Tikitstokej sekij tlamantli tlen techpaleuia ma tijmatikaj ajkia toTeotsij. Tikitakej Biblia kiijtoua itoka Jehová uan ya tlauel teiknelia. Nojkia tikitakej tlake kichijtok uan tlake kichiuas ika nochi maseualmej. Tlaj tijneki nojua kuali tikixmatis, moneki tijchiuas sekinok tlamantli. Uelis timotlajtlania kenijkatsa mitspaleuis tlaj tikixmatis toTeotsij.

Jehová kiijtoua “intla tijtemos, tijpantis” (1 Crónicas 28:9). Tlaj tijchiuas kampeka kuali tikixmatis tijselis se ueyi tlateochiualistli: kuali timouampojchiuas iuaya (Salmo 25:14). ¿Kenijkatsa mitspaleuis tlaj timouampojchiuas iuaya?

Nelia tlauel tiyolpakis. Biblia kiijtoua Jehová “tlauel yolpaki” (1 Timoteo 1:11, TNM). Tlaj tijnechkauis toTeotsij uan tijchiuas kampeka tijchiuas kej ya, nelia tlauel tiyolpakis, uan nopa mitspaleuis ipan motlakayo, ipan motlalnamikilis uan ika tlen tijyolmati (Salmo 33:12). Nojkia tijchiuas tlamantli tlen mitspaleuis uan amo tijchiuas tlamantli tlen kichiuas ayokmo kuali xiitsto, uan kuali timouikas ininuaya sekinok. Nelia tijyolmatis kej katli kiijkuilok se salmo: “Na achi más nimonechkauis kampa toTeko Dios, pampa ya nopa tlen más kuali para na” (Salmo 73:28).

ToTeotsij mitsmokuitlauis. Jehová kiniljuia iuampoyouaj: “Na nimitsconsejomakas uan nimitstlachilijtos” (Salmo 32:8). Ni kiijtosneki Jehová kinmokuitlauia sejse itekipanojkauaj uan kinmaka tlen kinpoloua (Salmo 139: 1, 2). Kema kuali timouampojchiuas iuaya Jehová, tikitas kenijkatsa ya nochipa mitspaleuis.

Teipa tlauel tiyolpakis. Maske Jehová mitspaleuis xiyolpaki ipan ni tonali, nojkia kineki xiyolpaki teipa (Isaías 48:17, 18). Biblia kiijtoua: “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3). Tojuantij tijmatij temachtli mochiuas tlen toTeotsij techtenkauilijtok, uan nopa techpaleuia amo ma timosentlalikaj ipan tlaouijkayotl tlen tikixnamikij (Hebreos 6:19).

Ni eli san se keski tlateochiualistli tlen tijpias tlaj tikixmatis toTeotsij uan timouampojchiuas iuaya. Tlaj nojua tijneki tijmatis, timitstlaneuij xikamanalti iuaya se tlen Jehová itlajtoltemakauaj o xikita kampa titlamachtiaj ipan Internet ipan jw.org.