ǂÂi re sao ra-i xa: Karens ge ǁâudīb tawa disi haigu ǀgaiba ge hâ i tsî ǂanǂansa khoe-i domma ge a ǁnâu.

Karens ge ǁîs ǀhōs Jessicas ǃoa ge ǂnan, hîna ge ǀgam xûi-i bottle kha ǁîs ǃommkha ǃnâ ūhâ isa. ǁÎs ge ge mû ǁkhā i alkoholi asa. Jessicas ge ǀgui xûi-i bottla Karens aiǃâ ge ūhā tsî ge mî: “Sas kom ǂkhariro tama hâ o, xûi-e tsâs ǃaroma?”

Karens ge ge ǂgao tama hâ i, xawes ge Jessicasa ge ǁîs ǃgâi ǀhōsa i. Karens ge ge ǂgao tama hâ i, is Jessicasa tā ǂâi ǁîs a ǁkhoao ti. ǁNās ǂamais ge Jessicasa ǃkhū hâ ǁgâusa xu ra hā. Tsî ǁîs ga ra ā o, o i ge ǁnā-e tsū tama hâ. ‘ǀGui bottli ǀguib kom o,’ dis ge Karensa aitsama ra mîbasen. ‘Xûi-e ās khom ǀhububuǀhubusen xūna sîsenūs ǀkha ǀgui tama hâ o.’

Tare-ets ga dī hâ, Karens ǁharodi ǃnâts ga hâhâ o?

Sats a hamsats ge nî ǂan, gā-ai mîǁguibats ga nēti ī mâsib ǃnâ dī ǂgao o. Sats ǃnâ hâ ǂans ge sats a hamsa ǃoa ra ǁnaeǁgau, satsa ra mîba-e hamts asa tsî tare-ets mâbas tsîna. ǂAnsats ga ra ūhâ o, ots ge ǀgaiba ūhâ sa ûiba ǂgaeǂguisa tsî mā-am tide în ǀnî khoena sa ûiba tā ǂgaeǂgui.—1 Korinteǁîn 9:26, 27.

Matits ǁnāti ī ǃnôa ǀgaiba a omkhâi ǁkhā? Sao ra dîde ǃereams ge nî hui tsi.

Sats ūhâ ǁkhāsib tsî ǃgâi ǀgaugu tsîn ge nî hui tsi ǀgaisa ǂgomǃgâsiba ûhâsa.

ELOBMÎS AIǁGAUDI: Apostle Paulub ge ge xoa: “Tsî ǃhoas ǃnâ ta a gâre khoe xawe ta ǂans ǃnâ ǁnāti ī tamasa.” (2 Korinteǁîn 11:6) ǃGaoǃgâxase xoade ôaǃnâs ǃnâ-ūb ge Pauluba ǁaposase ge mâǀgaibe ǁkhā i, ǃgomsin gere hāǂam bi xawe. ǁÎb ge tātsēs tsîna ge mā-am tama hâ i în khoen di ǁgai ǃhoa ǀgauba ǁîb di ǀgaisa ǂgomǃgâsiba khôaǁnâ.—2 Korinteǁîn 10:10; 11:5.

ǁÎ-AITSAMA ÔAǃNÂSEN RE: Xoamâi re sats ǃgâise a dī ǁkhā xūna.

Sats ǃnâ ra mâǂoa ǀgauga xoa re. (aiǁgause, ǃgâiǂgaoxats a? auxats a? ǂgomǃnâ-e ǁkhāts a? ǁaeba ǃgôaǃgâ îts ta?)

Oms ga ra om-e o, o i ge ǂhuri haiba ǁaegub ǃnâ ra khaoǂgā-e omsa ra ǃkhōmâise, xawe ǁnā haib ga ǃgâise khaoǂgā-e tama io, os ge ǁnā omsa a ǁnā ǁkhā. ǁNās ge a ǀgui sats ga ra mā-am o, î-i sa ǂkhabusasiga satsa ǂgaeǂgui.

ELOBMÎS AIǁGAUDI: Paulub ge ǁîb di ǂkhabusasiga ge ǂan i. ǁÎgu xab ge ge xoa: “Elob di ǂhanub ǃnâ ta ra ǃgâiaǂgao, ǃnāb di khoeb ǃoa. Xawe ta ge ti uniǁaedi ǃnâ ǀkhara ǂhanu-e ra mû, ti ǂâis di ǂhanu-e ra ǂnoagu-ū-i, tsî ǁoreb di ǂhanu-i, ti uniǁaedi ǃnâ hâ-i ǃnâ ra ǃkhō te-e.”—Romeǁîn 7:22, 23.

ǁÎ-AITSAMA ÔAǃNÂSEN RE: Mâ ǂkhabusasiga xuts a ǁkhaesen ǁkhā?

Aiǁgause taxis ǃnari-aoba mîba îts nî, îts ǃganni ǃnâ hoaraga tsēsa ǃnarima ûhe audos di petroli nî toas kōse? ǁNās ge kaise gârese nî mûsenǃ

ǁKhāǁkhāsen ǁkhāts a i? ǃGâi mîǁguigu ge nî hui tsi îts tā donkieb khami ǂâi. Sats ge hoana nî dītsâ ǃgâi ǀapede ūhâs ǃaroma.

ELOBMÎS AIǁGAUDI: Paulub ge ge xoa: “O ta tita nēti ra ǃkhoe, bupeb ai tama.” (1 Korinteǁîn 9:26) Paulub ge ǃgâi mîǁguiga ge dī tsî ǁîn ǃoagu gere ûi, ǁîb ge ge mā-am tama hâ i ǁîb ǀkha gere ī xūn nî tsâǀkhā bisa.—Filipeǁîn 3:12-14.

ǁÎ-AITSAMA ÔAǃNÂSEN RE: Xoamâi re ǃnona mîǁguigu hînats ūhâga ǃgôaxa kurib ǃaroma.

ǃGâi tsoatsoadi osets ge a înganǀgē ǁkhā. ǀNî ǁaegats ge khurutsikhubeb [verkleurmannetjie] khami a ǀkharaǀkharasen ǁkhā sa ǀhōsan ǀkha ǀguiti-ī ǂgaos ǃaroma—ǁgau rasa ǀūsents asa.

Hoan ǂamai sa dīgu ge sa ǂgomǀgaub ai nî ǃgaoǃgaosa, sats ge ta nî ǁae khoen ta mî xūn xa xawe hoaǁae sats a hamsa nî ǁgau.

ELOBMÎS AIǁGAUDI: Kēbo-aob Danieli ge ǁîb di ǂkhamsis tsēdi ǃnâ “ǂgaob âb ǃnâ ge ǂâibasen” ǁîb Elob di ǂhanuga nî ǁnâuǀnamsa, ǁîb omaris ǁanina xub ge ǃnūse ha i xawe. (Danieli 1:8) Nēsa dīs ǃnâ-ūb ge ge ǁgau ǁîb a hamsa. Danieli ge ǁîb di ǂgomǀgaub ǃoagu gere ûi.

ǁÎ-AITSAMA ÔAǃNÂSEN RE: Sa ǂgomǀgauba a tae? Aiǁgause: Elob ǃnâ ǂgom îts ta? ǂGomts ga o, tare-i ǃaromats ra ǂgom? Mâ ǁgauǁgaude ra ǁgau tsi Elob ama hâsa?

ǂGom îts ta Elob ǂhanugu a ǃgâi ǃkhaisa sats ǃaroma? ǁNāti i ga i o, tare-i ǃaroma?

ǀUnis ai matits ra ī ǂgao, ǂnareb hîna ra ǃgom mâheb khami tamas ka io hais hîna ǀgaisa ǃnomaba ūhâs khamits ra ī ǂgao? ǁNā hais khamits ga ra ǀgaisa ǂgao o, ots ge sats a hamsa nî ǂan. Tsî nēs ge nî hui tsî nē dîsa ǃereamsa, Ham ta tita?