DON, se tlen Jehová itlajtoltemakauaj katli eua Canadá, kichiua kampeka kinnojnotsas maseualmej katli amo kipiaj ininchaj uan mokauaj ipan ojtli. Ya kiijtoua tlen kipanok se maseuali katli kiixmatki: “Peter amo kipiayaya ichaj uan tlauel sokiyo nemiyaya. Na amo kema nikitstoya seyok tlakatl katli tlauel sosokitik. San tlemach kiniljuiyaya maseualmej uan amo kinekiyaya ma kinechkauikaj. Nojkia amo kinekiyaya ma kipaleuikaj”. Ipan 14 xiuitl, Don kichijki kampeka kuali kinojnotsas Peter.

Se tonali, Peter kitlajtlanik Don: “¿Kenke tijchiua kampeka tinechpaleuis? Na amo tleno nopati. ¿Kenke mitstekipachoua tlen nechpano?”. Ika tlalnamikilistli, Don kitekiuik eyi textos tlen ika kipaleuik. Achtoui, kitlajtlanik tlaj kimatiyaya toTeotsij kipia itoka, uan kiiljuik ma kipoua Salmo 83:18. Pampa kinekiyaya kinextilis kenke tlauel kitekipachouayaya tlen kipanoyaya, kiiljuik ma kipoua Romanos 10:13, 14, kampa kiijtoua “nochi tlen kinojnotsasej toTeotsij Jehová ika itoka momanauisej”. Uan teipa, Don kipouilik Mateo 9:36 kampa kiijtoua: “Kema kinitak nochi nopa miak tlakamej tlen ualajtoyaj kampa ya para ma kinpaleui, [Jesús] kintlasojtlak pampa nelia miak kuesoli kipixtoyaj hasta moiljuijkej ayok tleno ininpati. Itstoyaj keja borregojmej tlen axkipixkej inintlamokuitlauijka”. Teipa, kiiljuik Peter nojkia ma kipoua. Kema kipojki, pejki ixayotemo uan kitlajtlanik Don: “¿Na nieli se tlen nopa borregojmej?”.

Peter pejki kipatla inemilis. Maltik, motensonxinki uan mokentik nopa yoyomitl tlen Don kimakak. Peter pejki kichiua kampeka iyoyo nochipa ma elto tlachikuentli, uan kinekiyaya kuali nesis.

Peter kiijkuilouayaya tlen kipanoyaya. Tlen achtoui kiijkuilok kakistiyaya tlauel motekipachouayaya, uan tlen teipa kiijkuilok, kakistiyaya tlauel yolpakiyaya. Se tlamantli tlen kiijkuilok kiijtouayaya: “Nama nijmatki kenijkatsa itoka toTeotsij. Yeka kema nimomaijtos, uelis nijnojnotsas Jehová.  Tlauel niyolpaki pampa nijmati itoka. Don kiijtoua Jehová uelis mochiuas nouampo, katli nochipa nechtlakakilis maske nikiljuis miak tlamantli”.

Teipa kinijkuiljuilik iikniuaj. Kiijkuilok:

“Nama amo kuali nimomachilia. Uelis pampa nijpia miak xiuitl. Maske amo nijmati tlake nechpanos, tlaj nimikis, nijmati sampa nikitas nouampo [Don] ipan Xochimili. Tlaj inkipouaj ni, kiijtosneki ya nimijki. Tlaj kema nechtokasej inkiitasej se tlakatl katli amo eli sanse kej sekinok, xikamanaltikaj iuaya, uan xijpouakaj ni pilamochtsi azul [se amochtli tlen ika kimachtiyayaj Biblia, itoka La verdad que lleva a vida eterna, katli uejkajkia kimakatoyaj]. * Nopa amochtli kiijtoua sampa nikitas nouampo ipan Xochimili. Uan ika nochi noyolo nijneltoka nelia sampa nikitas. Inmoikni katli inmechiknelia, Peter”.

Kema ya kitoktoyaj Peter, se iikni tlen itoka Ummi kiijtok: “Kipia se ome xiuitl Peter nechpaxaloko. Nesiyaya tlauel yolpakiyaya, uejkajtoya amo kiampa nikitstoya. Uan nojkia tlauel ixuetskayaya”. Nojkia kiiljuik Don: “Nijpouas nopa amochtli pampa tlen kipaleuik noikni uelis eli se tlamantli tlen tlauel kuali”. Ummi nojkia pejki momachtia Biblia iuaya se tosiuaikni. Momachtijkej ika nopa amochtli ¿Tlake nelnelia tlamachtia Biblia?

Tojuantij nojkia uelis tijchiuasej kampeka tikitasej tlen eltok ipan ininyolo maseualmej uan amo san kej nesij. Nojkia uelis tijnextisej tikinikneliaj uan tijpiaj toyolo ika nochi maseualmej (1 Tim. 2:3, 4). Tlaj kiampa tijchiuasej, uelis tikinpaleuisej maseualmej katli kipiaj kuali ininyolo ma kipatlakaj ininnemilis, kej kipanok Peter. Timotemachiaj toTeotsij katli ‘kitlachilia toyolo’, kinpaleuis maseualmej katli kinekij kinechkauisej ma kimatikaj tlen melauak (1 Sam. 16:7; Juan 6:44).