Israelǁaes ge kaise ǁnae-amde ǁnaes xa ge ǃgâibahe i. Elobmîs ge hoaǁae ǁnae-amde ra ǀhuru-ūhe xūn tsî ǁnaes xa ra ǃhoa. Kai ǃâb Elobmîs dib ge ǁnae-amde ǃkhōǂgā hâ. Aiǁgause Psalmdi, ǀGapiǁnaetsanas Salomob dis tsî ǃGae-amdi tsîn ge ǁnaehe nîse ge xoahe. Elobmîs ǁaeb ǃnân ge khoena gere ûiǀgaus xa hâ ǂkhanis ge ra mî: “Elobmîs ǃgāsase ra ǁgausa Israelǁaes ge ǂguiǃnâgu ǀgaugu ǃnâ, nē ǁnae-amde ǁîn ûigu ǃnâ gere sîsenūsa.”

ǁNae-amde tsēkorobe ûib ǃnâ. Israelǁaes ge ǁnae-amde gere ǀhuru în tsân ra ǀgauga ǁgau. (Jes. 30:29) Tarekhoedi ge ǀkhōxūna ǀhuru tsî ǂkhîb amde ǁnae tsî gere ǂnā ǁîn ǁâudīb ǃnâ. ǁNās ge gao-aob gere ǁhûi-e, toroǃkham-aogu ge toroba gere ǃkham dan tsî ǃoabas ǁâudīb ǃnâs tsîna. (ǂHǂh. 11:​34, 1Sam. 18:​6, 7; 1Gao. 1:​39, 40) Israelǁaes ge ǁnae-amde khoe-i ga ǁō o, ǁîn ǃgâi tama tsâsiga ǁgaus ǃaroma gere ǁnae. (2Kro. 35:25) Nēs ge gere ǁgau Israelǁaes ge ǁnae-amde ǀnam īsa.

Israelǁaes gao-aogu ge ǁnae-amdi xa ge ǃgâibahe i. Israelǁaes gao-aogu ge ǃgâiǃgâibasensa ǁnae-amdi ǃnâ ge ūhâ i. Gao-aob Sauli ge Davida ge ǂgan îb ǁîb di gao-aob omsa ǃoa ǀkhī tsî ǁîba ǁnae-amde ǀhuruba. (1Sam. 16:​18, 23) Davidi ge ega gao-ao kaib ge o, ǁnae ūhe ra xūna ge kuru. ǁÎb ge îxa ǁnae-amde ge xoa tsî Jehovab di tempeli tawa nî ǀhuruhe amde ge ǀapeǁgui. (2Kro. 7:6; Amo. 6:5) Gao-aob Salomonni ge tare tsî aore ǁnae-aona ǁîb oms tawa ge ūhâ i.—Aoǁn. 2:8.

Israelǁaes ge ǁnae-amde gere sîsenū ǁîn ǃoabadi ǃnâ. Tempeli tawa Jerusalems ǃnâ i ge 4 000 aoga ǁnae-amde gere ǀhuru. (1Kro. 23:5) ǁÎgu ge simbaldi, harpdi tsî nau ǀkhōxūn ǀkha ǁnae-amde gere ǀhuru. (2Kro. 5:12) Xawe nē khoegu hîna ge ǁnae-amdi ǂansa ūhâ i gu, ǀgui gu ge ǁnae-amdi ǃnâ-ū Jehovaba ge ǃoaba tama hâ i. ǂGui Israelǁaes din ge Jerusalemsa ǃoan gere ǀgoreǀî ǁaeb ǃnâs tsîna gere ǁnae. Nēn ge ǃGûǃapas di tsanas (ǁnae-ams) ase ge ǂansa-i. (Psa. 120–134) ǀGui Jodeǁîn xoadi ge ra ǁgau, Israelǁaes ge Pasxab ǂûs ǁaeb ai psalmde xu hâ amde gere ǁnaesa. a

Nētsēs tsîna i ge ǁnae-amde Elob ǃoaba-aona a ǂhâǂhâsaba. (Jak. 5:13) ǁNae-amde da ge ra ǁnae, Jehovaba da ra koa ǂgao amaga. (Efe. 5:19) ǁNae-amdi ge Xristeǁîn ase ra ǀguiǃnâxa kai da. (Kol. 3:16) ǁNae-amde da ga ǁnae, ǃgâ tamas ka io ga ǀhuru, os ge ǁnāsa ǀgaiba ra māda î da ǃgomsin ǃnâ mâǀgai. (ǃNǃkh. 16:25) ǁNae-amdi ǃnâ-ū da ge sida ǂgoms tsî Jehovaba da matikōse a ǀnams tsîna ra ǁgau.