SE AKAJYA nelia tlauel moyolkokoua kema isiua o iueue kiixpano. Kemantika sekij maseualmej kena kintlapojpoljuiaj ininnamik pampa moyolkuepaj uan kichiuaj kampeka sampa moiknelisej. * Tlaj motlapojpoljuiaj uan sampa itstokej sansejko o amo, katli kiixpanokej nelia tlauel moyolkokoua. ¿Tlake uelis kipaleuis sampa kuali ma kiyolmati?

Maske tlauel moyolkokouaj, katli kinixpanotokej moyolchikauaj kema kiitaj tlen Biblia kiijtoua. Kema kipouaj, kimatij toTeotsij kiita kenijkatsa tlauel moyolkokouaj uan kikuamachilia tlen kiyolmatij (Malaquías 2:13-16).

“Kema san nimoyoliljuia tlen miak kuesoli uan san ya nopa nijmati, ta tinechyoltlalia. Tinechchiuilia ma nimotemachi ipan ta uan tinechmaka pakilistli” (Salmo 94:19).

Bill kiijtoua: “Kema nijpouayaya ni texto, nimoiljuiyaya kenijkatsa Jehová kejuak nechajalaxouayaya ika miak tlaiknelili, kej kichiuaskia se tetaj katli tlauel tetlasojtla”.

“ToTeko, tikiniknelia uan tiitstok temachtli ika tlen teikneliaj uan tlen temachmej” (Salmo 18:25).

Carmen, katli iueue kiixpanok miak metstli, kiijtoua: “Maske noueue nechtlauelkajki, nijmatiyaya Jehová amo kema nechtlauelkauaskia, ya amo kema nechyolkokoskia”.

“Ayok ximotekipachokaj ika niyon se tlamantli. Más kuali ximomaijtokaj ika toTeko ika nochi tlen inmechpanotiuala [...]. Intla keja nopa inkichiuaj, toTeko inmechmakas tlaseuilistli ipan inmoyolo tlen tlakamej axuelis kimachilisej. Uan nopa tlaseuilistli kiyaualtsakuas inmoyolo” (Filipenses 4:6, 7).

Sasha kiijtoua: “Tlauel miakpa nijpouayaya ni texto. Uan kema nojua tlauel nimomaijtouayaya, nojua nijyolmatiyaya nopa tlaseuilistli tlen toTeotsij temaka”.

Maske nochi nopa maseualmej katli nikaj tikijtojkej nojkia moiljuijkej san tlapik itstoskiaj, inijuantij motemachijkej ipan Jehová uan Biblia tlauel kinyolchikajki. Bill kiijtoua: “Kema nimoiljuiyaya san tlapik nojua niitstos, notlaneltokilis nechpaleuik sampa ma niitsto ika pakilistli. Maske ‘ninenki ipan tsintlayouilotl nechka mikilistli’, toTeotsij nochipa itstoya nouaya” (Salmo 23:4).