Nopa carta tlen kintitlanilijkej Cristo itokilijkauaj tlen Colosas 1:1-29
1 Na niPablo, se iapóstol Cristo Jesús pampa Dios* kiampa nechtekimakak, uan toikni Timoteo,
2 tiinmechtlajkuiljuiliaj inmojuantij toikniuaj katli initstokej ipan Colosas, katli Dios inmechiyokatlalijtok* uan amo inkitlauelkauaj Cristo:
ToTata Dios ma kipia ueyi iyolo ika inmojuantij* uan ma inmechpaleui kuali ximouikakaj iuaya.
3 Nochipa tijtlaskamatiliaj Dios, iTata toTeko Jesucristo kema timomaijtouaj* por inmojuantij,
4 pampa tijkaktokej intlaneltokaj ipan Cristo Jesús uan kenijkatsa inkinikneliaj katli Dios kiniyokatlalijtok,
5 pampa inkichiaj inkiselisej se tlateochiualistli ipan iluikak. Inmojuantij ya inkikajkej tlen nopa tlateochiualistli ika nopa tlamachtili tlen melauak, nopa kuali tlamachtili
6 tlen inmechmatiltijtokej. Sanse kej nopa kuali tlamachtili momoyaua ipan nochi Tlaltipaktli uan más miakej kineltokaj, nojkia kiampa pano ika inmojuantij desde nopa tonali kema inkikajkej uan xitlauak inkimatkej kenijkatsa Dios nelnelia kinextia ueyi iyolo.*
7 Ya nopa inmechmachtik Epafras, se Cristo itokilijka katli eli temachtli uan tlauel tikikneliaj pampa touaya tlatekipanoua, katli kichiua tlen tojuantij tijchiuaskiaj.
8 Ya nojkia techiljuik kenijkatsa ichikaualis Dios* inmechpaleuia xiteiknelikaj.
9 Yeka, desde nopa tonali kema tojuantij tijkajkej nopa, nochipa timomaijtojtokej por inmojuantij uan nochipa titlajtlanij para senkistok kuali xijmatikaj tlen Dios kineki, nojkia para xijpiakaj miak tlalnamikilistli uan para ichikaualis Dios ma inmechpaleui xijkuamachilikaj nochi,
10 para uelis inmonejnemiltisej kej kinamiki kichiuasej katli kitekipanouaj Jehová* uan kiampa inkiyolpakiltisej ipan nochi tlamantli, kema inkichiuasej nochi tlen kuali uan kema más kuali inkiixmajtiasej Dios.
11 Nojkia tijtlajtlaniaj Dios ma kitekiui iueyichikaualis uan kiampa inmechyolchikauas ika nochi nopa tetikayotl tlen moneki para uelis inkiijiyouisej nochi ika pakilistli uan inkipiasej inmoyolo,
12 uan xijtlaskamatilikaj toTata, pampa inmechkualchijchijtok para inkiselisej tlen kinaxkatis katli kiniyokatlalijtok uan itstokej kampa tlauili.
13 Ya techmakixtik tlen nopa tsintlayouilotl tlen technauatiyaya uan techuikak ipan nopa tlanauatijkayotl kampa tlanauatia iKone katli tlauel kiiknelia,
14 katli tlaxtlajki para techmakixtis uan kichiua ma techtlapojpoljuikaj totlajtlakoljuaj.
15 Ya nesi sanse kej Dios katli amo ueli tikitaj, uan eli nopa achtouiejketl tlen nochi tlen onka;
16 pampa ika ya, kichijchijkej nochi nopa sekinok tlamantli tlen onka ipan iluikaktli uan ipan Tlaltipaktli, tlamantli tlen tikitaj uan tlen amo ueli tikitaj, maske eli tekiuejkayotl, tlanauatili, tlanauatianij o tekichiuanij. Nochi nopa sekinok tlamantli tlen onka, Dios kichijchijki ika ya uan para ya.
17 Nojkia, ya ipa itstoya kema ayamo tleno onkayaya, uan ika ya, Dios kichijki ma onka nochi nopa sekinok tlamantli,
18 uan ya eli itlayakanka* nopa tlanechikoli tlen eli kejuak itlakayo. Ya eli ipejya nochi, eli katli achtoui moyolkuik, para elis achtoui ipan nochi tlamantli;
19 pampa Dios kuali kiitak para nochi ma moaxiti ipan Cristo,
20 uan ika ya Dios kichiua ma moyoltlalikaj iuaya nochi nopa sekinok tlamantli tlen onka ipan Tlaltipaktli uan tlen onka ipan iluikaktli, pampa kichijki ma onka tlaseuilistli ika iKone ieso tlen kitoyajki ipan nopa kuauitl kampa kitlaijiyouiltijkej.*
21 Kena, achtouia inmojuantij inmouejkatlalijtoyaj tlen Dios uan ineliyayaj ikualankaitakauaj pampa san inmoiljuiyayaj ipan tlamantli tlen amo kuali,
22 pero nama Dios kichijtok ximoyoltlalikaj iuaya ika itlakayo katli mijki, para kema inmechnextis iixpa inelisej intlatsejtseloltikej, amo inkipiasej yon se tlamantli tlen amo kuali uan amo uelis inmechtlateljuisej ika yon se tlamantli.
23 Kiampa inelisej tlaj nochipa intlaneltokatosej, tlaj kuali inmotlatskiliaj ipan itlatsinpeualtil totlaneltokilis, tlaj inelij intemachmej uan tlaj amo inkikauaj ma inmechiyokatlalikaj ika tlen inkichiaj inkiselisej pampa inkitlakakilijkej nopa kuali tlamachtili tlen momoyajtok ipan nochi Tlaltipaktli. Na niPablo nieli se tlatekipanojketl katli kimoyaua nopa kuali tlamachtili.
24 Nama niyolpaki pampa nitlaijiyouia por inmojuantij, uan nikijiyouijtok tlen Cristo kiijiyouik maske nojua poliui nikijiyouis tlen kipaleuis itlakayo Cristo, tlen kiijtosneki nopa tlanechikoli.
25 Nimochijki se tlatekipanojketl tlen ni tlanechikoli pampa Dios nechmakak se tekitl tlen inmechpaleuia, se tekitl para senkistok ma nitematilti itlajtol,
26 nopa tlamantli tlen Dios ayamo tematiltijtoya* uan motlatijtoya* ipan nochi nopa tonali* tlen ya panok uan nochi nopa maseualmej tlen uejkajkia itstoyaj amo kimatiyayaj. Pero nama Dios kinmatiltijtok katli kiniyokatlalijtok,
27 uan kinejki kinnextilis kampa itstokej katli amo elij judíos nopa yejyektsitsij tlateochiualistli tlen eltok ipan tlen ayamo tematiltia. Ni tlamantli tlen Dios ayamo tematiltijtoya eli Cristo, katli itstok inmouaya, tlen kiijtosneki inkichiaj ma inmechuejkapantlalikaj iuaya.
28 Tojuantij titematiltiaj tlen ya uan tikintlalnamiktiaj uan tikinmachtiaj nochi maseualmej ika miak tlalnamikilistli, para nochi tikinnextitij kej maseualmej katli kuali tlaneltokaj uan itstokej iuaya Cristo.
29 Yeka chikauak nitekiti, uan nijchiua kampeka pampa ya nechmaka itetikayo tlen chikauak tekiti ipan na.
Tlen ijkuilijtok tlatsintla
^ Kanajya kiijtouaj “toTeotsij”.
^ O “katli intlatsejtseloltikej”, nikaj uan nochi kampa nesi ipan ni capítulo.
^ O “ma inmechmaka tlateochiualistli tlen amo kinamiki tijselisej”.
^ Kanajya kiijtouaj “timotlatlajtiaj”.
^ O “temaka tlateochiualistli tlen amo kinamiki tijselisej”.
^ O “espíritu santo”.
^ Ika griego “eli itsonteko”.
^ Xikita kuauitl kampa tetlaijiyouiltiaj.
^ Xikita tlen Dios ayamo tematiltia.
^ Kanajya kiijtouaj “miyantoya”.
