Tlen kiijkuilok Mateo 18:1-35
-
Katli más ueyi ipan iTlanauatijkayo Dios (1-6)
-
Tlamantli tlen kichiua ma tlajtlakolchiuakaj (7-11)
-
Neskayotl tlen nopa pilborregojtsi katli mokuapoloua (12-14)
-
Kenijkatsa tijpaleuis moikni sampa ma kichiua tlen kuali (15-20)
-
Neskayotl tlen nopa tlatekipanojketl katli amo kinejki tetlapojpoljuis (21-35)
18 Ipan nopa tonali, itokilijkauaj kinechkauijkej Jesús uan kitlatsintokijkej: “Uajka, ¿ajkia eli más ueyi ipan nopa Tlanauatijkayotl tlen eltok iluikak?”.
2 Ya kinotski se pilokichpiltsi, kiketski tlatlajko kampa inijuantij itstoyaj
3 uan kiniljuik: “Temachtli niinmechiljuia, tlaj amo inkipatlaj kej inelij uan amo inkichiuaj kej konemej, amo kema inkalakisej ipan nopa Tlanauatijkayotl tlen eltok iluikak.
4 Yeka, katli amo moueyimati kej ni pilokichpiltsi, ya eli katli más ueyi ipan nopa Tlanauatijkayotl tlen eltok iluikak,
5 uan katli kiselia se konetl kej ni pampa nechtlepanita, nojkia nechselia.
6 Pero katli kichiuas ma tlajtlakolchiua se tlen ni katli amo moueyimatij pampa tlaneltokaj ipan na, kualtiaskia ma kikechuiyonilikaj se ueyi tetl tlen burrojmej kimalakachouaj kema tisij uan ma kimajkauakaj ipan mar kampa más tlauejkatla.
7 ”¡Teikneltikej katli itstokej ipan Tlaltipaktli pampa kichiuaj maseualmej ma tlajtlakolchiuakaj!* Kena, nochipa onkas tlen kichiuas ma tlajtlakolchiuakaj, pero ¡teikneltik se tlakatl katli kichiua sekinok ma tlajtlakolchiuakaj!
8 Yeka, tlaj momax o moikxi kichiua xitlajtlakolchiua, xijtsonteki uan uejka xijmajkaua. Más kuali tijpias nemilistli maske timakototik o tiikxikototik uan amo ma mitsmajkauakaj ipan tlitl tlen amo kema seui ika ome momax o ika ome moikxi.
9 Nojkia, tlaj moixteyol kichiua xitlajtlakolchiua, ximoixteyolkixti uan uejka xijmajkaua. Más kuali tijpias nemilistli maske san ika se moixteyol uan amo ma mitsmajkauakaj ika ome moixteyol ipan Gehena* kampa tlalelemekatok.
10 Ximomokuitlauikaj para amo inkiuejkamajkauasej* yon se tlen ni katli amo moueyimatij, pampa na niinmechiljuia ininángeles ipan iluikak nochipa itstokej iixpa* noTata katli itstok iluikak.
11 *
12 ”¿Tlake inmoiljuiaj? Tlaj se tlakatl kipia 100 pilborregojtsitsij uan kipolos se, ¿amo inmoiljuiaj kinkajteuas nopa 99 ipan nopa tepetl uan yas kitemoti katli mokuapolojtok?
13 Uan tlaj kipantis, temachtli niinmechiljuia, más yolpakis ika nopa pilborregojtsi que ika nopa 99 katli amo mokuapolojtoyaj.
14 Nojkia kiampa pano ika noTata* katli itstok iluikak: ya amo kineki ma poliui yon se tlen ni katli amo moueyimatij.
15 ”Yeka, tlaj moikni mitsixpano,* xia xikamanaltiti iuaya kampa amo aka itstok uan xikiljui tlen mitschiuilik. Tlaj mitstlakakilia, tijpaleuis moikni sampa ma kichiua tlen kuali.
16 Pero tlaj amo mitstlakakilia, xia ininuaya se o omej maseualmej, kiampa omej o eyij testigos kiijtosej tlaj nelia nochi tlen panotok.
17 Tlaj amo kintlakakilia inijuantij, xikiniljui toikniuaj.* Uan tlaj inijuantij nojkia amo kintlakakilia, uajka xikita kej se katli amo tlaneltoka* uan kej se katli tlainama impuestos.
18 ”Temachtli niinmechiljuia, nochi tlamantli tlen inkiilpisej ipan Tlaltipaktli, ya ilpitos ipan iluikak, uan nochi tlen inkitojtomasej ipan Tlaltipaktli, ya tojtontos ipan iluikak.
19 Nojkia, temachtli niinmechiljuia, tlaj omej tlen inmojuantij katli initstokej ipan Tlaltipaktli inkiijtouaj intlajtlanisej se tlamantli tlen tlauel ipati, mochiuas tlen inkinekij pampa noTata katli itstok iluikak, inmechmakas.
20 Pampa kampa mosentilijtokej omej o eyij ipan notoka, nopaya niitstok ininuaya”.
21 Uajka Pedro kinechkauik uan kitlatsintokik: “NoTeko, tlaj se noikni nechixpano, ¿keski ueltas moneki nijtlapojpoljuis? ¿Hasta chikome ueltas?”.
22 Jesús kinankilik: “Amo, amo nimitsiljuia san chikome ueltas, nimitsiljuia hasta 77 ueltas.
23 ”Yeka, nopa Tlanauatijkayotl tlen eltok iluikak eli kej se tlanauatijketl katli kinejki kininamas itlatekipanojkauaj tlen kitlauikiliyayaj.
24 Kema pejki tlainama, kiualikilijkej se itlatekipanojka katli kitlauikiliyaya 10 mil talentos.*
25 Ya amo kipixtoya tlen ika kikuepiliskia tlen kitlauikiliyaya, yeka iteko tlanauatik ma kinnamakakaj ya uan nojkia isiua, ikoneuaj uan nochi tlen kipixtoya, kiampa ueliskia kiixtlauas tlen tlauikayaya.
26 Uajka itlatekipanojka motlankuaketski, mouijtsonki* iixpa uan kitlajtlanik ika nochi iyolo: ‘Xinechchia se kentsi uan nimitskuepilis nochi tlen nimitstlauikilia’.
27 Iteko tlauel moyolyamanilik,* yeka kikajki ma yaui uan ayokmo tleno kiinanki.
28 Pero nopa tlatekipanojketl kiski uan kipantik se katli iuaya tlatekipanouayaya, katli kitlauikiliyaya 100 denarios.* Kiitskik uan pejki kikechpatska. Kiiljuiyaya: ‘¡Xinechkuepili nochi tlen tinechtlauikilia!’.
29 Uan ni tlakatl katli iuaya tlatekipanouayaya motlankuaketski iixpa uan kitlajtlanik ika nochi iyolo: ‘Xinechchia se kentsi uan nimitskuepilis nochi tlen nimitstlauikilia’.
30 Pero ya amo kinejki kitlakakilis. Yajki uan kichijki ma kitsakuakaj hasta kema kitlamikuepiliskia.
31 Kema katli tlatekipanouayayaj iuaya kimatkej tlen panotoya, tlauel kinyolkokok uan yajkej kipouilitoj nochi ininteko.
32 Uajka iteko tlanauatik ma kinotsatij uan kiiljuik: ‘¡Tlauel amo kuali moyolo! Na amo tleno nimitsinanki kema tinechtlajtlanik ma nimitstlapojpoljui.
33 ¿Amo kinamikiyaya nojkia tijtlasojtlas katli mouaya nechtekipanoua sanse kej na nimitstlasojtlak?’.
34 Iteko tlauel kualanki, yeka tlanauatik ma kitsakuakaj hasta kema kitlamikuepiliskia.
35 Nojkia kiampa inmechchiuilis noTata katli itstok iluikak tlaj inmojuantij amo inkintlapojpoljuiaj inmoikniuaj ika nochi inmoyolo”.
Tlen ijkuilijtok tlatsintla
^ Ika griego “ma motepotlamikaj”.
^ Kanajya kiijtouaj “inkintlauelkauasej”.
^ Ika griego “kiixtlachiliaj”.
^ Ni texto san eltok ipan se keski biblias, pero amo eltok ipan amatlajkuiloli tlen uejkajkia moijkuilok ika griego.
^ O uelis “inmoTata”.
^ O “mitschiuilia tlen amo kuali”.
^ Ni kiijtosneki kamanaltis ininuaya katli tlayakanaj ipan tlanechikoli.
^ Ni kiijtosneki katli amo elij judíos o katli amo tlaneltokaj ipan Dios.
^ Kanajya kiijtouaj “mopachok”.
^ Kanajya kiijtouaj “kiteikneltiitak”, “kitlayokoltik”.
