Kema se touampo amo kuali kiyolmati, uelis amo tijmatij kenijkatsa tijpaleuisej. Pero uelis tijnextisej tikiknelia tlaj tiitstosej iuaya.

“Nimantsi xijtlakakilikaj kuali kema seyok inmechkamauia” (SANTIAGO 1:19).

Tlauel tijpaleuis mouampo tlaj tijtlakakilis kema kinekis kiijtos tlen kiyolmati. Amo ximoiljui moneki tijnankilijtias nochi tlen kiijtoua. Ya moneki kiitas ta tijtlakakilia uan mitstekipachoua tlen kiyolmati. Xijchiua kampeka tijkuamachilis tlen kiyolmati, uan amo xijtlaijiljui. Xikilnamiki, kemantika mouampo uelis kiijtojtiuetsis se tlamantli maske amo kiampa kiyolmati, uan teipa moyolkokos pampa kiampa kiijtok (Job 6:2, 3).

“Xikinyolchikauakaj katli moyolkuesouaj” (1 TESALONICENSES 5:14, TRADUCCIÓN DEL NUEVO MUNDO).

Uelis mouampo tlauel mokuesoua o moiljuia amo tleno ipati. Maske amo tijmatis tlake tikiljuis, uelis tijyolchikauas tlaj tijnextis mitstekipachoua tlen kipano.

“Se tlen tokualuampo temachtli techiknelia nochipa” (PROVERBIOS 17:17).

Xikiljui mouampo tijneki tijpaleuis uan xijtlatsintoki kenijkatsa uelis tijchiuas, amo ximoiljui ya tijmati tlake kineki. Tlaj mouampo amo kimati kenijkatsa mitsiljuis tlake kipoloua, xikiljui tlake tlamantli ueliskia inkichiuasej  sansejko: inyasej innejnemitij, intlakouatij, tijpaleuis tlapojpouas o seyok tlamantli tlen kipoloua (Gálatas 6:2).

“Xijpiakaj inmoyolo” (1 TESALONICENSES 5:14).

Uelis mouampo kemantika amo kinekis kamanaltis. Xikilnamikili ta nochipa tijtlakakilis kema kinekis kamanaltis. Pampa kipia nopa kokolistli, uelis kemantika kichiuas se tlamantli tlen mitsyolkokos o ayokmo kinekis kichiuas tlen inmoiljuijtoyaj uan peuas kualanis. Kema tijpaleuis mouampo, xijpia ueyi moyolo uan xijkuamachili tlen kipano (Proverbios 18:24).

“Nijneki mouampo ma kiita nochipa uelis kamanaltis nouaya. Maske amo ueli nijsenkaua ikuesoljuaj, nochipa nijchiua kampeka nijtlakakilis. Kemantika san kineki ma kitlakakilikaj uan kiampa kuali kiyolmatis” (Farrah, a kipia se iuampo katli amo tlakua kej kinamiki, moyolkuesoua uan tlauel mokuesoua miak tonali).

“Nijpia se nouampo katli nochipa nechyolchikaua uan tlauel nechiknelia. Se tonali nechtlanejki ichaj, uan nechchijchiuilik se tlakualistli tlen tlauel ajuiyak. Kuali nijmatki niitstos iuaya, yeka uelki nijpouilia tlen nijyolmati. ¡Nelia nechyolchikajki!” (Ha-eun, tlauel mokuesoua miak tonali).

“Tlauel ipati tijpias ueyi moyolo. Kema nosiua kichiua se tlamantli tlen amo nechpaktia, nijchiua kampeka amo nikualanis uan nijkuamachilis tlen kiyolmati pampa nikilnamiki ya mokokoua” (Jacob, isiua tlauel mokuesoua miak tonali).

“Nosiua nochipa nechpaleuia uan nechyolchikaua kema moneki. Kema tlauel nimoyolkuesoua, ya amo nechchiualtia ma nijchiua tlen na amo nijneki. Teikneltsi, pampa kemantika amo kichiua tlen kipaktiskia kichiuas. Ya tlauel kipaktia temakas tlen kipia uan achtoui kichiua tlen na nechpaleuis. ¡Amo onka seyok kej ya!” (Enrico, tlauel moyolkuesoua).