TELPOKAMEJ
9. Kuali xijmajto kenijkatsa tieli
¿TLAKE KIIJTOSNEKI?
Tlen kichiua ma mitsixmatikaj amo eli motoka o kej tinesi, eli nopa kuajkuali tlamantli tlen ika timoyakana, tlen tijneltoka uan kej tieli.
¿KENKE TLAUEL MONEKI?
Tlaj kuali tijmajtok tlake kuali uan tlake amo kuali, mitspaleuis kuali timonejnemiltis uan amo tijchiuas tlen sekinok mitsiljuisej kema mitstetsopasej.
“Miakej maseualmej elij kej se muñeco pampa amo ininselti kitlapejpeniaj tlake mokentisej” (Adrian).
“Nijchiua kampeka kuali nimonejnemiltis maske kemantika ouij nijmati. Nikita ajkia nelnelia kuali ininuaya nimouika kema nikita kenijkatsa elij uan kenijkatsa nimonejnemiltia kema niitstok ininuaya” (Courtney).
TLEN BIBLIA TETLAJTOLMAKA: “Ayok xijchiuakaj keja ama kichiuaj tlakamej ipan ni Tlaltipaktli. Pero xijkauilikaj toTeko ma inmechyolpatla uan ma inmechchiua inyankuikej” (Romanos 12:2).
¿TLAKE UELISKIA TIJCHIUAS?
Tlaj tijneki tijmatis kenijkatsa tieli nama uan kenijkatsa tijnekiskia tielis teipa, xikita tlake kuali tijchiua, tlake amo kuali tijchiua uan tlake tijneltoka. Uelis timotlatsintokis ni.
Tlake kuali tijchiua: “¿Tlake ueli nijchiua? ¿Ipan tlake tlamantli nipankisa? ¿Amo nima nikualani? ¿Nechpaktia nitekitis, nitemakas tlen nijpia uan kualka niasi kampa nia? ¿Tlake tlamantli kuali nijchiua?”.
XIJCHIUA NI: Tlaj amo tijmati tlake kuali tlamantli tijchiua, xikiljui motata o se akajya katli iuaya timouika ma mitspaleui.
TLEN BIBLIA TETLAJTOLMAKA: “Moneki sejse tojuantij ma timotekitlachilikaj para tikitasej intla iixpa toTeko kuali timonejnemiltiaj o axtle. Uan intla kuali tonemilis, uajka ma tipakikaj, pero axaka ma paki san pampa kichijtok tlen achi kuali kej se iikni” (Gálatas 6:4).
Tlake amo kuali tijchiua: “¿Tlake nechpoloua nijchiuas o tlake tlamantli moneki nijpatlas? ¿Kema nikouijmati nijchiuas tlen kuali? ¿Kema nikita nojua moneki amo nijchiuas tlen nechyoltilana?”.
TLEN BIBLIA TETLAJTOLMAKA: “Intla tikijtouaj axtijpiaj tlajtlakoli, uajka timokajkayauaj ika toseltsitsij” (1 Juan 1:8).
Tlen tijneltoka: “¿Ika tlake kuajkuali tlamantli nimoyakana, uan kenke? ¿Nijneltoka nelnelia itstok toTeotsij? ¿Kenke kiampa nijneltoka? ¿Tlake tlamantli nikita amo kuali, uan kenke? ¿Tlake nimoiljuia panos teipa?”.
TLEN BIBLIA TETLAJTOLMAKA: “Motlalnamikilis mitsmokuitlauis. Kena, tlen tijmatis mitschiuas para tiitstos ika temachili” (Proverbios 2:11).
Tlen nojkia mitspaktis tikitas
MONANKILIA 10 TLAJTLANILI TLEN TELPOKAMEJ KINEKIJ KIMATISEJ
¿Nelnelia kuali nimoixmati?
Tlaj kuali tijmatis tlen tijyolmati, tlen timosentlalijtok tijchiuas, tlen tijneltoka, tlen tiueli tijchiua uan tlen amo tiueli, mitspaleuis kuali xijtlapejpeni tlake tijchiuas kema sekinok kinekisej xijchiua tlen amo kuali.
