကင်အသက်တာကို ရှင်ပြန်ထမြောက်ကြမယ့်သူ ၁၄၄,၀၀၀ ရှိတယ်လို့ ကျမ်းစာမှာ ဖော်ပြထားတယ်။ (ဗျာဒိတ် ၇:၄) ဗျာဒိတ် ၁၄:၁–၃ မှာ မှတ်တမ်းတင်ထားတဲ့ စိတ်အာရုံမှာ တမန်တော်ယောဟန်က “ဇိအုန်တောင်ပေါ်တွင် သိုးသငယ် ရပ်နေသည်ကို ငါမြင်၏။ . . . တစ်သိန်းလေးသောင်းလေးထောင်သည် သူနှင့်အတူရှိ၏” လို့ ဖော်ပြထားတယ်။ အဲဒီစိတ်အာရုံမှာ ဖော်ပြထားတဲ့ “သိုးသငယ်” ဆိုတာ ရှင်ပြန်ထမြောက်ပြီးဖြစ်တဲ့ ယေရှုကို ဆိုလိုတယ်။ (ယောဟန် ၁:​၂၉။ ၁ ပေတရု ၁:​၁၉) “ဇိအုန်တောင်” ဆိုတာကတော့ ယေရှုနဲ့အတူ ကောင်းကင်မှာ အုပ်ချုပ်မယ့် ၁၄၄,၀၀၀ နဲ့ ယေရှုရဲ့ ချီးမြှောက်ခံရတဲ့ အနေအထားကို ဆိုလိုတယ်။​—ဆာလံ ၂:၆။ ဟေဗြဲ ၁၂:၂၂။

 ဘုရားသခင့်နိုင်ငံတော်မှာ ခရစ်တော်နဲ့အတူ အုပ်ချုပ်ဖို့ ‘ခေါ်ယူရွေးကောက်တော်မူခြင်း ခံရသူတွေ’ ကို “သိုးစုငယ်” ဆိုပြီး ရည်ညွှန်းထားတယ်။ (ဗျာဒိတ် ၁၇:၁၄။ လုကာ ၁၂:၃၂) ဒါကြောင့် ယေရှုရဲ့ သိုးအရေအတွက်အားလုံးနဲ့ နှိုင်းယှဉ်လိုက်ရင် ဒီအရေအတွက်ဟာ နည်းနေလိမ့်မယ်ဆိုတာ သိရတယ်။​—ယောဟန် ၁၀:၁၆။

ကောင်းကင်သွားမယ့်သူတွေနဲ့ပတ်သက်တဲ့ ယူဆချက်အမှားများ

 ယူဆချက်အမှား- ဗျာဒိတ်ကျမ်းမှာ ဖော်ပြထားတဲ့ ၁၄၄,၀၀၀ ဟာ စာသားအတိုင်း မဟုတ်ဘဲ တင်စားချက်သာ ဖြစ်တယ်။

 အမှန်တရား- ဗျာဒိတ်ကျမ်းမှာ ကိန်းဂဏန်းတွေကို တင်စားချက်အနေနဲ့ သုံးထားတာမှန်ပေမဲ့ တချို့ကိန်းဂဏန်းတွေကိုတော့ တကယ့်အရေအတွက်အနေနဲ့ ဖော်ပြပါတယ်။ ဥပမာ၊ “သိုးသငယ်၏ တမန်တော် တစ်ဆယ့်နှစ်ပါးတို့၏ အမည်တစ်ဆယ့်နှစ်ခု” လို့ ဖော်ပြထားတယ်။ (ဗျာဒိတ် ၂၁:၁၄) အဲဒီလိုပဲ၊ ၁၄၄,၀၀၀ အရေအတွက်ကို တကယ့်စာသားအတိုင်း ယူနိုင်တယ်လို့ ကောက်ချက်ချနိုင်ဖို့ ခိုင်လုံတဲ့ အထောက်အထားတွေကို သုံးသပ်ကြည့်ပါ။

 “တံဆိပ်ခတ်ခံရသူ [ဒါမှမဟုတ် ကောင်းကင်အသက်တာရရှိဖို့ အတည်ပြုခံရသူ] တစ်သိန်းလေးသောင်းလေးထောင်” ဆိုပြီး ဗျာဒိတ် ၇:၄ မှာ မှတ်တမ်းတင်ထားတယ်။ ဒီကျမ်းချက်ရဲ့ ကပ်လျက်မှာရှိတဲ့ ရှေ့နောက်စကားမှာ ဒုတိယအုပ်စုကို “အဘယ်သူမျှ မရေတွက်နိုင်သော လူအုပ်ကြီး” ဆိုပြီး ကွဲပြားခြားနားစွာ ဖော်ပြထားတယ်။ ဒီ “လူအုပ်ကြီး” ကလည်း ဘုရားသခင်ဆီက ကယ်တင်ခြင်း ရရှိထားသူတွေ ဖြစ်တယ်။ (ဗျာဒိတ် ၇:​၉၊ ၁၀) ၁၄၄,၀၀၀ အရေအတွက်ဟာ တင်စားချက်ဖြစ်ပြီး အရေအတွက်အတိအကျမသိတဲ့ အုပ်စုဖြစ်မယ်ဆိုရင် အုပ်စုနှစ်စုနဲ့ပတ်သက်ပြီး ကွဲပြားခြားနားစွာ ဖော်ပြထားတာက အဓိပ္ပာယ်ရှိတော့မှာ မဟုတ်ဘူး။ a

 ဒါ့အပြင် ၁၄၄,၀၀၀ ကို “အဦးသီးသော အသီးများအဖြစ် လူသားတို့ထဲမှ ဝယ်ယူသောသူများ” လို့ ဖော်ပြထားတယ်။ (ဗျာဒိတ် ၁၄:၄) “အဦးသီးသောအသီးများ” ဆိုတဲ့ အသုံးအနှုန်းက အရေအတွက်အနည်းငယ်သာရှိတဲ့ ကိုယ်စားလှယ်တွေကို ရည်ညွှန်းတယ်။ မရေမတွက်နိုင်အောင်များပြားတဲ့ ကမ္ဘာမြေပေါ်က လက်အောက်ခံပြည်သူတွေကို ကောင်းကင်ကနေ ခရစ်တော်နဲ့အတူ အုပ်ချုပ်ကြမယ့်သူတွေနဲ့ပတ်သက်ပြီး အဲဒီလိုရည်ညွှန်းတာက တကယ့်ကို သင့်လျော်ပါတယ်။​—ဗျာဒိတ် ၅:​၁၀။