ǃÂubasens​—Amabes ǃnâ ǀkharaǀkhara-e dīǁkhā-e?

ǁÎB GE 10 kurixas ǀguisa ge ī-i. Xawe Danieli ge kankersa ge ūhâ i. ǁÎb ǀaeǃkhō-aob tsî ǀnî khoen ge ǃâubasen-e ge mā bi. Xawe Danieli ge ǁnā ǃâubasens ai ge ǃkhōbasen. ǂGom ib ge gere kankers ôaǃnâ-ao kaib nîsa, kaib ga ra o. Tsîb nî soǀôa-e ūhâsa ǀgui tsē. ǁÎb ge kaise gere ǃgâiaǂgao. ǁÎba nî kōǃgâ ǀaeǃkhō-aob ge sari bi o. Sariheb nî tsēs ge hā o, ob ge ǀaeǃkhō-aoba sarisa ge mâiǂui. Danieli ge ge ǂkhabuǂâi. ǁÎb be ǁnās khaoǃgâ, ǀgaiose gere tsâ. ǁÎb ge ǀgam tsēra khaoǃgâ ge ǁō.

ǂUrusib kōǃgâ-aos hîna ǃâubasens. Tsî ǃâubasensa ūhâ tama hâ khoen ôaǃnâ-aos. Ge Danieli xa ge xoa. Sadu tsîn ge ǁnāti i xūn xa ge ǁnâu hâ. Kaira khoe-i hîna ǁōb karob ai ǁgoe-i ge ǁî-i ra dī ǂgao xūna ǃoa ra mûǂui. ǀNîsi ge ǁî-i di ǀaokhoe-i di saris xa. Tamas ka io ǁî-i di ǃgameb ǂâiǂâisensa ǃoa ra mûǂui. ǁNā tsēs ga ǃkharu o. O i ge ǁnā khoe-e ra ǁō. Tae-e nē khoe-e goro mûǂui kai? ǃÂubasensa ǃgâi tama hâ, ǀnî khoen ra mîs ǃoagu?

ǂGui ǃgôab ǂurusib ôaǃnâ-aon ge ra mî. ǃGâi ǂâixasib tsî ǃâubasens tsîn ge kai ǃâba khoe-i di ǂurusib ǃnâ ra ǀhuru. Xawe ǁnā ǂâi ǀgaub ge hoase ǀguiǂâixa tama hâ. ǀNî ôaǃnâ-aon ge ǁnāsa ǂgom tama hâ. ǁÎn ge ra mî, ǀaegu ge soros xa ra ǃaromahe.

ǃÂubasens ǃnâ ǂgom tama is ge ǀasa tama hâ. ǂGui kurina ǃkharu hâseb ge Grike khoeb Aristotla ge dîhe. Îb ǃâubasensa ǁguiǃā, ob ge ge mî: “ǂKhaiǂkhaira ǁhapos ge.” Tsî Benjamin Franklin Amerikab ǃnâ ra hâb ge ge mî: “ǃÂubasens ǃnâts ga ra ǂgom o, ots ge ǃhaese nî ǁō.”

Tae-e a ama ǃâubasens xa? Hoaǁae ra ǁkhorehe xū-e? Nēti i ama tama ǀgaub ǃnâ khoena ra ǁkhaeǂgaohe? Tamas ka io, ǀnî xū-e du ra mû ǃâubasens xa ǃnāsa-e? Xū-i hîna da sada hoa da ǂurusib tsî ǂkhîb ǃgao ǂhâ hâ-e. Tamas kai o ama ǂhâǂhâsa xū-e?