ISRAELEUANIJ katli itstoyaj ipan Tlali tlen Jehová kintenkauilijtoya kimatiyayaj kema tlatojtokaskiaj, pampa xiuitl kipeualtiyayaj ipan septiembre-octubre. Ipan nopa metstli peuayayaj tlapoxoniaj uan tlatojtokaj.

Maseualmej kimatiyayaj keski tonali kipiaskia se metstli pampa kiitayayaj kema peua nesi metstli uan kema tlami. Kiitakej uejkaua se 29 o 30 tonali. Nojkia, kimatiyayaj keski uejkauaskia se xiuitl pampa moyakanayayaj ika Tonati. Tlaj moyakanaskiaj ika metstli, se xiuitl amo kipiaskia miak tonali, kej kema moyakanayayaj ika Tonati. Yeka, monekiyaya kiitasej tlake kichiuasej. Kemantika kipiuiliyayaj se keski tonali o se metstli kema nechka peuaskia seyok xiuitl. Kiampa kema calendario kiijtouayaya monekiyaya tlatojtokasej o pixkasej, nelia kimelauayaya nopa tonali.

Kema Moisés itstoya, Jehová kiniljuik israeleuanij nopa xiuitl “tlen más ipati” o kema iljuichiuaskiaj, monekiyaya peuas ipan metstli abib (o nisán), tlen tikixmatij kej marzo-abril (Éx. 12:2; 13:4). Ipan ni metstli, kichiuayayaj se iljuitl uan kimakayayaj Jehová cebada tlen achtoui kipixkayayaj (Éx. 23:15, 16).

Historiador Emil Schürer kiijtoua: “Nima kimatiyayaj kema xiuitl kipiuiliskiaj se keski tonali, pampa Pascua mochiuayaya kema metstli temitoya ipan Nisán (14 tlen Nisán), uan monekiyaya mochiuas teipa kema tonali uan youali sanse uejkaua (ipan marzo) […]. Tlaj kema tlamiskia xiuitl, kiitayayaj Pascua mochiuaskia kema ayamo asiskia nopa tonali, uajka kipiuiliyayaj se metstli kema ayamo peuayaya metstli Nisán” (Historia del pueblo judío en tiempos de Jesús 175 a. C. - 135 d. C., tlen kitlajtolkuepkej J. Cosgaya uan A. Piñero).

Tojuantij nojkia kiampa tijchiuaj kema tikilnamikij Cristo imikilis, tlen mochiua ipan marzo o abril, uan ipan calendario hebreo eli 14 nisán. Toikniuaj techmatiltiaj kema moilnamikis Cristo imikilis kema nojua poliui se keski tonali. *

Uan, ¿kenijkatsa kimatiyayaj hebreos kema tlamiyaya se metstli? Maske nama uelis nima tijmatisej tlaj tijtlachiliaj se calendario o celular, uejkajkia amo kiampa eliyaya.

Kema Noé itstoya, sejse metstli uejkauayaya 30 tonali (Gén. 7:11, 24; 8:3, 4). Uan kema hebreos kisenkajkej inincalendario, amo nochi metstli sanse uejkauayaya. Peuayaya ipan selmetstli, teipa panoyaya 29 o 30 tonali uan sampa peuayaya seyok metstli.

Se tonali David uan Jonatán kiijtojkej peuaskia se yankuik metstli ika ni tlajtoli: “Mostla peuas [...] metstli yankuik” (1 Sam. 20:5, 18). Uajka, uelis ipan siglo 11 a.u.J., ya kimatiyayaj kema peuayaya se metstli. Uan, ¿kenijkatsa kimatiyayaj israeleuanij? Ipan Misná, se amochtli kampa kiijkuilojkej tlen momajtoyaj kichiuaj judíos, kiijtoua kema ya tlakuepilijtoyaj tlen Babilonia, nopa Sanedrín, se tlasentilistli kampa kintlajtolsenkauayayaj judíos, mosentiliyayaj tlauel ijnalok chikompa ipan se xiuitl, ipan tonali 30, uan nopaya kiijtouayayaj kema peuaskia sekinok metstli. ¿Tlake kinpaleuiyaya kimatisej?

Kintitlaniyayaj se keskij tlakamej ma yakaj ipan tepetl tlen eltoya nechka Jerusalén kampa kuali kiitaskiaj metstli. Tlaj kiitayayaj peuayaya nesi metstli, nima kiniljuiyayaj katli itstoyaj ipan Sanedrín. Kema inijuantij kiitayayaj tlaj nelia kiampa eliyaya, tematiltiyayaj ya pejtoya seyok metstli. ¿Uan tlaj amo ueliyaya kiitaj metstli pampa tlamixtentoya o tlaayajtoya? Uajka kiijtouayayaj nopa metstli  kipiayaya 30 tonali uan kema toniliskia, peuaskia seyok metstli.

Amochtli Misná kiijtoua kema Sanedrín tematiltiyayaj tlen kitlapejpenijtoyaj, tlipitsayayaj ipan tepetl tlen Olivos nechka Jerusalén, uan nojkia ipan se keski tepetl tlen Israel. Teipa ayokmo kiampa kichijkej, pampa pejkej kintitlanij se keskij katli tematiltiskiaj. Kiampa judíos katli itstoyaj uejka uan ipan Jerusalén, kimatiyayaj kema peuaskia seyok metstli, uan ipan sanse tonali nochi iljuichiuaskiaj.

Ni recuadro techpaleuia tijkuamachilisej kema peuayaya metstli ipan hebreos inincalendario, kema mochiuayaya iljuitl uan kema mopatlayaya tonali.