¿Timotlajtlanijtok nopa? Ni amo san ta timotlajtlanijtok. Ipan nochi Tlaltipaktli miakej kinekij kimatisej kenijkatsa monankilia nopa tlajtlanili tlen tlauel ipati. ¿Uelis technankilisej?

Miakej kiijtoskiaj kena. ¿Kenke? Pampa kiitakej Biblia xitlauak tlanankilia. Tlaj mitspaktiskia tijmatis tlake kiijtoua Biblia, uelis tijnekiskia se tlen Jehová itlajtoltemakauaj ma mitsmachti ika Biblia uan amo titlaxtlauas. *

Kema sekij kiniljuiaj tlaj kinekij momachtisej, kiijtouaj amo kipiaj tonali, tlauel ouij o amo kinekij kimatisej tlen Biblia kiijtoua. Ma tikitakaj tlen kiijtouaj katli kena kinejkej ma kinmachtikaj.

• “Maske niajki teopa, kampa protestantes, ipan se templo sij, kampa budistas uan ipan universidad nimomachtik Teología, amo nijmatki miak tlamantli tlen nijnekiyaya nijmatis. Uan kema se tlen Jehová itlajtoltemakauaj yajki nochaj, tlauel nechpaktik pampa nechnankilik ika Biblia, yeka kena nijnejki ma nechmachti.” (Gill, Inglaterra.)

• “Nijnekiyaya nijmatis miak tlamantli tlen pano ipan tonemilis, uan tlen nechiljuiyaya katli tlayakanayaya ipan noreligión amo nijneltokayaya. Uan se tlen Jehová itlajtoltemakauaj san ika Biblia nechnankilik. Kema nechiljuik tlaj nijnekiskia nijmatis sekinok tlamantli, nikiljuik kena.” (Koffi, Benín.)

• “Nijnekiyaya nijmatis tlake kinpano katli mikij. Nimoiljuiyaya techiuiliaj tlen amo kuali, uan nijnekiyaya nijmatis tlaj Biblia ya nopa kiijtoua. Yeka, se nouampo katli eliyaya se tlen Jehová itlajtoltemakauaj pejki nechmachtia ika Biblia.” (José, Brasil.)

• “Maske pejki nijpoua Biblia, amo nijkuamachiliyaya. Se tonali, Jehová itlajtoltemakauaj panokej nochaj uan kuali nechixtomilijkej se keski tlajtolpanextili, yeka nijnejki nijmatis sekinok tlamantli.” (Dennize, México.)

• “Nijnekiyaya nijmatis tlaj nelia kitekipachoua toTeotsij tlen nechpano, yeka nijnojnotski toTeotsij katli uala itoka ipan Biblia. Kema tonilik, Jehová itlajtoltemakauaj nechiljuitoj tlaj nijnekiskia ma nechmachtikaj, uan na nikiniljuik kena.” (Anju, Nepal.)

Tlen tikitakej kinextia nelia tlen kiijtok Jesús: “Pakij katli kimatij moneki momachtisej toTeotsij iTlajtol” (Mat. 5:3, TNM). Ni kinextia nochi tijnekij titlaneltokasej ipan toTeotsij, uan ya techpaleuia ika Biblia.

¿Kenijkatsa titlamachtiaj ika Biblia? ¿Kenijkatsa uelis mitspaleuis? Ma tikitakaj.