Tlen kiijkuilok Marcos 9:1-50
-
Jesús kipatla kej nesi (1-13)
-
Kichikaua se telpokatl katli kipia se amo kuali ajakatl (14-29)
-
“Nochi ueli mochiua para se katli tlaneltoka” (23)
-
-
Jesús sampa kiijtoua nechka mikis (30-32)
-
Itokilijkauaj mokualaniaj pampa kinekij kimatisej ajkia más ueyi (33-37)
-
“Pampa katli amo techkualankaita, techpaleuia” (38-41)
-
Tlamantli tlen kichiua ma tlajtlakolchiuakaj (42-48)
-
“Xielikaj kej istatl” (49, 50)
9 Nojkia kiniljuik: “Temachtli niinmechiljuia, se keskij katli nikaj itstokej amo mikisej hasta kiitasej iTlanauatijkayo Dios ya tlanauatijtos”.
2 Kema panok chikuasej tonali, Jesús kinuikak Pedro, Santiago uan Juan ipan se uejkapantik tepetl, kampa itstoyaj ininselti. Uan ininixpa, Jesús kipatlak kej nesiyaya.
3 Iyoyo pejki petlani; mochijki más chipauak. Yon se tlachikuenijketl amo ueliskia kichipauas kej nopa.
4 Uan monextijkej Elías uan Moisés, katli kamanaltiyayaj iuaya Jesús.
5 Uajka Pedro kiiljuik Jesús: “Tlamachtijketl,* ¡kuali pampa nikaj tiitstokej! Ma tijchijchiuakaj eyi pilxajkaltsitsij: se para ta, se para Moisés uan seyok para Elías”.
6 Pedro amo kimatiyaya tlake kiijtos, pampa tlauel momajmatijtoyaj.
7 Uajka motlalik se mixtli tlen kintsajki, uan ipan nopa mixtli kakistik se akajya kiijtok: “Ya ni noKone katli tlauel nikiknelia. Xijtlakakilikaj”.
8 Kema tlachixtejkej, ayokmo aka kiitakej, san Jesús itstoya.
9 Kema ixtemoyayaj ipan nopa tepetl, Jesús xitlauak kinnauatik amo aka ma kiiljuikaj tlen kiitstoyaj hasta kema katli eli iKone se Maseuali* moyolkuiskia.
10 Inijuantij kichijkej tlen kiniljuik,* pero motlajtlaniliyayaj tlake kiijtosnekiyaya kema kiijtok moyolkuiskia.
11 Uan pejkej kitlatsintokiaj: “¿Kenke escribas* kiijtouaj achtoui moneki ualas Elías?”.
12 Ya kinnankilik: “Nopa nelia, achtoui uala Elías uan sampa kikualtlalia* nochi tlamantli. Uajka, ¿kenke ijkuilijtok katli eli iKone se Maseuali moneki tlauel tlaijiyouis uan amo kiselisej?
13 Pero na niinmechiljuia, Elías nelia ya ualajki uan kichiuilijkej tlen inijuantij kinejkej, sanse kej ijkuilijtoya kipanoskia”.
14 Kema asitoj kampa itstoyaj nopa sekinok itokilijkauaj, kiitakej kinyaualojtoyaj miakej maseualmej uan se keskij escribas mokamaijixnamikiyayaj ininuaya.
15 Kema maseualmej kiitakej Jesús, tlauel mosentlachilijkej uan motlalojtejkej kitlajpalotoj.
16 Uan Jesús kintlatsintokik: “¿Ika tlake inmokualaniaj?”.
17 Uan se tlakatl katli nopaya itstoya kiiljuik: “Tlamachtijketl na nimitsualikilik nokone pampa kipia se amo kuali ajakatl* tlen kichiua amo ma kamanalti.
18 Kema kiitskia, kimajkaua tlalchi uan nopa telpokatl kamaposoni, motlankochpitstla* uan tlami ichikaualis. Nikiniljuik motokilijkauaj ma kikixtikaj pero inijuantij amo uelkej”.
19 Uajka Jesús kiniljuik: “¡Ni maseualmej amo tlaneltokaj! ¿Keski tonali moneki niitstos inmouaya? ¿Keski tonali moneki niinmechijiyouijtos? Xinechualikilikaj”.
20 Uajka kiualikilijkej nopa telpokatl. Kema nopa amo kuali ajakatl kiitak Jesús, kichijki ma uiuipika nopa telpokatl, uan kema uetski tlalchi, pejki momimiloua uan kamaposoni.
21 Jesús kitlatsintokik itata nopa telpokatl: “¿Kema pejki kiampa kipano?”. Ya kinankilik: “Kema nojua eliyaya konetl.
22 Nopa amo kuali ajakatl miakpa kimajkaua ipan tlitl o ipan atl pampa kineki kimiktis. Pero tlaj tiuelis tijchiuas se tlamantli, xitechtlajsojtla uan xitechpaleui”.
23 Jesús kiiljuik: “¿Kenke tikijtoua ‘tlaj tiuelis’? Nochi ueli mochiua para se katli tlaneltoka”.
24 Nimantsi itata nopa telpokatl chikauak kiijtok: “¡Kena nitlaneltoka! ¡Pero xinechpaleui nojua más ma nitlaneltoka!”.
25 Kema Jesús kiitak miakej maseualmej motlalojtiualayayaj kampa inijuantij, kiajuak nopa amo kuali ajakatl, uan kiiljuik: “Amo kuali ajakatl tlen amo tikamanalti uan amo titlakaki, ¡nimitsnauatia xikisa ipan ya, uan ayokmo kema sampa xikalaki!”.
26 Kema tsajtsik uan kichijki nopa telpokatl tlauel ma uiuipika, nopa amo kuali ajakatl kiski. Uan nopa telpokatl mokajki kej miktok. Miakej kiijtouayayaj: “¡Ya mijki!”.
27 Pero Jesús kimaitskik uan kitlananki, uan nopa telpokatl moketski.
28 Kema Jesús uan itokilijkauaj kalajkej ipan se kali, ichtakatsi kitlatsintokijkej: “¿Kenke tojuantij amo tiuelkej tijkixtiaj?”.
29 Ya kinnankilik: “Amo kuali ajakamej kej ni, san uelij kisaj ika tlamaijtoli”.*
30 Uajka kistejkej nopaya uan kiixkotonkej tlali Galilea, pero Jesús amo aka kinekiyaya ma kimati
31 pampa kinmachtiyaya itokilijkauaj. Uan kiniljuiyaya: “Katli eli iKone se Maseuali* kitemaktilisej ininmako maseualmej uan kimiktisej. Pero maske kimiktisej, ipan eyi tonali moyolkuis”.*
32 Inijuantij amo kikuamachilijkej tlen kiniljuik uan majmauiyayaj kitlatsintokisej.
33 Uan asitoj Capernaúm. Kema ya itstoyaj kalijtik, kintlatsintokik: “¿Ika tlake inmokualanijtiualayayaj ipan ojtli?”.
34 Amo tleno kiijtojkej, pampa ipan ojtli mokualanijtiualayayaj pampa kinekiyayaj kimatisej ajkia eliyaya más ueyi.
35 Uajka Jesús moseuik, kinnotski nopa 12 apóstoles uan kiniljuik: “Katli kinekis tlayakanas, moneki mokauas hasta tlatepotsko* uan kintekipanos sekinok”.
36 Uajka kinotski se pilokichpiltsi, kiketski tlatlajko kampa inijuantij itstoyaj, kinajnauajki uan kiniljuik:
37 “Katli kiselia se konetl kej ni pampa nechtlepanita, nojkia nechselia; uan katli nechselia, amo san na nechselia, nojkia kiselia katli nechtitlanki”.
38 Juan kiiljuik: “Tlamachtijketl, tikitakej se akajya kinkixtiyaya amo kuali ajakamej ika motoka; pero tikiljuijkej amo kiampa ma kichiua pampa amo nemiyaya touaya”.
39 Jesús kiijtok: “Amo xijtsakuilikaj, pampa amo aka ueli kichiua se milagro ika notoka uan nojkia nechijilnamikis.
40 Pampa katli amo techkualankaita, techpaleuia.
41 Uan nelia niinmechiljuia, katli inmechmakas se vaso atl pampa inelij iaxkauaj Cristo, temachtli kiselis tlateochiualistli.
42 Pero katli kichiuas ma tlajtlakolchiua se tlen ni katli amo moueyimatij uan tlaneltokaj, kualtiaskia ma kikechuiyonilikaj se ueyi tetl tlen burrojmej kimalakachouaj kema tisij uan ma kimajkauakaj ipan mar.
43 ”Tlaj se tonali momax kichiua xitlajtlakolchiua, xijtsonteki. Más kuali tijpias nemilistli maske timakototik uan amo titlamiti ika ome momax ipan Gehena,* nopa tlitl tlen amo ueli seui.
44 *
45 Uan tlaj moikxi kichiua xitlajtlakolchiua, xijtsonteki. Más kuali tijpias nemilistli maske tiikxikototik uan amo ma mitsmajkauakaj ika ome moikxi ipan Gehena.
46 *
47 Uan tlaj moixteyol kichiua xitlajtlakolchiua, uejka xijmajkaua. Más kuali tikalakis ipan iTlanauatijkayo Dios san ika setsi moixteyol uan amo ma mitsmajkauakaj ika ome moixteyol ipan Gehena,
48 kampa nopa okuili amo miki uan nopa tlitl amo seui.
49 ”Pampa nochi monekis kinpoyeltisej ika tlitl.
50 Nopa istatl tlauel kuali. Pero tlaj istatl kipolos ipoyejka, ¿kenijkatsa sampa kipoyeltisej? Xielikaj kej istatl uan kuali ximouikakaj* ininuaya sekinok”.
Tlen ijkuilijtok tlatsintla
^ Ika griego “Rabí”.
^ Xikita katli eli iKone se Maseuali.
^ O uelis “amo aka kiiljuijkej”.
^ O “kisenkaua”.
^ O “demonio”.
^ Kanajya kiijtouaj “monatskua”, “motlankochtititsa”.
^ Kanajya kiijtouaj “netlatlajtili”.
^ Xikita katli eli iKone se Maseuali.
^ Ika griego “motlananas”.
^ Kanajya kiijtouaj “tlaika”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ O “xiitstokaj ika tlaseuilistli”.
