Ipan 1949, notata kistejki Alemania uan yajki Australia pampa kitemoto tekitl ipan minas uan kampa kichiuayayaj tlauili. Mochantik nechka altepetl Victoria uan nopaya mosiuajtik iuaya nonana. Na nitlakatki ipan 1953.

Kema panok se keski xiuitl, nonana pejki momachtia Biblia ininuaya Jehová itlajtoltemakauaj, uan ya nopa tlen achtoui nijkajki kema nojua nieliyaya niokichpil. Notata amo kinekiyaya kiitas yon se religión uan pejki tlauel mosisinia. Maske nonana tlauel kimakasiyaya, nojua momachtiyaya ichtakatsi uan tlauel kipatiitak tlen kiyekok. Kema notata amo itstoya tochaj, nonana techmachtiyaya na uan nosiuaikni tlen kiyekojtoya. Techiljuiyaya Tlaltipaktli eliskia se xochimili uan tlauel tiyolpakiskiaj tlaj tijchiuasej tlen Biblia kiijtoua (Salmo 37:​10, 29; Isaías 48:17).

Kema nijpixtoya 18 xiuitl nikistejki nochaj pampa notata tlauel mosisiniyaya. Maske nijneltokayaya tlen nonana nechmachtiyaya, amo nijpatiitak tlen Biblia tlamachtia, yeka amo nijchijki ipan nonemilis. Pejki nitekiti kej electricista ipan minas kampa kikixtiyayaj carbón, uan teipa nimosiuajtik kema nijpixtoya 20 xiuitl. Kema panok eyi xiuitl, tlakatki se topilsiuapil uan nopa nechpaleuik ma nimoiljui tlake monekiyaya nijpatiitas ipan nonemilis. Nijmatiyaya Biblia tlauel kinpaleuiskia nochampoyouaj, yeka pejki nimomachtia ininuaya Jehová itlajtoltemakauaj. Maske kiampa nijnekiyaya nijchiuas, nosiua kinkualankaitayaya Jehová itlajtoltemakauaj. Kema niajki ipan se tlanechikoli, ya nechiljuik ma nijtlapejpeni tlaj nojua nimomachtis ika Biblia o nikisteuas tochaj. Maske tlauel nechyolkokok, nijchijki tlen nechiljuik uan ayokmo nimomachtik ininuaya Jehová itlajtoltemakauaj. Uan nojua tlauel nimoyolkokok pampa ayokmo nijchijki tlen nijmatiyaya techpaleuiskia.

Se tonali, katli ininuaya nitekitiyaya pejkej kichiuaj ma nikita pornografía. Tlauel nijnekiyaya nijtlachilis uan nojkia tlauel amo kuali nijyolmatiyaya pampa kichiuayaya ma nechyolkoko notlalnamikilis. Nikilnamikiyaya tlen nechmachtijtoyaj ika Biblia uan nijmatiyaya toTeotsij nechtlatsakuiltiskia. Uan pampa nochipa nijtlachiliyaya tlaixkopinkayomej tlen sokiyo, kichijki ayokmo kenijki ma nikita nopa pornografía uan teipa ayokmo ueliyaya nijkaua.

Ipan 20 xiuitl, nikilkajki nochi tlen nechmachtijtoya nonana. Nochi tlen nijchiuayaya kinextiyaya tlen nikitayaya. Nikijtouayaya tlajtoli tlen sokiyo uan kema nitetlauetskiltiyaya nojkia kiampa nijchiuayaya. Nimoiljuiyaya tlen amo kinamiki kema omej motekaj sansejko, uan maske niitstoya iuaya nosiua, nimotejki ininuaya sekinok siuamej. Se tonali nimoteskaitak, uan nimoiljuik: “Tlauel nimoijiya”. Amo nimoikneliyaya uan pejki nimokualankaita.

Nosiua uan na timokajkej uan tlauel amo kuali niitstoya. Teipa nimomaijtok ika Jehová ika nochi noyolo. Maske panotoya 20 xiuitl, sampa pejki nimomachtia Biblia. Ipan nopa tonali, notata ya miktoya uan nonana eliyaya se tlen Jehová itlajtoltemakauaj.

Nochi tlen nijchiuayaya yon kentsi mouikayaya ika tlen Biblia tlamachtia. Maske kiampa, nimosentlalijtoya nijpias nopa tlaseuilistli tlen toTeotsij kineki ma tijpiakaj. Nimosentlalik ayokmo nikijtos tlajtoli tlen sokiyo yon nimosisinis. Nojkia ayokmo nimomekatik, ayokmo nimauiltik ika tomij, ayokmo nimoiuintik uan ayokmo nitlachtejki kampa nitekitiyaya.

Katli ininuaya nitekitiyaya amo kikuamachiliyayaj kenke nijnekiyaya nijpatlas nonemilis. Ipan eyi xiuitl nechtetsopkej pampa kinekiyayaj sampa ma nijchiua tlen achtouia nijchiuayaya. Kema sampa nikitayaya pornografía, nikualaniyaya uan nikijtouayaya se tlajtoli tlen amo kuali, uajka nochi kiijtouayayaj ika pakilistli: “¡Kena, Joe sampa kichiua tlen amo kuali!”. ¡Tlauel nechyolkokouayaya tlen nechiljuiyayaj! Nimoiljuiyaya amo kema nijpatlaskia nonemilis.

Kampa nitekitiyaya miakej kiitayayaj pornografía. Katli ininuaya nitekitiyaya nochipa mopanoltiliyayaj tlaixkopinkayomej ika amatl o ipan inincomputadoras kej na nijchiuayaya achtouia. Maske nijchiuayaya kampeka ayokmo nijtlachilis pornografía, inijuantij kinekiyayaj sampa ma nijtlachili. Yeka, nikitato katli nechmachtiyaya ika Biblia pampa nijnekiyaya ma nechpaleui uan ma nechyolchikaua, uan ya kuali nechtlakakilik. Nechpouilik textos tlen tlauel nechpaleuik uan nechiljuik kenijkatsa ueliskia nijkauas tlen amo kuali. Nojkia nechiljuik ajachika ma nikiljui Jehová ma nechpaleui (Salmo 119:37).

Se tonali nikiniljuik nochi katli ininuaya nitekitiyaya ma mosentilikaj, uan kema itstoyaj nochi, nikiniljuik ma kinmakakaj se keski cervezas omej katli ininuaya titekitiyayaj uan tijmajtoyaj tlauel tlaiyayaj. Nochi nechkualankanankilijkej: “¡¿Kenke tijneki ma tikinmakakaj?! ¡Ni tlakamej kinekij kikauasej tlen amo kuali!”. Uan nikinnankilik: “Na nojkia”. Ipan nopa tonali kikuamachilijkej nijchiuayaya kampeka ayokmo nijtlachilis pornografía uan ayokmo nechtetsopkej ma nijchiua tlen achtouia nijchiuayaya.

Jehová tlauel nechpaleuik uan yeka uelki nijkaua tlen nijchiuayaya. Ipan 1999 nimoatsonpoliuiltik kej se tlen Jehová itlajtoltemakauaj. Tlauel nijtlaskamatilia Jehová pampa nechpaleuik kuali ma niitsto uan ma niyolpaki.

Nama nijkuamachilia kenke Jehová kikualankaita nopa tlamantli tlen achtouia nechpaktiyaya. Ya eli se kuali tetaj, yeka kinekiyaya nechmanauis tlen nopa pornografía. Nikitstok nelia tlen kiijtoua Proverbios 3:5, 6: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak”. Tlen kiijtoua Biblia tlauel techpaleuia uan tlaj tijchiuaj ipan tonemilis teipa kuali tiitstosej (Salmo 1:1-3).

Achtouia tlauel nimokualankaitayaya, uan nama tlauel nimoiknelia uan kuali nijyolmati. Ayokmo nijchiua tlen amo kuali uan nijmati Jehová ya nechtlapojpoljuik uan nechpaleuia. Ipan xiuitl 2000 nimosiuajtik iuaya se yejyektsi tosiuaikni katli itoka Karolin. Ya tlauel kiiknelia Jehová sanse kej na. Tlauel kuali timouikaj. Tlauel tiyolpakij pampa tielij Jehová itekipanojkauaj, katli nochipa kichiuaj kampeka kinextisej itstokej tlapajpaktikej uan tlauel moikneliaj.