Kema tijkamanaljuiaj toTeotsij uan tikiljuiaj tlen tijyolmatij eli se yejyektsi nemaktli tlen ya techmakatok. Tlajtolpanextijketl David kiiljuik toTeotsij: “Ta titechnankilia kema timomaijtouaj uan titechmaka tlen timitstlajtlaniaj, uajka nochi tlakamej ipan Tlaltipaktli ma ualakaj kampa ta” (Salmo 65:2). Uajka, ¿kenijkatsa moneki timomaijtosej tlaj tijnekij toTeotsij ma techtlakakili uan ma techteochiua?

Salmo 62:8 kiijtoua: “Xijpouilikaj nochi tlen eltok ipan inmoyolo”. Kema timomaijtouaj ueli tikiljuiaj toTeotsij nochi tlen tijyolmatij. Uan ya tlauel kipatiita kema tikiljuiaj nochi tlen eltok ipan toyolo.

Maske toTeotsij kinojnotsaj ika miak tokajyotl, san kipia setsi itoka: “Na ni[Jehová], niinmoTeko. Ya nopa notoka” (Isaías 42:8). ToTeotsij itoka uala ipan Biblia se siete mil imiakpa. Miakej tlajtolpanextianij kitekiuijkej itoka kema kinojnotskej. Tlajtolpanextijketl Abraham kiijtok: “[Jehová] amo xikualani nouaya pampa nimitstlajtlania miak ueltas” (Génesis 18:30). Tojuantij nojkia moneki tijtekiuisej toTeotsij itoka kema timomaijtosej.

ToTeotsij kikuamachilia tlen timoiljuiaj uan tlen tijyolmatij maske tikamanaltij seyok tlajtoli. Biblia kiijtoua: “ToTeko axtechchikoiknelia titlakamej. Uan ipan kampa ueli tlali yajaya kinselia nopa tlakamej tlen kitlepanitaj uan tlen kichiuaj tlen kuali” (Hechos 10:34, 35).

Tlaj tijnekij toTeotsij ma techteochiua amo moneki san timomaijtosej. Ipan sekinok tlamachtili tikitasej tlake moneki tijchiuasej tlaj tijnekij toTeotsij ma techteochiua.