Nopa carta tlen kintitlanilijkej Cristo itokilijkauaj tlen Roma 7:1-25
7 Noikniuaj, ¿amo inkimatij nopa Tlanauatili kinauatia se akajya kema nojua yoltok? (Pampa niinmechnojnotsa inmojuantij katli inkiixmatij tlanauatili).
2 Kej nopa pano kema se siuatl monamiktia, nopa tlanauatili kiijtoua moneki nochipa itstos iuaya iueue kema ya nojua itstok, pero tlaj iueue miki, nopa siuatl ayokmo moneki moyakanas ika nopa tlanauatili tlen iueue kitlalik.
3 Uajka, tlaj nopa siuatl nemi ika seyok tlakatl kema iueue nojua itstok, kiitaskiaj kej se momekatijkasiuatl. Pero, tlaj iueue miki, ayokmo moneki moyakanas ika nopa tlanauatili tlen kitlalik iueue, uan amo momekatiskia tlaj sampa monamiktiskia.
4 Nojkia kiampa panok ika inmojuantij noikniuaj, itlakayo Cristo kichijki kejuak ximikikaj iixpa nopa Tlanauatili, uan kiampa ueliskia inelisej iaxka seyok, iaxka yaya katli moyolkuik, para tijtekipanosej Dios uan tijchiuasej tlen ya kineki.
5 Pampa kema tijchiuayayaj tlen totlakayo kinekiyaya, nopa Tlanauatili xitlauak kinextik para nopa amo kuali tlamantli tlen techyotilanayaya san kichiuayaya ma tlajtlakolchiua totlakayo,* uan nopa tlajtlakoli kichiua ma timikikaj.
6 Pero nama ayokmo timoyakanaj ika nopa Tlanauatili, pampa ayokmo kipia tlanauatili ipan tojuantij. Uajka nama uelis tielisej tiitlatekipanojkauaj Dios pampa nama techyakana ichikaualis,* uan amo pampa techyakana nopa Tlanauatili tlen uejkajkia tlayakanayaya.
7 Uajka, ¿tlake tikijtosej? ¿Nopa Tlanauatili eli se tlajtlakoli? ¡Amo! Pampa tlaj amo techmakatoskiaj nopa Tlanauatili, amo nijmajtoskia tlake eli nopa tlajtlakoli. Amo nijmajtoskia para amo kuali tlaj nikixtokas tlen seyok iaxka tlaj nopa Tlanauatili amo kiijtojtoskia “Amo xikixtoka tlen seyok iaxka”.
8 Pero nopa tlajtlakoli motlatskilik ipan nopa tlanauatili uan kichijki achi más ma nikixtoka nochi tlen sekinok ininaxka, pampa kema amo onkayaya Tlanauatili, nopa tlajtlakoli amo tleno ueliyaya kichiua.
9 Na niyoltoya kema ayamo techmakatoyaj Tlanauatili. Pero kema asiko nopa tlanauatili, tlajtlakoli moyolkuik uan na nimijki.
10 Uan nikitak nopa tlanauatili tlen monekiyaya nechpaleuis para ma nijpia nemilistli, san kichiuayaya ma nimiki.
11 Pampa nopa tlajtlakoli kitekiuik nopa tlanauatili para nechyoltilanas uan nechmiktis.
12 Uajka iTlanauatil Moisés eli tlatsejtseloltik, uan tlen nopaya kiijtoua eli tlatsejtseloltik, xitlauak uan kuali.
13 Uajka, ¿uelis tikijtosej para se kuali tlamantli kichijki ma nimiki? ¡Amo! Nopa tlajtlakoli kichijki ma nimiki. Nopa Tlanauatili tlauel kuali, pero xitlauak kinextik para nopa tlajtlakoli kichiuayaya ma nimiki. Yeka nopa tlanauatili kinextik tlajtlakoli tlauel fiero.
14 Pampa tijmatij nopa Tlanauatili uala tlen Dios ika ichikaualis,* pero na nitlajtlakole, nechnamakakej imako tlajtlakoli.
15 Pampa amo nijkuamachilia kenke kiampa nimonejnemiltia: amo nijchiua tlen nijnektok nijchiuas, san nijchiua tlen nijkualankaita.
16 Pero tlaj nijchiua tlen amo nijneki, nijnextia para nelia kuali nopa Tlanauatili.
17 Pero nama ayokmo nieli na katli nijchiua nopa tlamantli, eli nopa tlajtlakoli tlen eltok ipan na.
18 Pampa nijmati ipan notlakayo tlen tlajtlakole amo eltok yon se tlamantli tlen kuali, pampa maske nijneki nijchiuas tlen kuali, amo niueli nijchiua.
19 Pampa amo nijchiua nopa kuali tlamantli tlen nijneki, san nijchiua tlen amo kuali tlen amo nijneki nijchiuas.
20 Uajka, tlaj nijchiua tlen amo nijneki, ayokmo nieli na katli nijchiua, eli nopa tlajtlakoli tlen eltok ipan na.
21 Yeka, nikita eltok ni tlanauatili tlen nechnauatia: kema nijneki nijchiuas tlen kuali, nikita más nechyoltilana nijchiuas tlen amo kuali.
22 Ipan noyolijtik nijneki nijchiuas tlen kiijtoua itlanauatil Dios,
23 pero nikita ipan notlakayo* eltok seyok tlanauatili tlen moteuia ika nopa tlanauatili tlen eltok ipan notlalnamikilis. Nopa tlanauatili eli tlajtlakoli tlen eltok ipan notlakayo uan nechnauatia.
24 ¡Nelnelia tlauel niteikneltik! ¿Ajkia nechmakixtis tlen notlakayo tlen kichiua ma nimiki?
25 ¡Nijtlaskamatilia Dios pampa nechmakixtik ika toTeko Jesucristo! Kiampa ika notlalnamikilis nijtekipanoua itlanauatil Dios, pero ika notlakayo nijtekipanoua itlanauatil tlajtlakoli.
Tlen ijkuilijtok tlatsintla
^ Ika griego “sejse tlamantli tlen tijpiaj ipan totlakayo”.
^ O “iespíritu”.
^ O “iespíritu”.
^ Ika griego “sejse tlamantli tlen nijpia ipan notlakayo”.
