1. ¿Tlake monekiyaya kichiuas kema se akajya kinekiyaya kamanaltis iuaya tlanauatijketl?

XIMOILJUI tiitstok ipan Persia uan tijneki tikamanaltis iuaya tlanauatijketl, yeka tia ipan altepetl Susa, kampa itstok tlanauatijketl. Maske tijnekiskia tikitati, ta amo sanima tikalakiskia kampa moseuijtok, pampa tijmati ueli mitsmiktis pampa amo mitsiljuijtoya xipano (Est. 4:11).

2. ¿Kenijkatsa kineki Jehová ma tijyolmatikaj kema tijnojnotsaj?

² Tlauel tijpatiitaj pampa Jehová amo eli kej katli tlanauatiyayaj ipan Persia. Maske san ya kipia nochi tlanauatili uan amo kej tlanauatianij, ya kineki ma tijnojnotsakaj kema tojuantij tijnekisej. Kineki amo ma timajmauikaj kema tijnojnotsasej. Maske Jehová kena kipia sekinok tokajyotl kej Tlachijchijketl, Katli kipia nochi chikaualistli uan toTeko Katli kinamiki kinauatis nochi, kema tijnojnotsaj kineki ma tikiljuikaj “toTata” (Mat. 6:9). ¡Tlauel tiyolpakij pampa Jehová kineki ma tiitstokaj inechka!

3. ¿Kenke uelis tikiljuisej Jehová “toTata”, uan tlake tikitasej ipan ni tlamachtili?

³ Uelis tikiljuisej Jehová “toTata” pampa ya techmakatok tonemilis (Sal. 36:9). Uan pampa eli toTata, moneki tijneltokasej. Tlaj tijchiuaj tlen ya technauatia tijselisej miak tlateochiualistli (Heb. 12:9). Se tlen nopa tlateochiualistli eli tiitstosej nochipa ipan Tlaltipaktli o ipan iluikak. Uan nama nojkia tijseliaj tlateochiualistli. Ipan ni tlamachtili tikitasej kenijkatsa kinextia Jehová eli kej se teTata katli tlauel techiknelia  uan kenke uelis timotemachisej ya amo kema techtlauelkauas. Achtoui, tikitasej kenke uelis timotemachisej Jehová tlauel techiknelia uan techmokuitlauia.

4. ¿Kenke sekij kimatij ouij kiitasej Jehová kej ininTata?

⁴ ¿Tijmatij ouij tikitasej Jehová kej toTata? Uelis se keskij maseualmej kimatij amo elij ininpati iixpa toTeotsij. Nojkia moiljuiaj toTeotsij amo nelia kitekipachoua tlen kinpano. ToTata katli tlauel techiknelia amo kineki kiampa ma tijyolmatikaj. Ya techmakak tonemilis uan kineki ma tijtemokaj uan ma tikixmatikaj. Kema apóstol Pablo kinkamanaljuik maseualmej tlen Atenas, kiijtok Jehová “itstok nechka sejse tojuantij” (Hech. 17:24-29). ToTeotsij kineki ma tijnechkauikaj kej kichiua se pilokichpiltsi ika itata.

5. ¿Tlake techmachtia tlen kipanok se tosiuaikni?

⁵ Seyok tlamantli tlen kichiua ouij ma kimatikaj kiitasej Jehová kej se teTata eli pampa inintata amo kiniknelik. Se tosiuaikni kiijtok: “Notata amo nechtlepanitayaya. Kema pejki nimomachtia Biblia, nijmatiyaya ouij nikitas toTeotsij kej se teTata. Mopatlak tlen nijyolmatiyaya kema nikixmatki Jehová”. ¿Nojkia techpanotok nopa? Uelis timotemachisej Jehová uelis tikitasej kej se teTata katli tlauel techiknelia uan amo itstok seyok kej ya.

6. Kej kiijtoua Mateo 11:27, ¿kenijkatsa techpaleuijtok Jehová ma tikitakaj kej toTata katli tlauel techiknelia?

⁶ ¿Kenijkatsa Jehová techpaleuijtok ma tikitakaj kej toTata katli tlauel techiknelia? Pampa ipan iTlajtol kichijki ma moijkuilo tlen kiijtok uan tlen kichijki Jesús (xijpoua Mateo 11:27). Jesús kinextik kuajkuali tlamantli kej iTata uan yeka kiijtok: “Yajaya tlen nechitstok, ya kiitstok noTata” (Juan 14:9). Ya miakpa kiijtok Jehová eli kej se teTata. Ipan pilamochtsi Mateo, Marcos, Lucas uan Juan kiijtok se 165 imiakpa “noTata”. ¿Kenke miakpa kiijtok? Pampa kinekiyaya ma kimatikaj maseualmej Jehová eli se teTata katli tlauel teiknelia (Juan 17:25, 26).

7. ¿Tlake tijyekouaj tlen Jehová kema tikitaj kenijkatsa kiikneliyaya iKone?

⁷ Ma tikitakaj kenijkatsa Jehová kinextik kiiknelia Jesús uan tlake techmachtia tlen kichijki. ToTeotsij nochipa kitlakakilik iKone kema momaijtok uan nojkia kinankiliyaya (Juan 11:41, 42). Jesús nochipa kiyolmatki Jehová kiikneliyaya uan kipaleuiyaya ipan nochi tlaouijkayotl tlen kipixki (Luc. 22:42, 43).

8. ¿Kenijkatsa Jehová kimokuitlauik Jesús?

⁸ Jesús kimatiyaya iTata kimakatoya inemilis uan nochi tlamantli tlen kipaleuiyaya ma itsto. Yeka, kiijtok: “Niyoltok pampa nechmaka ichikaualis” (Juan 6:57). Jesús tlauel motemachik ipan iTata, uan Jehová kimakak nochi tlen ika mopanoltiskia. Uan nojkia kichijki seyok tlamantli tlen tlauel ipati: nochipa kipaleuik kuali ma tlaneltoka (Mat. 4:4).

9. ¿Kenijkatsa kinextik Jehová kiikneliyaya Jesús?

⁹ Jehová kinextik eli se teTaj katli tlauel teiknelia kema kipaleuik Jesús ma kimati ya nelia kipaleuiyaya (Mat. 26:53; Juan 8:16). Maske amo nochipa kimanauik, ya kipaleuik ma kiijiyoui nochi tlaouijkayotl. Jesús kimatiyaya maske kipanoskia tlen amo kuali, amo nochipa tlaijiyouiskia (Heb. 12:2). Jehová kinextik kimokuitlauiyaya Jesús ika miak tlamantli: kitlakakiliyaya, kimakayaya tlen monekiyaya, kimachtiyaya uan kipaleuiyaya (Juan 5:20; 8:28). Nama ma tikitakaj  kenijkatsa toTata Jehová nojkia kiampa techmokuitlauia.

10. Kej kiijtoua Salmo 66:19, 20, ¿kenijkatsa kinextia Jehová nelia techiknelia?

¹⁰ Jehová techtlakakilia kema timomaijtouaj (xijpoua Salmo 66:19, 20). Jehová amo kineki san kemantika ma timomaijtokaj, san kema nelia moneki o amo ma tiuejkauakaj. Ya kineki “ajachika” ma timomaijtokaj (1 Tes. 5:17). Uelis timomaijtosej ika tlatlepanitakayotl kema tijnekisej maske kampa ueli tiitstokej. Jehová amo kema tlauel motekiuijtos kema timomaijtosej; ya nochipa kuali techtlakakilis. Kema tijkuamachiliaj ni, techpaleuia nojua tlauel ma tikiknelikaj. Katli kiijkuilok se salmo kiijtok: “Nelia nikiknelia toTeko pampa yajaya nechtlakakilia” (Sal. 116:1).

11. ¿Kenijkatsa technankilia Jehová?

¹¹ ToTata amo san techtlakakilia, ya nojkia kichiua tlen tijtlajtlaniaj. Apóstol Juan temachtli kiijtok ni: “Intla tijtlajtlaniaj toTeko tlen kinamiki ika tlen yajaya kineki, yajaya techtlakakilia” (1 Juan 5:14, 15). Maske techtlakakilia, uelis amo technankilia kej tojuantij timoiljuiaj. Ya kuali kimati tlake tlamantli nelia techpaleuis, uan yeka kemantika amo kichiua tlen tijtlajtlaniaj o kikaua ma pano tonali (2 Cor. 12:7-9).

12, 13. ¿Kenijkatsa Jehová techmaka nochi tlen moneki?

¹² Jehová techmaka nochi tlen moneki. Ya kichiua sanse kej kinnauatijtok tetajmej (1 Tim. 5:8). Kinmaka ikoneuaj nochi tlen kinpoloua. Amo kineki ma timokuesokaj pampa amo tijpiaj tlen tijkuasej, tlen ika timoyoyontisej o se kali kampa tiitstosej (Mat. 6:32, 33; 7:11). Pampa ya eli toTata katli tlauel techiknelia, kichijtok nochi tlen moneki, kiampa teipa amo tleno techpolos.

¹³ Uan nojkia kichijtok seyok tlamantli tlen nelia tlauel ipati: techpaleuia kuali ma titlaneltokakaj. Ika Biblia, technextilijtok ajki eli ya, tlake mosentlalijtok kichiuas, kenke techchijchijki uan tlake panos teipa. Jehová techtlachilik sejse tlen tojuantij kema pejki timomachtiaj uan kintekiuik totatauaj o sekinok toikniuaj pampa kinekiyaya ma tikixmatikaj. Uan ika miak tlaiknelili nojua techpaleuia ika ueuejtlakamej uan ika sekinok toikniuaj katli kuali tlaneltokaj. Nojkia techmachtia ipan tlanechikoli, kampa tijyekouaj miak tlamantli tlen ya ininuaya sekinok toikniuaj. Ika ni uan sekinok tlamantli, Jehová kinextia eli se teTaj katli kitekipachoua nochi tlen techpano (Sal. 32:8).

14. ¿Kenke Jehová technextilia kenijkatsa timonejnemiltisej, uan kenijkatsa kichiua?

¹⁴ Jehová techmachtia kenijkatsa timonejnemiltisej. Tojuantij amo tielij kej Jesús pampa titlajtlakolejkej. ToTata Jehová, katli tlauel techiknelia, kineki techmachtis kenijkatsa timonejnemiltisej, uan yeka techtlalnamiktia kema kinamiki. Ipan iTlajtol kiijtoua: “Nochi tlen nikiniknelia, nikintlalnamiktia” (Heb. 12:6, 7). Kitekiuia miak tlamantli kema techtlalnamiktia. Uelis tlen tijpouaj ipan Biblia o tlen tijtlakakiliaj ipan tlanechikoli techmatiltia moneki tijpatlasej se tlenijki. Nojkia uelis techtlalnamiktia ika ueuejtlakamej. Tlaj kitekiuia ni o sekinok tlamantli, Jehová nochipa techtlalnamiktia pampa techiknelia (Jer. 30:11).

15. ¿Kenijkatsa techmokuitlauia Jehová?

¹⁵ Jehová techpaleuia ma tikijiyouikaj tlaouijkayotl. ToTata Jehová techmokuitlauia kema techpano tlen amo kuali, sanse kej kichiua se tetaj katli tlauel kiniknelia ikoneuaj.  Uan techmaka itonal, kiampa amo kikaua yon se tlamantli ma kichiua ayokmo kuali ma timouikakaj iuaya (Luc. 11:13). Uan nojkia kimokuitlauia tlen timoiljuiaj. Yeka, pampa amo kineki ma techtetsopto tekipacholi, kichijtok ma timotemachikaj kuali tiitstosej teipa. Ximoiljui ipan ni tlamantli: maske nama mitsyolkokoua miak tlamantli, teipa moTata kikaxanis nochi tlen mitskokojtok. Tlen namantsi mitspano amo uejkauas, uan nopa tlateochiualistli tlen tijselis teipa, amo kema tlamis (2 Cor. 4:16-18).

16. ¿Tlake panok kema Adán amo kineltokak iTata?

¹⁶ Kema timoiljuiaj tlen Jehová kichijki kema kiixpanokej, tikitaj kenijkatsa kinextik nelnelia techiknelia. Pampa Adán amo kineltokak, ya uan nochi ikoneuaj ayokmo elkej tlen Jehová ichampoyouaj (Rom. 5:12; 7:14). Maske kiampa panok, Jehová nimantsi kiitak kenijkatsa kinpaleuis Adán ikoneuaj.

17. ¿Tlake nimantsi kichijki Jehová kema Adán tlaixpanok?

¹⁷ Maske Jehová kitlatsakuiltik Adán, amo kintlauelkajki ikoneuaj. Nimantsi kitenkajki maseualmej sampa eliskiaj ichampoyouaj (Gén. 3:15; Rom. 8:20, 21). Jehová kichijki tlen kitenkajki kema temaktilik iKone Jesús. Kema temakak iKone pampa kinejki techmakixtis, kinextik nelnelia tlauel techiknelia (Juan 3:16).

18. Tlaj tijtlauelkajtokej Jehová, ¿kenke temachtli tijmatij ya nojua techiknelia kej tiikoneuaj?

¹⁸ Maske titlajtlakolejkej, Jehová kineki ma tielikaj tlen ichampoyouaj uan amo kema moiljuia tlauel tikouijmakasej. Uan maske uelis tijyolkokosej o timouejkatlalisej se kentsi, amo kema moiljuis san tlapik techpaleuis. Ika nopa neskayotl tlen se telpokatl katli kistej ichaj, Jesús kinextik kenijkatsa  Jehová tlauel techiknelia (Luc. 15:11-32). Itata nopa telpokatl amo kema moiljuik ikone ayokmo moyolpatlaskia o amo tlakuepiliskia. Kema tlakuepilik, itata kiselik ika miak pakilistli. Tlaj tijtlauelkajtok Jehová uan nama timoyolkueptok, xijmajto moTata Jehová kineki sampa xijtekipano.

19. ¿Kenijkatsa Jehová kisenkauas nochi kuesoli tlen Adán kipeualtik?

¹⁹ ToTata kikualchijchiuas nochi kuesoli tlen Adán kipeualtik kema tlajtlakolchijki. Kema Adán tlaijixnamijki, Jehová kiijtok kintlapejpeniskia 144,000 maseualmej katli eliskiaj tlanauatianij uan sacerdotes iuaya Jesús ipan iluikak. Ipan Xochimili, Jesús uan nopa tlanauatianij kinpaleuisej maseualmej katli tlaneltokaj ma elikaj xitlauakej. Teipa kinyejyekosej, uan katli tlaneltokasej, ayokmo kema mikisej. ToTata nelia tlauel yolpakis pampa kiitas ipan nochi Tlaltipaktli itstosej ikoneuaj katli ayokmo elisej tlajtlakolejkej. ¡Nelia tlauel kuali kema kiampa panos!

20. ¿Kenijkatsa Jehová kinextijtok nelia tlauel techiknelia, uan tlake tikitasej ipan seyok tlamachtili?

²⁰ Jehová nochipa kinextijtok tlauel techiknelia. Amo aka eli kej Jehová, pampa san ya eli tlauel kuali teTaj. Techtlakakilia kema timomaijtouaj uan techmaka nochi tlen ika techpaleuia ma tiitstokaj uan kuali ma timouikakaj iuaya. Techtlalnamiktia uan techpaleuia. Uan nojkia kitenkajtok techmakas miak tlateochiualistli. ¡Nelnelia tlauel tiyolpakij pampa tijmatij Jehová techiknelia uan techmokuitlauia! Ipan tlamachtili 7 tikitasej kenijkatsa tojuantij, kej tiikoneuaj, uelis tijnextisej tijtlaskamatij pampa techiknelia.