Ximoiljui ni: Karen yaui ipan se iljuitl, uan kema pano se matlaktli minutos, kikaki se akajya kiiljuia:

Kema Karen moikantlachilia, kiita iuampo Jessica kinechkauijtia uan kiuika ome cervezas. Kimaka se uan kiiljuia: “Ta ayokmo tisiuapil. Uelis timoyolpakiltis maske san se kentsi”.

Maske Karen amo kineki kiijis pampa nojua ichpokatl, amo kineki iuampo Jessica ma moiljui ya amo tleno kipaktia. Iuampo Jessica kuali monejnemiltia: tlaj ya kiiji, uajka amo kenijki. Yeka moiljuia: “San setsi nikijis. Ni amo eli kej drogas”.

Tlaj ta mitspanoskia kej Karen, ¿tlake tijchiuaskia?

Tlaj tijneki tijchiuas tlen kuali kema mitspanos se tlamantli kej ni, moneki kuali timoixmatis. Ni kiijtosneki kuali tijmatis tlake tijyolmati, tlake kuajkuali tlamantli tijnextia uan kenke amo timonejnemiltia kej sekinok. Tlaj kuali tijmajtos ni, mitspaleuis ta moselti tijtlapejpenis tlake tijchiuas uan amo sekinok (1 Cor. 9:26, 27).

¿Kenijkatsa uelis kuali tijtlapejpenis tlake tijchiuas? Tlauel mitspaleuis tlaj achtoui tijnankilis se keski tlajtlanili.

Tlaj tijmatis tlake ueli tijchiua uan tlake kuajkuali tlamantli tijnextia, amo ouij tijmatis tijchiuas tlen kinamiki.

XIJCHIUA KEJ YA. Apóstol Pablo kiijkuilok: “[Maske] axnimomachtijtok para nikamatis [...] ika tlajtoli tlen tlauel yejyektsi, na kuali nijmati tlen nitlamachtia” (2 Cor. 11:6). Pampa kuali kiixmatiyaya toTeotsij iTlajtol, kichijki tlen kinamikiyaya maske kipinajtijkej. Ya amo motekipachok uan nojua kuali kiyolmatiyaya ika tlen kichiuayaya (2 Cor. 10:10; 11:5).

XIKITA TLAJ KUALI TIMOIXMATI: Xikijkuilo se tlamantli tlen kuali tijchiua.

Nojkia xikijkuilo se tlen nopa kuajkuali tlamantli tlen tijnextia (uelis tlauel titeiknelia, titemaka tlen tijpia, amo titekajkayaua, nima tijchiua se tlenijki o seyok tlamantli).

Kej se cadena nima kotoni kampa amo kuali mosalojtok, ta nojkia uelis nima tijchiuas tlen amo kinamiki tlaj tijkauas ma mitsyoltilana tlen amo kuali.

XIJCHIUA KEJ YA. Pablo kimatiyaya tlake kiyoltilanayaya, yeka kiijkuilok: “Ipan noyolo nechpaktia nijchiuas nopa tlen kuali tlen kiijtoua itlanauatiljuaj toTeko, pero nochipa ipan na onka tlajtlakoli tlen kiteuia tlen kuali nijneki nijchiuas [...]. Uan keja se tlatekipanojketl moneki kineltokas iteko, nopa tlajtlakoli nechchiua ma nitlajtlakolchiua” (Rom. 7:22, 23).

XIKITA TLAJ KUALI TIMOIXMATI: ¿Tlake tlamantli tlen tlauel mitsyoltilana moneki ayokmo tijchiuas?

¿Titlejkoskia ipan se carro uan tikiljuiskia katli kinemiltia san ma tlamalakachojtinemi uan san ma moketsa kema ayokmo kipias gasolina? Amo kema tijchiuaskia nopa, uan tlauel patiyo mitsinamaskiaj.

¿Tlake techmachtia? Tlaj timosentlalis tijchiuas se keski tlamantli, amo san timotonalpolojtos, nochipa tijmatis tlake tijneki tijchiuas teipa uan kenijkatsa tijchiuas.

XIJCHIUA KEJ YA. Pablo kiijkuilok: “[Ni]motlaloua xitlauak hasta kampa ontlami ojtli” (1 Cor. 9:26). Pablo kimatiyaya tlake kichiuas ipan inemilis, yeka ika nochi iyolo kichijki kampeka kichiuas tlen mosentlalijtoya (Filip. 3:12-14).

XIKITA TLAJ KUALI TIMOIXMATI: Xikijkuilo eyi tlamantli tlen mitspaktiskia tijchiuas ipan seyok xiuitl.

Tlaj timoiljuia amo melauak tlen tijneltoka, amo kema tijmatis tlake tijchiuas. Kej se camaleón kipatla kej nesi, ta nojkia nochipa tijpatlas kej timonejnemiltia pampa tijnekis tijchiuas kej mouampoyouaj. Kiampa tijnextis amo kuali timoixmati.

Uan tlaj kuali tijmati tlake tijneltoka, nochipa tijchiuas tlen kinamiki maske sekinok amo kiampa kichiuasej.

XIJCHIUA KEJ YA. Maske uelis Daniel eliyaya se piltelpokatsi kema kiiyokatlalijkej tlen ichampoyouaj uan kiuikakej seyok altepetl kampa amo kiueyichiuayayaj Jehová, Daniel “motemakak ipan iyolo” kineltokas toTeotsij itlanauatiljuaj (Dan. 1:8). Amo kinejki kipatlas tlen kineltokayaya uan nochipa kichijki tlen kineltokayaya.

XIKITA TLAJ KUALI TIMOIXMATI: ¿Ipan tlake titlaneltoka? Uelis: ¿titlaneltoka ipan toTeotsij? ¿Kenke tijneltoka nopa? ¿Kenke temachtli tijmati nelia itstok?

¿Timoiljuia toTeotsij itlanauatiljuaj nelia mitspaleuiaj? ¿Kenke timoiljuia nopa?

Ximoiljui ni: ¿tijnekiskia tielis kej se xiuitl katli nima kipatlanaltia ajakatl, o tijnekiskia tielis kej se kuauitl katli amo tleno kipano maske chikauak tlaajaka? Tlaj tijneki tielis kej nopa kuauitl, uajka xijchiua kampeka nojua kuali timoixmatis. Kiampa uelis tijnankilis ni tlajtlanili: ¿Nelnelia kuali nimoixmati?